بنەما بنەڕەتیەکۍ ڕاوڕەچەو یارسانی
بەشۊ دواڼزەهەمۍ

ڕاو ڕەچەو یارسانی کوردیەن:
پەی سەلەمنای ئی پەیلۋایە، ئی خاڵا ۋزمۍ ڕوۋە:
1.تەمامو سروودەکېشا، پەخشانەکېشا بە زوانی کوردی (هۆرامی) یېنۍ.
2.قیبلېشا (پەردیۋەر) ەن، کە ئینا هۆرامان، ئی دېڕە شېعرۍ جە سروودەو تەڵقینەو مەردەی ئا ڕاسیەما پەی بەرمەوزۊن:
موحاسیب پیر مووسا ساحیب دەفتەرەن
قیبلەی حەقاڼییش نە پەردیوەرەن.
3.ئاۋەو کەوسەریشان ئینا کوردەسانەنە، ئاڎییچە ئاۋەو (هانە گەسڵان-غەسڵان) جە دەگاو (تەشار) ی جە هۆرامان، چی دېڕە شېعرېنە بەرمەگنۊ:
ڤەنتق مەردان خەرقەی نوور نەوەر
ئاوم تەشارەن، قیبلەم پەردیۋەر.
4.دنیای نەمرەشان ئینا شارەزوورەنە، فرەو یاگە پیروزەکاشا ئینێ کوردەسانەنە، پەی نموونەی:
(هاوار، تەپەسو-تەپو سەفای، سەرگەتە، دەرەشیش، میری سوور، هۆرێن، ئەحمەڎ بڕنە، مەزارو بابا سەرهەنگی جە تەوېڵۍ، کەلو داۋدی، ....هتد.) ، فرەو ئی یاگا جە سروودە دینیەکاشانە نامېشان ئامێنە.
ڕابەرە سەرینەکۍ ئی ڕاو ڕەچەیە گردشان کوردېنۍ، نیشتەجاو کوردەسانی بیېنۍ، چانېشا:
(بالوولی ماهی، بابا سەرهەنگی دەودانی، بابا ناۋسی سەرگەتی، شا خوشێنی لوڕستانی، سان سەهاکی بەرزنجی) .
6.کوردستان بە گردی و ناوچەو هۊرامانی بە دیاریکریایی یاگۍ پېڎابییەی، وەڵابېیەیۆ، گەشەکەردەی، ڕېکۋستەیۆ) ڕاو ڕەچەکەی بېیېنە.
7.وەرگیری نەکەردەی ڕابەرە ئایینیەکاشا جە لایەنو خەڵکو ناوچەکەی و هۆرامانیۆ، پەی نموونەی وەختێ (سان سەهاک) مەلۊ پەی هۆرامانی، نەک هەر زدایەتیش نمەکەران، بەڵکو پوورەش مڎان و حورمەتش گېران.[1]