میرزام نەمامان
بەشۊ یەکەمۍ

میرزا ئۆلقاڎر، گوزەرێ دلۍ نەماماش کەردەن، بەڵام ئیجارە نەک پەی سەیرانی، بەڵکم پەی هەواڵ پەرسای، ئاڎ ئیجارە پېسە سەیاحێ گېڵەری، جۊیەندێ عەجایباتی، حەزکەرۊن پەرسۊن، جواب وەرگېرۊن پەی تاریخی بنویسۊش. فەسڵو پایېزین، داران، نەمامان گردشان ماتەمەن، نزیکەن جە مەردەن، ڕۊخسارشان زەردەن، میرزا مەجنوون ئاسا گرانتەرەن دەردش، پەرساش نۊ نەمامێ، واتش: شمە وەڵتەر ڕەنگی باڵاتان یەکپارچە سەوز بۍ، ئیسە چ خێرەن ڕەنگتان زەرد بییەن، ئی گرد کاڵا ڕەنگاو ڕەنگۍ چ کارخانێنە ئامێنۍ؟ چ خەیاتێ ۋراستېنۍ؟، ڕاس واچە پېم؟.
میرزام نەمامان میرزام نەمامان
ئارۊ شیم وە سەیر باغچەی نەمامان
دیام وە کاڵای باڵای سەرخامان
دیم گرد ماتەمەن جە سەر تا دامان
گرد هانۆ بە ۋیر غەڕغەڕەی مەردەن
گرد وېنەی ڕوخسار عاشقان زەردەن
ڕەنگاڕەنگ زەردەن یەکسەر کاڵاشان
بېڕەونەق بیەن باڵای ئاڵاشان
منیچ حەیران بیم بەو تەمەڼاوە
بۍ ڕۊح نە پاوە، دیام وە پاوە
پەیاپەی خېزا دووی ئاهی سەردم
قەیس‌ ئاسا جە نۊ گران بی دەردم
جە زەردی ڕوخسار نەمامان نۊ
خەم بی قامەتم، چوون چەوگان چۊ
جەودما کەم‌کەم وېنەی ساداران
وە زوان حاڵ پەرسام جە داران
نەمامێ وېنەی زەعفەران زەرد
خەم دابۍ چوون من چەنی داخ دەرد
عەرز کەردم واتم: نەمام نەوبەر
شیرینتەر جە تەرز ڕاز نەیشەکەر
بوویەر جە تەقسیر نادانی عەرزم
هەرزە گوفتاری و ئەفغان بەرزم
بەندە سەیاحی ڕووی سەربیساتم
دایېم جویەندەی عەجایباتم
جە هەر ئەشیایە مەپەرسوون ئەحواڵ
جە ترش و جە شۊر جە شیرین جە تاڵ
مەبۊ حاڵی بوون جە گرد ئەحواڵان
تاکە تاریخ بۊ جەلام پەی ساڵان
نیازم ئېڎەن نەونەمام نۊ
باجەتی ئەو شا، شۊخیش دان وە تۊ
ئەوەڵ ماتەمی زاریتان چېشەن
سۊز و ناڵەتان سەڎ ئەندوو پېشەن
مەر عەزیز خاس گیانیتان مەردەن
وەیتەور سەر تا پا ڕەنگتان زەردەن
سانیەن جەی وەر بەرگ باڵاتان
گرد هەر(اخضر) بۍ باڵای ئاڵاتان
ئیسە گرد زەردەن ئەوراق داران
بە وېنەی گوڵگزار ئەوەڵ وەهاران
ئەی گرد فاخرەی ئەعلای سەڎ ڕەنگە
ئەی دیبای شیرین شۊخ قەشەنگە
سا هەی دەخیلم جە کۊتان ئاوەرد؟
کام خەیات‌ باشی بڕیامانش کەرد
جە کارخانەی کېن، مەتای کام شارەن؟
مایەی نەوزوهوور کام بنەک‌ دارەن
بۆ ڕاس واچە پېم نەمام نەوبەر
بەشق زات پاک دانای دادگەر.[1]