گەلاوېژ بەرکۆتەن
نویستەی: #ئیبراهیم میکە عەلی#
ماچا گەلاویٛژ زیان گەناوە
واچدیٛ بەیارا کوٙچیٛ پیٛچاوە
فەرهەنگو کەشناسی هۆرامانینە ئاروٙلای هەوا شەویٛنە وەشکەروٙنە و ڕوٙبەڕوٙ گەرما کەمکەروٙ و دنیا فیٛنکە بوٙوە و شیٛنەی هەنگورەو میٛوەدەیمەکا و سەمەرو باخا و هەنجیری یاوا پەنە.
هەر پاسە هەکە هوٙنیاکەو سەرینە ئامان، ئاروٙولای ئیٛتر هەوارنشینیٛ گنا ویٛشا و هەرمان و کارشا جەم و جوٙر کەرا و ویٛشا ئامادە کەرا پەی بارکەرڎەیۆ پەی دلیٛ دەگێ چوون ئیٛتر شەویٛنە هەوا سەردا و زاڕوٙڵیٛ وەرگە مەگیٛرا هەوارەنە.
شوٙنەماو ئی فاڕیای هەوایچە بەرکەوتەی هەسارەو گەلاویٛژین ئاسمانو مەحاڵەکەینە.
بەرکۆتەو هەسارەو گەلاوېژی تەقەیۊرێش جە ئاو و هەوانە کەردەن، دنیا فېنکە بیېنۆ، ئانەیچ بېیەن بە ئامیانو چڼین دېڕە شېعرا کە پېسە فولکلوری پەیمان مەنېنێ.
ماچا گەلاوېژ ئینا جە ڕاوە
ئارۊ یام سەوای پېویۊ گەناوە.
وەختێ گەلاوېژ بەرمەیۊ جە کۊ
فېنک کەرۊوە دڵەکەی من و تۊ.
بەرمێ گەلاوېژ مارۊ ڕوناکی
هەسارەی سی وەیل مەوزۊ تاریکی.
دیارا جە عاسمان، پەخشان، درەخشان
هەسارەو ئېمە مەپېویۊ دیسان.
شۊقش یارا ج عەرز و ئاسمان
بەش شۊڵەش گنۊ دیڎەو دوڵبەران.[1]