وۍ بېیەی
نویستەی: #ئیبراهیم میکە عەلی#
وۍ بېیەی حاڵەتێوە دەروونیی و ئەریٛنین هەکە بنیاڎم ویٛش دلیٛشەنە پیٛسەو وېش (یانی پا جوٙرە هەکە هەن) مرمانۆنە و حەرچی ویٛ ڕازنایۆ و ویٛ پوٙژنارەییٛ تەریٛش هەنیٛ، گرڎی وزوٙ کەنارۆ و ویٛش و کەسایەتیش و خڎە و ڕەفتارش پا جوٙرە نیشانە مڎوٙ و کەروٙ هەکە هەن، نەک پا جوٙرە هەکە بەزەبرو قەرەباڵغی دەوروپەشتیش مشوٙم بوٙ.
دیارا ئینەیچ هەنگامێوەنە تەنیا کەسە ئازێکیٛ تاوا هوٙرش گېرا و باجەکەیچش قورسا و گرکەس مەتاووٙ شانەش بدوٙ چیٛر.
یوٙ تەر چا حەقیقەتا ئانەنە بەداخەی سەختۆ گلیٛرگە و حەشاماتو دلیٛش، هەمیشە پەنەشا وەشا درویٛشا چەنی دەی و بە جوٙرێوە ویٛڎ بەر وزی هەکە خەڵک پەنەش وەشا، نەک پا جوٙرە هەکە ویٛڎ پەنەڎ وەشا.
ویٛ بەروستەیچ پیٛسە ویٛڎ، پا مانێ نمێ هەکە گردو عادەتەکا بە یەکجاریی وزی پەشتەو گوٙشا و گوٙش نەڎەی حیچی، بەڵکو پا مانێ مێ ئەر چارڎ ناچار بی عاڎەتێوە یام چڼ عاڎەتێوەیچڎ ڕەچاو کەردیٛ، نەشاریشۆ و واچی یام بەجوٙرێوە بەرش وزی: وەرو ئانەیە نەبېیێ هەکە ئی چیٛوە بېیەن بە عاڎەت من ئی کاریە نەکەریٛنیٛ.
هەتا پیٛسە هەنگامێ یوەمەو چارەسەری، خەڵک چڵەکیوٙرە و زانوٙ کامە عاڎەتا و کامە خەسڵەتی بنەڕەتیی و بېیەی ویٛتا.
دمادمای ئی کوڵە بابەتەیچەنە پەنەوازش زانو واچو: پیٛسە ویٛما زەریفتەریٛ و مەکینتەریٛنمیٛ نەک پیٛسە یوٙترینی.
یانی دیمە گوٙلەکیٛ ویٛ بېیەی مەکینتەریٛنیٛ جە دیمە زەریفەکاو خەڵک بېیەی.[1]