ژەنی کافرە
کوڕېوە ملۆ پەی خارجی شۆنوو یەرێ چوار ساڵارە زەنگ مڎۊوە پەی تاتەیش و ماچۊ: تاتە ئینا چېگەنە ژەنېوە خارجیەم ئارڎێنە، ئەتر مەگېڵدێ پەی ژەنێ پەیم !
تاتەش تۊڕەبۊ وەنەو کوڕەکەیش ماچۊ: دەی جا چەنی کریۆ؟ ئاڎێ کافرێنێ، من مەتاوو جوابوو خەڵکی دەوە، ئی قسێ ڕیکە مەگنۆ! سەباڕۆ تۊ مەیوە خەڵک ماچۊ کوڕو فڵانەکەسی ژەنیش کافرەنە؟ مەواچا وەیوەشا کافرەنە!؟
سەرەیتا نېشنوو دما چن ساڵا تەریوە کوڕەکە چەنی ژەنەکېش مێنێوە وەتەن، تاتە نەوەش و پەککۆتە دلێ یاگێنەبۊ، کوڕە دما چن ڕوا ملۆ شۆنوو هەرمانېرە و ژەنی خارجیە یانەو تاتەیشنە مازۆ جیا، پاسە دیارا ژەنەکێ وەڵاتوو وېشانە پەرەستارە بېیېنە و خاس یاوۆ هەسوورەی نەوشینیرە، دەوا دەرمانش مڎۆ، چەنیش شانۆ، لیباسیش فارۆ، بەرۊش حەمام، تەڕ و وشکش کەرۊ.
وەختەکارێ کوڕە مێوە مڎیۊ تاتەش ژووژ بېیەنۆ و دلێ یاگێنە هۆرئێستەنۆ، ماچۊ: هاااا تاتە ژەنی کافرە چەینەنە؟!!!
تاتەش ماچۊ: ڕۊڵە ئینە کەی کافرەنە، کەم بێئاوەزبە، وەڵڵا ئەڎاو تۊ کافرەنە! تۆخا لوایوە یوەی چینێچ بارە پەی من!
ج_ئەحمەدی.[1]