هەڵەبجە ڕازێوە ئەوەنەبڕیێ
نویستەی: #نامیق هەورامی#
وەختێ هەڵەبجەشا خنیکنا، مەزانۇ ئاساڵێ وەهارش بۍ یان نا؟ من ساڵنامۆ ژیوایمەنە وەهارێ کەچا، هازۆ ئانەیمە نېیەنە دیسان بە لەتەرۆ ویری وېیەردەی بڕێسوۆ.
هەرچی دمای ئا ڕۆیە ڕوەش دێنە، بەشێوا چا تاڵانېیا کەکۆتەن باخو ژیوای، وەهارێوی شوم و بەڎیۆمن بێ، ژیوای نمو مەرگیش دابێ، هەرلایەرە هەنگامەت نێبیێ مەرگ پېچیێ پەیەکاتەرە، ئاخر گوناو ئېمە چېش بێ؟ مەر ئېمە سەنگما دابێ ئەو میناو فەڵەکی؟
ئیسەیچە کە سوەو ئاڕوا مێوە سەرەمەرە جگە هەناسێوی کاڵی و دۋۍ هەڵسا کەمزیانە چەمام، چېوێ تەرم نیا، ئاخر ئاڕوە مەرگ ئڼە لێرەسەخت بۍ ویاریش نەڎا یاومێ یاگێ لاتەریکە.
ئاڕوە مەرگ و ژیوای شان شانانیشا بۍ بزانا کام متاوۆنە تەنگ پەویتەری هورچنۆ، مەرگ زاڵ بی، زاڵ پامانا قەرەچۆڵو ژیوایش بڕیۊ، تەڕو وشکش پیوەرە کەرد بووڵە، قەڵاخیش دا سەرۆ شارێویەرە و دەسش نېیا بینەو ژیوای.
ئاڕوە، یادروستەر واچو ئاوېرەگا کەگردیما ملەجێڕێ چنی مەرگی کەرېنمێ، لێرەما بۍ پەی ژیوای، بەڵام ناستشا.
هەرگیز ئاهەناسە سەردۆ تاتێمم ویرمەشۆوە کە ماچۊ هورزدێ بابلمێ، یانەو سەروەت داڎما مەدۊ، دماین زەخمو سەرو لاشێشم ویر مەشۆوە، کە بە زامڎاری جیا بېیەیمێ، ئاڕوە گردیما مەردیمێ.
داستانۆ مەردەی و شێویای بنەیانۆ ئېمە پېسە فرەو بنەیانەکا تەرو هەڵەبجەی هەریۆشا یاگێنە دەسش پنەکەردو ئیسەیچ نەبڕیانۆ.
جیابېیەیۆ ئېمە یانە زاتیەکا هەڵەبجەیۆ دەسش پنەکەرد، چاگە بېیەیمێ دوێ وەرێ، وەرێما ڕوەو عەنەبەو ئەوی تەرما ڕوەو عەبابەیلێ، ئانێ عەنەبۍ دمای سەعاتێ گېیانشا ئەسپارا، ئاشەوە کەجیا بېیەیمێ، هەرگیز ویرم مەشۆوە، تڼ باوشیم ئاردە ملو توبێ واڵێمۆ، هەستێ فێلعینم بێ، زانێنێ مەوینوشۆ، دماتەر دیەمۆ، بەڵام بە مەردەی سەرو لاپەڕۆ ڕۊنامیویۆ کە وێنەکەش چاپ کریابێ.
هاموەخت چنی مەردەی توبێ و زاوڵەکاش چیلاوە مەردەی یێخۆ ئېمەیچش وەرنەڎا، ناڵەو ناپاڵمی دنیاش کەردە ڕۊی نیمەڕۆو دڵو ئېمەیچ بەشەوەی تاریکە، کەچەم ڕۊشنش کەرد و ئامایمێ وېمارە، تاتێوی زەخمین و ئەڎاو واڵەی بۍ بینایی و لێڵایی لێڵ، گردیما شەماقیاوەما ئامارە.. ئای چن مەرگېوی بێڕەحم بۍ گەرەکش بۍ ملەچۆچیما وادۆ...!!!!
داستانەو ژیوایە تازەی، بەڵام قەڵب و بێمانا جە ئوردوگاکا ئێرانی، دیسان هەرچی مێوە ویرم پەڕم کەرۊنە جە بېزاری، سەرەتێوە بۍ کەئیتر باوەڕ بەگرد چېوی باری، گرنگ نېیا کێ مەرد، گرنگ ئانەنە قەبرەش بزانی، تەنها کەسېو ئانەشە ئازمون کەردەن مزانۆ چ حاڵەتێوی گول و نەوازیان.
دمای ئاڼە ساڵا سەرو ئی چېوارە کەڕوەشا دا، هەڵای ئی شارە بوەو مەرگیش چنە نەبڕیێنە، نەتاوانش گېڵۆوە ئاڕوا کە ژیوای چېگە چۆپی کېشێ.
هەڵەبجە ئەشېیا ئیسە شارێوی نموونەیی بیێ، بەڵام نموونەن جە لارەملی و بۍ باوانېیەنە.
هەرچی کریاو شی، قسۆ پێوی تەوێڵەیەنە، فرە بەیاگێنە، گرچېو کریاو گردچېو شی، ئېمەی لێرەسەخت مەنیمێ تاکو چن مەرگی ملەجێڕێ کەرمۍ، ئایا تاکەی متاومۍ بەربەرەکانێ کەرمۍ؟
من هەمیشە مەرگی بەگۊرانیێ تارنو، ڕەنگە شاڎەکا کەرو ئاڵا، ئاڵاو ژیوای نەک ئاڵای کۆتەڵ.
چێگۆ دەسو ژیوای گېرو تابەروشۆ هەڵەبجە، سەرو بەرزاییەکا شنروێوە مڎێمێنە هاوارو کەڵام موانمۍ، ئېمە وەرما بەهوردو بېیابانی گېرت، هۆردو مەرگیچ تار منێمێ... ئېمە ئېمەنمێ، ئېمە گۊرانیە نەمرەکاما ماچمۍ.[1]