چناری هەوڵی
بەشۊ یەرەمۍ

دمای ئانەی میرزا ئۆلقادر جە سەرچەمەو هەوڵی چن پەرسێش کەردۍ ئەو دار چنارە باڵا بەرزەکەی، دار چناریچ بە چەمۍ پەڕ هەڵسېوە ئاماوە گوفتار و ماچۊ: ئەی دەردین، ڕازو من توولانییەنە، من سەرو ڕیشەو تاتەو وېمۆ جە ماواو وېم، پېسە نۊ نەمامێ ئامانۍ وجوود، چا سەردەمەنە ئی مەرز و بوومە ماواو کافرەکا بۍ، دەنگو ناقووسېشا بەرزبۍ، من نەمامێ گولانۍ و بۍ ئەرزشە بېنا، ئا سەردەمە کەیومەرس دەسەڵاتدار بۍ کە یۊ بۍ جە پاشاو کەیانیەکا.

ساتێ ئاما وېش وەبۍ مودارا
ئەسرین چوون سەیلات نەدیڎەش ۋارا
واتش ئەی دەردین سفتەی سەودای عەشق
وېڵ دەربەدەر لېوی مەجنوون مەشق
من جە ڕاز عەرز شۊڕش‌خېز تۊ
کۊنە زامانم گشت ئاما وە سۊ
دیای وە شەوکەت پەڕ و باڵ من
پەرسای جە وەزع سنع و ساڵ من
مەر حەق بزانۊ جە ڕۊزگاران
من عومر شاڎییم چڼین ۋیاران
هەر ئیڎ مەزانوون جە قەدیم دەوران
وەخت کوفر وکین زەمانەی گەوران
ئەی گرد مەرز و بووم، ماوای کوففار بۍ
ناڵەی ناقووسان سوب ئاشکار بۍ
مەژەندن وە گەرم ڕاهیبان زشت
نە سەرقولەی تاق کلېسا و کەنشت
منیچ نەو جەنگەڵ چۊڵ دەریبەر
گەنجگەی مەشهوور ماوای پەڕخەتەر
وە ئەمر قودرەت پادشای مەعبوود
جە ڕیشەی بابۊی وېم ئامان ۋجوود
سەر هۆردام نە خاک بېکارە و بېکەل
چوون گیای نەوروز باریک و دووپەل
ئەوەند بۍ تەمیز، کەم قەدر و خار بیم
دایېم خەمیای خەم، پای ڕاویار بیم
خۊ هەرچن ماما هەر پاماڵ مەبیم
بېقەدر و قیمەت پەشېو حاڵ مە بیم
نە لایەق وە ئېڎ بووڕام وە تیشە
نە قایل وە ئه و بارام جە ڕیشە
نە هەم‌چوون قەقنەس ئایر مەشی لېم
نە خوڎا باڵای بوڵەند مەڎا پېم
ڕۊ جە ڕۊ کەمتەر هەر کەم پایە بیم
بېسایە و بېبەرگ کۊتا مایە بیم
بەڵۍ هەی میرزام تۊ چېش مەزانی
من چېشم دیەن جەی دنیای فانی
بۍ تاقەت مەبیی جە شەرح ڕازم
جە سەرگوزەشتەی دوور و درازم
ئه و وەختە ئەیام مەستانە مەی بۍ
شاهی کەیومەرس پادشای کەی بۍ
جە ناکا فەڵەک شېونا بەختش
سای سەنگ ئەلحەد کەرد وە جای تەختش
تەهماسب چوون شېر زەنەندەی خەتەر
نیشت نە تەخت زەڕ نە جاگەی پدەر
ئاڎییچ هەم جە نۊ دڵ وە ناکامی
ئاخر کۊچش کەرد جە دنیای فانی
هووشەنگ‌ شا وېنە شاتووڵ نەوهاڵ
سبقەت کەرد پەی وېش نیشت وە تەخت لاڵ
لوهراسب ئاما گەرشاسب ۋیەرد
تا ئەجەڵ یەک یەک شاهان مەعزوڵ کەرد
وە حوکم فەرمان دانای دادگەر
شاهیی هەم یاوا وە شای مەنووچەر
جە دمای چن ساڵ شای جەمشید جەم
نیشت وە تەخت عاج شاهیی وە بېخەم
مەڎیا نە ڕووی جام جەهان‌نمای وېش
ماماش وە نەزەر، شا و گەدا و دەروېش
کەش و کۊ و کەمەر، سارا و بەحر و بەڕ
جەهان دیار بۍ گرد نەو جام زەڕ
جە ناگا فەڵەک هەم دەورێ َ وەردش
جامش چەنی وېش سەرنگوون کەردش.[1]