کورد دلۍ چەرخەکا تاریخینە
بەشۍ: سەڎ و چل و یەرەمە
نویستەی: #هاوڕێ باخەوان#
* تاریخو (05-10-1820ز)ینە ئۆڕەحمان بەگ کوڕو میرو بابانی پېسە بارمتەی کیانیان پەی کرماشانی.
* تاریخو (12-10-1820ز)ینە ئەحمەڎ بەگ کوڕو دوەمو میرو بابانی دلۍ شارو سلێمانینە بە نەوەشی ئاوڵۍ کۊچی دمایینش کەردەن، چا وەختەنە ئا نەوەشییە فرە وەڵا بییەن.
* تاریخو (20-10-1820ز)ینە، مەڵڵا بانگدای مەولانا خالیدی نەقشبەڼی، ئەرەمەرزنو تەریقەتو نەقشبەڼی دلۍ کوردەرسانینە، سلێمانیش جیائاستەن، ئانەیچ بە هۊکارو دوەبەرەیی میانو شېخ مارفی نۆدێ و میرو بابانی و مەولاناخالیدیۆ بییەن.
* تاریخو (21-10-1820ز)ینە میستەر ڕیچ سلێمانی جیامازۊن و ڕوەو شارو هۆلێری مەگنۊڕا.
* تاریخو (26-10-1820ز)ینە میستەر ڕیچ یاوان هۆلێر.
* تاریخو (27-10-1820ز)ینە پلەکۍ گەرمای دلۍ شارو هۆلېرینە ئەپېسنۍ بیېنۍ: دەمژمار پەنجو ساعبی (11) پلۍ سەڎی بییەن، دۋۍ دمانیمەڕۊی (32) پلۍ سەڎی و دەمەو وېرەگای (18) پلۍ سەڎی بییەن.
تاریخو (1821ز): چن تۊمارێ پېوەس پی ساڵ و سەڎەیۆ ئینێ وەردەسەنە:
* ئەچی ساڵېنە میر بەدرخان، دەسەڵاتو میرنشینو جزیرە و هەرېمو بۆتانیش دەسگېرتەن.
* ئەچی ساڵېنە عەبدوڵڵا پاڎشا دیسان بییەنۆ بە میرو بابانی.
* ئەچی ساڵېنە عەبدولخالق بەگ تاتەو میر بەدرخانی کۊچی دمایینش کەردەن.
* تاریخو (05-10-1821ز)ینە گەشتوەر (کلۆدیۆس جیمس ڕیچ) بە نەوەشی ڕشېیایۆ دلۍ شارو شیرازی کۊچی دمایینش کەردەن، هەر ئەچاگە دلۍ زیارەت تەڵانو (جەهان نوما)ینە ئەسپەردە کریان.[1]