پەی موحەمەد مستەفازادەی
نویستەی: #ئومێد حەبیبی#
بەرز پېسەو وېت و شاکار پېسەو شاهۆی شا هۆبەی
پەی ساڵڕۆ ئاسمانی بېیەی ویرمەندوو گەورەو هۆرامانی موحەمەد مستەفازادە
حەیبەتیێ درۆ دەلەسانە
وېت شارانتەوە تاکو ڕاسی
لاشانە نما نەشۆ و خەڵک ئەجۊشا تۊ مەرڎەنی!
گوا تۆچ مری؟
بەشێو جە شێعرۆ وېت شارانتەوە کتېبوو شارۆ ڕۊشنایی، ئۆمید حەبیبی (1391)پەی یاڎوو مۆحەمەد موستەفازادەی.
ۋېیەرڎەو هەر نەتەوێویەنە بڕېو گەشاوەزێ هەنێ کە ویەرینوو وەڵاتیشا منویساوە و ئی جارە بە ژیری فرەتەر جە وەڵیناشا هەرچن ئاوەختە ئاڎێ قسێ کەرا و منویسا فرەو خەڵکی مەیاڤۆشانە تاخایت دژایەتیچشا کەران، وەراوەرشاوە مدرا و بە لاڎەر، تێکدەر و چڤۆ دەسو ئیڎی و ئەوی منیاشارە تاکو هەروەرەنە ڕۊزگار ملۆ ڤەرەڤە ئیجا مزانا پنە ئا کۆفڕکانێ گۆترەیە بېیېنە، ئا چنگەوپڕچێ بۍ کەڵکە بېیېنە و ئا لاسامێ بێجگە سامڵسایی ویری هیچش چنە نەبېیەن! پەی زوان و فەرهەنگوو هۆرامانیچ، ئەوەژیونای وزیڼەوە کەرڎەیش پا تەشک و دیامانە کە واچیا کۆفڕکانێ کریا و بە وەشحاڵیەوە دەسێشا کەوتێ لاشارە و قۆناغەو ئەوەژیوای دەسش پنە کەرڎ. دلێڕاسەو دەهەو هەشتای ڕۊجیاریەنە ئېمە بەپاو ئا خەفەتا کە پەی نەفەوتیای زوانی هۆرامی بێنێما قۆڵێ هەرماناما هۆرکەرڎێ و دەسما کەرڎ بە خۆڵقنای نەسرێ ئارۊیانێ تاکو وەرەڕاو لافاڤوو ئەوەتاویای زوانەکەیما وەرپەنگیوی گولالە بیمێ. سەرتەڵوو پەلەکێ و کەسېو کە هازیش، ویرش تەنانەت گېیانیچش پېشکەشو ڕاوە بەرڎەی هەرمانەکێ کەرڎ مۆحەمەد مۆستەفازادە بێ. نویسەرێو کە ئامیانوو نویستەکاش ئەڤینداری وەڵاتی و زوانی بێ، کەسېو کە خاس یاوابێنە فەلسەفەو ژیوای و چەنیبیەی وەرگیری جە ئا وەرێژا کە دلێبەرەو ترۆقوو زوانی هۆرامیشا قۆرخ کەرڎەبێ.
چن ئۊسایانە پێوەزوو زوانی و ژیوەنی بەشەری شی کەرېوە، ۋاچۍ ڕوێو گرڎکەس میاڤۆنە کە زوان کۊڵەکۆ ژیوایا و بۍ ئاڎی کێبېیەی ئێنسانیچ ملۆ بەینەنە. بەداخەوە فرە زوو لوا تاکو واچمێش پنە ئینە ئا نزانیە بۍ ئاوەختە کە بنەڕاو ڕاکێوە بێنمێ و هەڵای تووڵەڕایوە تەسکە و تەنگەلا کریایبێرە و سەرەوەختوو مانیاییمانە کلکەش پەی کېشینیەرە. ئینە ئا ڕۊنە کە فرەو ئا کەسا ئیسە بە شانازیەوە بە هۆرامی زوانو ئەڎاو وېشا منویسا ئاوەختە دژایەتیما کەرېنێ و ۋاچېنێ ئاژاولە وەشکەرۍ و..واچینی ڕوێو میاڤانە و گېڵاوە، بەداخەوە ئاڎێ گېڵایوە، فرەو خەڵکی یاواینە، دژمەنێچ بەزیای و ئازیزم تۊ لوای و نامایوە. هەرچن بەرویرەکێت ڕا نیشاندەرێنێ و جوانە نەبەزەکێ شاقسەکێت واوەی کەراوە و ماچا:
بنویسمێ بە زوانی هۆرامی، بوانمێوە بە زوانی هۆرامی کە ئاڵاو قەڵەمی نەبڕیەینە باڵاو هیچ نەتەوێویەرە.
یاڎت هەر مان ئازیز گېیان[1]