‍ لای لای
شاعېر: فەتحوڵڵا ڕەزایی

شاعېر فرە بە زەریفی لای لایە مەکەرۊن پەی زارۊڵەکەیش، ئاڎ جگەرگۊشەکەیش وېناکەرۊن بە جوانیەکا و بەرکۆتەکا وەهاری، چەنی ئانەیچە بە ئاواتەکەش، (لای لای خونچەکەو گوڵی) ، هەر جە عەینو وەختینە (ئاواتو تاسەو دڵی) .
دمای ڕازنایۆ کۊرپەکەیش بە جوانیەکا وەهاری، زەریفیێ تەرش مڎۊ پەنە، ئاڎییچ (هۆرامی شېوە) ن.
هەر پاسە وازش چەنە نمارۊ، ئۊمېڎش پەنەشا کە دما ڕۊنە پەی هۆرامانی و کوردستانی تاکێ بە وەفا بۊن، پەنەش ماچۊ: بووسە، بەڵام دڵەنە وریابە!
لای لای کۊرپەلەی ساوا
شەماڵوو بەرزە کاوا
لای لای خونچەکەو گوڵی
ئاوات و تاسەو دڵی
لای لای هەراڵەو ساوا
وەنەوشەو گۊشەو ئاوا
لای لای بەڕەزاو شاخا
بەرزەڵنگوو ئېڵاخا
لای لای سوورەهەراڵە
وەرکەمەر و گوراڵە
لای لای هەمرۊ گوڵاوی
ئەڵڵا زوو پەنە یاوی
لای لای باخچەو وەهاری
یا خوا تۊ زەرەر ناری
لای لای چنوور و شۆبۊ
یا ڕەب کۊرپەلەم وەشبۊ
لای لای هەناسەو هانەی
خەم بەر کەرەکەو یانەی
لای لای جگەر گۊشەکەم
تۊنی ویر و هۊشەکەم
لای لای هۆرامی شېوە
با لای لای کەرمۍ پېوە
لای لای کەرە وریا بە
پەی وەڵاتیت فریا بە
بووسە بەڵام هۊشېیار بە
چنی مللەتیت یار بە
یا خوڎا بۍ جەنگ و داوا
وەڵاتما بۊوە ئاوا.

یانەو پەپوولا تایبەت بە ئەدەبېیاتوو زارۊڵاو هۆرامانی.[1]