پیرەکۍ هۆرامانی
بەشۊ دوەمۍ
دەفتەرە پیروزەکۍ ڕاوڕەچەو (کاکەیی-یارسانی) پېسە (سەرەنجام- بارگە بارگە، یاداشتەکۍ قرندی) ، باس جە تارېخو ژیوای پیرەکا کریان، چڼین بەرهەمە شېعریېشا نویسیێنێ، باس چانەیچە کریان کە فرېشان یارۍ (سان سەهاکی بەرزنجی) بیېنۍ، جە سەڎەکا حۆتەم و هەشتەمی کۊچینە ژیۋێنۍ.
(هادی بەهمەنی) جە کتېبو پەیامی هۆرامانینە نویستەنش:
هۆرامانەنە (99) کەسۍ دینیۍ بیېنۍ، جیاتی موغ و ڕابەرا دینیی زەردەشی پەنەشان واتېنۍ (پیر) ، هەر کومەڵێشا یەک ڕابەرشان بېیەن کە پەنەشان واتەن (پیرشالیار) ، بە ماناو (شالیارو پیرەکا- وەزیرو پیرەکا) .
ڕازە دەماو دەمیەکۍ خەڵکو هۆرامانی باس جە پایەی دینی و کۊمەڵی پیرەکا کەران، سەڎان سەرگوزەشتۍ سەیرو سەمەرۍ و ئەفسانەیۍ دەربارەشان مەگېڵناوە، بە تەرزێ، فرەو جاری پایەشان ئڼە بەرزکەراوە مەیاوناشان پلەو پېخامئاوەرا.
ماموسا (محەمەد ئەمین هۆرامانی) بە پەشت بەستەی بە دوۍ سەرچەمە دەسنویسا، یۊشان بە نامۍ (پاسداران مرز ئێران-تاریخ اورامان) جە نویستەی (موزەفەر خانو ڕەزاوی) ، دوەمشان کە وېش نامېش نیان دەسنویسی (شین) گوایا خاوەنەکەش قایېل نەبېیەن نامېش بەرۊن، نامۍ چن پیرێ مارۊن، تارېخو ژیوایشان وستەنش ڕوە.
د.صدیق بورەکەییچ بە پەشت بەستەی بە دەسنویسە پیروزەکا (ڕاوڕەچەو یارسانی) جە کتېبو (مێژووی وێژەی کوردی-بەرگی یەکەم) تۊشەبەرێ جە تارېخو ژیوای و بەرهەمە شېعریەکا چن پیرێش نویستەن.[1]