دیاری شوانەی یام شنگینە یام هاڵەکۊکی
ئی جارە ملمۍ خزمەتو پیاوە عالو ئیمانداری، ئاڎییچ پەی ئەوەڵین جاری دەرەومەڕێنە سەفەرو حەجیش کەردەن.
(حاجی ڕەحمان عەلی مەحموود فەتالی)
وەختێ گەلە کەرۊوە ڕاگاو مامڎێرە پەی گەلەخاناو بەرەو مەڕا کە کەرۊ مانگەو دەی، حاجی ڕەحمان سەفەرو خێری گېرۆ وەرو ملۆ پەی حەجی.
ئا چەرخ و زەمانە پېسە ئیسەی نەبېیەن، نە سۆراخش بېیەن نە هەواڵێ.
وەخت ملۆ هەواریێ ئینێ هەوارو یەرە قڵاوەی و خەبەر مارا: هۆ هەواریا گۊش گېردێ، خەبەرێ وەشا، حاجی ڕەحمان بەگ سەفەرو حەجیوە گېڵانۆ.
ئاوەختە هەنجیری ماتەشا کەوتەبێ، کە کەرۊ مانگەو حەوتی، کە ئی خەبەرە داش ملو هەواریرە، هەوار گرد زوانش وەر بی، هەر یۊ نۆعێرە وەشحاڵ بۍ، بەعزۍ هەواریۍ هەر شەوۍ کەمانجەڕشا کەرد دوێ قولێو وەستێرە دەگا تاکو زوو بەیاوە سەردەمو مەڕو ماڵاتیشاوە، سەعبێ زوو ژەنو زاوڵەکەیچشا بلا، ئەچێنە (سەیژەن ئامۍ) ژەنەو سەی حەسەنی کە کەرۊ کناچۍ حاجی ڕەحمانی، تفاقی خاس پېچۆوە، وڵۆشە کاڵێو پەڕوو سەوېوە هەوەڕێو دوێ کونیشکڵۍ ئاویو، لاکێ حەیوان.
(تاتەماو حەجۆ ئامانۆ، چا ڕوەوەن لوان وەنەوزێ وەشەم نەکەردێنە، ماڵ پەی ئیسەی نەبۊ پەی چېشی)
نیمەش کیاستشا پەی دەگێ پەی یانەو تاتەیشو، نیمەش چەنی وڵۆشە کاڵەکێو تفاقەکەی ئامێ مەڕە، کە هیشتای نما مەنیبی، قازانۍ سوارۍ کەرۊو، وڵۆشە کاڵۍ گریۆ.
سەعبێ هەوار هەرچی ژەن و زاڕۆڵە هەن قەمچو وەزاو لاپلای دەربڵەیرە وەزارە مەڕە.
ئێڎیچە لاڵیۆوە: ڕەحمەتەو خوایتا وەنەبۊ بەیدۍ نان وەردۍ، چوونکە ڕاو کەمانجەڕی لەمەی تێرەش گەرەکەنە، ئانۍ چېرنە گېڵێنێوە، ئانێچ سەررە ئێنێ، لادێنێ نان وەرێنێ.
واچېشا پەنە توخوڎا ژەنا لوایدێ لاش شانەیش ماچ کەردێ جیای من، تاکو لاش چۆڵبۊنەو بلو خزمەتش، من چۆڵ نەبۊ تاسێم مەمەڕیۊ چەنیش.
وەختێ وەستێرە دەگا هانە گەورەو گۆلەکۍ یۊ تەر نەدارێ، ژەنی چانێ بۍ یەرێ زاوڵێش پەنە بێنێ.
حەجۆ ئامانۆ!
دەسش دان بەیتوڵاوە.
بەشیکیم دەسێ موبارەک بارۆ سەرەو ئی زاڕۆڵارەو عەمر درېژېو ساڵحێ با، بەش ئینە خوڎان تەبەڕکیچش ئاردەبۆ بەسمێ قۆڵو ملشارە تاکو خوڎا جە بەڵای ناگەهانی لاشا بڎۆ.
یانە جمەش ئێ، یۊ لوێ یانە دە زیێنېرە، بە هەزار حاڵۍ یاوێنېش لاو خێرامایش کەرېنۍ، ئاڎیچ ئازا ئازا، واچۍ بە خېزانیش، چیو دە پا زارۆڵا، با عەمر درێژێ با.
وەخت خەریکا نیمەڕۆبۊ ماچۊ:
هەواریا کەس نەلۆوە، تاکو نان نەوەرۋ، ئاڎیچێچ ماچا قوربان نانما واردەن، سەی ژەن ئامێ کناچېت مەڕە وڵۆشە کاڵێش نیێبێ سەرو پەڕەش کەردێبێ وڵمە گۊشتێ، لاڵیېوە خەڵکی لادەیدێ، نان وەردێ.
حاجی ڕەحمانیچ ماچۊ: ئاففەرین ژەن، من حەجم کەردو سەی ژەن ئامۍ گرەوش بەردۆ.
هەزار ڕەحمەتێ قەبرەت ئەی پیا نورانیەکەو دەگێ.
عفان دەرەمەڕی.[1]