شین پەی موحەمەد بەگو وەکېڵی
بەشۍ دوەمە
پەژارەو موحەممەد بەگو وەکېڵۍ، قامەتو میرزا ئۆلقاڎریش پېسە چەوکانی چەمنانۆ، باس جە چن کەسێ نزیکی جە محەمەد بەگو وەکېڵی کەرۊن، کەسوکارەکەیش، کە حاڵشان پەرېشانەن، خەفەتی خەمنێنێ.
شاهێ وېنەی تۊم جە دەس بەرشیەن
بەڵام چېش گەردوون وەش دەماخ بیەن
ئەحمەدبەگ یەند خەم بەردەن وە تۊی دڵ
کەوتەن نە خەیاڵ ماجەرای موشکڵ
پەژارەی ناکام ناگای مەرگ تۊ
قامەتش کەردەن وە چەوگان چۊ
دایېم ڕۊ ڕۊشەن بە دڵەدا پەی وېش
کوڵ مەڎۊ وە جۊش کەس مەزانۊ پېش
محەممەد ڕەشید بەگ زامی ئاوەردەن
دایېم هەر وە سۊن تا وە ڕۊی مەردەن
شاڎیی پەشیمان جە ئەو شاڎیی و زەوق
شاڎییش بی بە شین شەوقش بی وە تەوق
مسەفا بەگ زامش نە دڵ کاریەن
عەبدوڵابەگ ئەسرش چوون سەیل جاریەن
پەیاپەی هەر دوو وېنەی دېوانە
ئەسرین مەڕېزان نە مەکتەب‌خانە
هانا جەی فەراق غوسەی بېپایان
ئەم جار ب وەلای حەرەم سەرایان
خاڵ‌خاسان دەور نەمامان نۊ
پەی کەردەن نە دەور زوڵف عەنبەر بۊ
لیباس قەڵاخان سەر وە لیتەوە
چۊپی چەمەرکېش وە هەتیتەوە
نە دەور کۊتەڵ شای گەردەن بېگەرد
گشت ڕوخسار وېش پارەپارە کەرد
تفەنگ‌داران گشت سەر وە نیلەوە
دوورباش مەواچان وە زەلیلەوە
سەعدی ئاغەی خوڵ و خاک وەسەر
ئاغەڕۊشانەن تا وە ڕۊی مەحشەر
نۊکەران دەس‌دەس پەڵاس نە گەردەن
هانەکەی شاهی چوون وەکېڵ مەردەن
چریکەی سازان چەمەری خانە
ڕۊڕۊی خەلایق خوېش و بېگانە
سارای قەڵا گشت وە بۍ مەنا و مەین
بی بە کەربەلای ڕۊی ئیمام حوسەین
ڕابیعە دڵتەنگ زەعیف و بەڎحاڵ
سەرتاپاش بیەن وە کۊگای زوخاڵ
جەو ساوە وەکېڵ تەشریفش بەردەن
تەقوا و تاعەتش فەرامۊش کەردەن
سەڵای لاڵی خان چوون مەحبوبەی جاف
تاو نا وە تاو سەنگ جە قولەی قاف
دامان ئایېر دڵەش وە جۊشەن
ئەلوەداع گەرم مەرگ بابۊشەن
شیوەن ها وەلای حەبۍ خانەوە
وەی سەیل هوونین بېسامانەوە
فەڵەک نەردی بەد نە تاس ئاوەردەن
ڕۊستەم سوڵتانش دووبارە مەردەن
غەرەز دەردشان یەک‌یەک عەیانەن
نۊبەی زاری و شین خەدیجە خانەن
ئەسرین مەڕېزۊ شەوان تا وە ڕۊ
مەواچۊ وەکېڵ داخ دارم پەی تۊ
حەبیبەی بەڎبەخت هەر ئاغە ڕۊشەن
یەقین تا مەحشەر هەر سیا پۊشەن
شەوان تا وە ڕۊ وە دەشت و دەردا
ئاغەکەم پەی تۊ مەڎۊ وە سەردا
نیگا کەر پەرۍ سەلمای دڵدارت
تووخوڐا وە بۍ ئەو چۊنەن قەرارت
ئیتلاعت نیەن ئاغە گیانوو تۊ
پاسەش حاسڵەن وە باوان مەشۊ
چېش واچوون لاڵ بام نادرەی نیک نام
جە وەسڵ باڵاش نەیاوای بە کام
فاتەی خەم‌خەیاڵ نە تل و تەم‌دا
وېش کېشان وە کەف سەرکووپەی خومدا
ئەم جار ب وەلای ئەو خەم خارەکەت
بانووی بانوان، وەفاڎارەکەت
فیرۆزەی بېعەیب شای سۊسەن خاڵان
سوپای زوڵف و خاڵ گشت دان وە تاڵان.[1]