داستانو حەیاتۍ و قاسمی
بەشۊ: هەشتەمۍ

سەعە چەمەڕایی ئانەیە نەکەرۍ، لالۊ نالە قەدرش پەی بنیۆرە و بلۆ یانەش. دماو قسە و باسێوی درێژی لالۊ نالە تاواش دڵوو سەعەیبۊنەو ئا وېرەگانەیۊ، بارۆوە یاگێ. وەختوو خوڎا حافێزیەنە سەعە ملېوش لار نېیا و واتش:
- نالە من هیچ دژمەنیێوم چەنی ئی کوڕیە نېیا و هەقەو ئەدایچش چێدی مەسانوو. ئی کوڕە عەیبېش فرێنێ، ڕەنگا تۊ نەزانیشا.
عەیبێ ئی کوڕیە چېشێنێ سەعە؟ ئاخر دزا؟ ئاخر جەردەن؟ ئاخر ئی کوڕە فەقیرە چېشش هەن کە ئاپاسە وەروو چەما تۊ کۆتەن؟ ئیتر ئاندە وېت تووشو خیاڵا مەکەرە سەعە.
لالۊ نالە شۆنەو ئانەیەرە یانەو سەعە شەلیش ئاست جیا، دماو چن ڕوێ پەی جوابەکەیش سەرێوو یانەو حەیاتێش داوە، ئی جارە بە دەسی پەڕ لواوە یانە.
حیاتە دریا بە قاسمی!
هەیاس و یاسێ ئەدا و تاتەو قاسمی، بە ئۆپەڕوو وەشحاڵیۆ، لوێ پەی یانەو لالۊ نالەی و دەسشا ماچ کەرد. خاس زانێنێ ئەر لالۊ نالە نەبېیێ، ئی کارە پا ئاسانیە نەکریێ.
یاسێ پەی سپاس گوزاری جە لالۊ نالەی، شاڵێوی مەرەز کە بە دەسا وېش ڕېستەبېش، پېشکەشو لالۊ نالەیش کەرد.
قاسم و حەیاتە وەختێو خەبەرەکەشا ئەژنەوی، دنیاو خیاڵەکاشا فاریا و ئاواتەکېشا خەریک بۍ بە دی ئێنێ.
چا ماوەنە قاسم وەشتەرین ڕوەکا عەمریش ویارێرە. هەر دوورۆ وەختێو بەر گنێ، گردو لاشەیش خوای خوێ. هەرلێو لوێ و هەر کەسی وینێ باسوو ڕیک وسەو زەماوندەکېش کەرۍ.
شەوەو زەماوندەکێ، یانەو قاسمی، بە تایبەت یاسێ ئەداش، پەشۆکیایێوی فرەش پۆوە دیار بێ. هەرچی وەختوو زەماوندەکێ فرەتەر نزیکە گنێوە، دڵەورکېش زیاتەرە بێ.
ئا شەوە قۆم و کەسە نزیکەکېشا، لاشاوە بێنێ و هەر یۊ هەرمانێوە ڕېکە وزێ.
هەیاس چا وەختەنە یاسێ ژەنیش ئێ و لوێ و هەرمانێ کەرۍ، مدیۆ ڕەنگ و ڕوخسارش ئۆ تەمامی مەشۆ.کېشتەش کنارێوۆ و واتش:
ئەرۍ یاسێ خۊ ئاشکرا خەریکەنی جە وێ ملی بەر، جیای ئینەیە وەشحاڵە بی کە تاقە کوڕەکەت ژەنی مارۆ، بە پېچەوانۆ، دڵت گیریانەرە و خوڎا نەخاسە ئەجۊ تازیێما هەنە، ئینە چېشتا
یاسێ هەناسێوش هۆرکېشا و واتش:
بەخوڎا هەیاس واچوو چېش، هەر وېمۆ چی ڕوانە چېوێو کۆتۆ ویرم، خەریکا شێتە بوو. هەیاس تۊ ئانەتە ویرا کە، گرد ساڵێو سەعە شەل بۍ کە لوێ شۆنەو ئۊسا ئۆڕەحمانی دەلاکی و بە هەسەرکېش ئارێش پەی نسارەی، تۊ واچی ئۊسا ئۆرەحمان ئا ساڵە کە قاسم دەسشۆ بەرشی و وەرهەیوانەکەنە وېش فڕەدارە وار، چېوێوش لاو سەعەیۆ درکنابۊ، خۊ من مزانوو بێجگەم من و تۊ و ئۊسا ئۆرەحمانی کەسیتەر چا وەختەنە پی مەسەلێ نەزانێ کە، قاسم ئا ساڵە هەرمانەکۍش پەی نەکریا.
کۊرە یاسێ پەی خاترەو خوڎای ئی خیاڵۍ چېشێنێ کەریشا چی شەوەو زەماوندێنە.
باسوو چېشی کەری، لوە دەمو مێمانەکاتۆ، سەعە یەکجار ئاندە ناپیا نیا، بۍ و دلێ خەڵکیەنە ئا باسیە کەرۊ، تازە ئەریچ چېوێوش زانێ، بۍ خەمە بە، تاکو ئیسە درکنابېش و واتەبېش. یا لائەقەل چەنی وېما باسش کەردەبۍ. خۊ مەلۆ سەرو بانو مزگی گېرۆ و جاڕ دۆ. ئیتر واز چا خیاڵە بۍ مانایا بارە و با سەوای زەماوندەکێ بە وەشی بلۆ وەرۆ.[1]