خەیاتێ ناۋینا
ئی پیا هۆرامیە نورانیە و شیرین کەلامە جە شارو (پاوە)ی ئاماڼە دنیا، جە حەوت ساڵیۆ بېیەن بە خەیاتو پێسۆ وېش ماچۊ جە (22) ساڵیۆ کۊر بېیەن، بەڵام ئی پیا عال و نوورانیە کۊڵەش نەڎێنە و بەردەوام چنی هەرمانەکېش بېیەن شەریکو ژیوایش و ئیسەیچ عومرش (82) ساڵێن و هەڵای بەردەواما جە هەرمانۆ خیاتی.
جە دێر زەمانۆ قسێوە هەنە، کە هەر کەسېۋو جە هەرمان و کارو وېشەنە، ئەر سەلێقێوە پۆختەو زەریفش بیێ، خاسش پنە ۋاچېنێ، پێ نموونەی بە ناۋیناکا ۋاچېنێ زێنشا ڕۊشنا، یا ئەر هەرمانێوێ عالەشا کەردێ جە هەرمانەکێنە ۋاچېنێ سەلێقەش وەش و زەریفا.
پۆختەو شیرین بە ڕۊخسارو هەرمانێکێوە دیار بیێ، ئی کوڵە باسیچە زیاتەر سەرنجم ئی پیا نوورانیە کېشت پێ ئانەیە کە بە زوانو وېما ئەڎایی چېوێو واچو بەشکوم یاگۆ وېش گېرۆ. ئی پیا ژیرو عالو هۆرامانیە ئاردانێ جواب کە واچو نمونۆ ئی پیایە فرێ باو یاگۆ شانازیمانێ، هەرچی واچمێ سەرو ئی پیا عالە هامزوانەیە زیاتەر هۆرگېرۆ، وەرو ئا زەین ڕۊشنیشە کە پێ خەڵکو هۆراماناتی بە تەمامی یاگۆ فەخری و شانازیا، کە پێ ژیوای وېش و یانێ و زارۆڵاشگ، هەشتا و دوێ ساڵێ عومرش بۊ، پا نوعە و بە ئومێڎۆ باسو ژیوا و ژیانو وېش کەرۊ، وەختێو چنەش پەرسا ئی هەرمانێ پێ شمە زەحمەتە نېیەنە؟ جە جوابو سوئالەکێنە، فەرماواش نا فرە ئاسانا. ئی واتۆ پیا خاسەیە دەرسێن پێ فرۆ ئانەیشا کە هیواشا کەمتەرەنە و پەی دوریی مەڎیا، قسۆ ئی لالۊیە جە تەمامو لایەنەکاوە پشتیوانیېوە و پېشنیارێوەن پێ مەعنەوی گرد کەسېوی، کە مشیۊ بنیاڎم هۆڵشبۊ و کۊڵە نەڎۆ چانەیە، کە هەرمانێوە ئەر زەحمەت و مانېیایچشبۊ و فرە زەحمەتەبۆ، مشیۊ بە چەمۍو بڎیەی پەی هەرمانەکێ، لا وېتۆ نەواچی سەختەنە و قورسەش کەری وەرو چەماتۆ، ئایا ئی هەرمانێ ئێ لالۊوە هۆرامیە کەرۊش زەحمەتە نېیەنە، حەتمەن زەحمەتەنە، بەڵام ئانە زۆق و شۆقو دڵیشا پێ هەرمانەکېش و هەرمانکېش لاوە ئاسانە بېیېنە، ئەگینا ئی هەرمانێ ئی لالوە هۆرامیە کەرۊش گردیما مزانمۍکە سەختەنە و پەی ئا عومرو ئاڎیچە نمەگونجیۆ، بەڵام پێسۆ واتم: بنیاڎم خاس و زەریف ویر کەرۊوە، ڕەنگا فرۆ چېوەکا و هەرمانەکا ئاسانێ با.
ئاوێنەی خېیاڵ.[1]