کوڕو گوڵەی
ماچۊ: کابرێوە کە خەڵکوو لەیلاخی مەبۊ، تەڵاقش مەگنۊ، ئا کابرا هەمیشە چەنی ژەنەکېش شەڕشانەو نمەگنا یۊ، ڕوێوە پېسەو جارانی چەنی ژەنەکېش مەبۊشا شەڕو کابرا بە ژەنەکېش ماچۊ: لوە تەڵاقت کەوتەبۊ سەرو تڕ و نیمێ.
کابرا دوۍ یەرۍ زاڕۊڵۍ وردېچش مەبا، دماو تاوێوە پەشیمان مەبۊوە چی قسېشە، ماچۊ: ئیسە چېش کەروو؟ مەلۊ پەی لاو پەنج شش مەڵڵایا و گرد ماچا تەڵاقت کەوتەن، ئاخرش مەلۊ پەی شاروو سنەی پەی لاو مامۊسێوە گەورەی، مامۊساکە ماچۊ: من ڕېک نمەتاوو واچووت پەنە کە ئی تەڵاقتە کەوتەن یام نەکەوتەن، پەی ئی قسۍ تۊ، مەڵڵێوە هەن جە مەنتەقەو هۆرامانینە، جە دەگاو ڕوارینە بە نامۍ (مەڵڵا خڎری)، مەگەر ئا مامۊسا چی قسېتە سەرە بەرکەرۊ و جوابت بڎۊوە، لوە پەی لایش.
پیاکە مەگنۊ ڕا، بە پەرسا-پەرسا ڕواری مېزۊوە و مەلۊ پەی لاو مەڵڵا خڎری، هامن مەبۊ و مەڵڵا خڎر چلېنە مەبۊ، یەرۍ ڕوېش مەمانۊ چلېنە بەربێ. ئا کابرا ئی یەرە ڕوە یانەو مەڵڵا خڎرینە مەنۊوەو کارشا پەی مەکەرۊ تاکو مەڵڵا بەرمێ.
مەڵڵا خڎر ڕوە مەکەرۊنە پیاکەی و مەفەرماوۊ: ئەرۍ کابرا ئی تەڵڵاقتە چەنی وستەن؟ کابرا ماچۊ: وەڵڵاهی مامۊسا گېیان پی جۊرە واتەنم: لوە تەڵاقت کەوتەبۊ سەرو تڕ و نیمێ، مامۊسا کەمېوە مەفکریۊنە و دماوە دەس مەکەرۊ خوای و قللێ مەڎۊ وەنە، دەمو خوایۆ ماچۊ: کاکە لوە ژەنەکېت بەرەوە تەڵاقت نەکەوتەن، مامۊسا مەپەرسۊ کابراکەی: ئەرۍ تاتەت نامېش چېشەن؟ کابرا ماچۊ: قوربان (گوڵە) ش نامېن، مامۊسا ماچۊ وانانت؟ کابرا ماچۊ هیچم نەوانان، مامۊسا نامێوە مەنویسۊ پەی مەڵڵایاو سنەی و لەیلاخی، مەڎۊش دەسو کابرایوە و ماچۊ بەرەش پەی ئا مەڵڵایا، دماو سڵام و عەلەیکی منویسۊ: تڕ هەر تڕەن، ئیتر نیم تڕ کۊن، دماوە نامەکەی پی شېوە دمایی مارۊ:
یەک تڕ بەهەر حاڵ، نیم تڕ موشکڵە
یەک تڕ و نیم تڕ، بە ئەڕواح گوڵە.[1]