سڵامێوی گەرم، ڕەخنێوی نەرم
جەنابو دوکتور مۆدەڕڕێس سەعیدی
سڵام و بێقەزایی
ئەچی یەرەچوار ڕۊی وېیەردەنە و هەر پاسه چڼینجارێ‌ تەر، بڕېو ڕەخنێت ئاراستەو لایەنێوی کەردێنێ کە وېشا بە نەتەوە کورد مزانا (لانیکەم ڕواڵەتو چېوەکەی چامنەنە و «نحن نحکم بالظاهر» ئېمە نییەت‌خوانی مەکەرمۍ و فەرزما ڕاس‌واچیشانا) بەڵام بە وینگاو جەنابیتا ڕەفتاری کەلامیشانە و کلید‌واژێشانە و گوفتمانشانە، ئی ئێددیعا وێنا نمەکریۆ و دیارش نېیا و ئینە بە نەزەرۆ شمە (ئەپاسە کە من بەرداشتم کەردەن) هۆرگیرو پارادۆکسێویا و فەرزا سەرو ئی تاقمەیە بەیا وېشا یەکلا کەراوە و ئەچی (شترگاوپلنگ)ینە نەجات‌ بڎا.
بەڵام دوێ ڕەخنێ ڕووبەڕوو ئی خواستو شمە هەنێ، من بە کوڵی ئیشارەشا پەنە کەروو  و شما ڕا بەخیر و ما ڕا به سلامت.
1- یۊ ئینە کە جەنابت پیشفەرزت ئانەنە کە ئی کەسانێ وېشا ئاگاهێشا نېیا سەرو ئی دژوازی و تەناقۆزیە و  ئینسان نمەبۊ و یا نمەتاڤۆ  تەمەنێو دلۍ پارادۆکسینە بژیڤۆ، بەڵام پېچەوانەو ئینتزارو شمه، ئېمە ڕوانە چنها کەیسێ وینمێ کە ژیانشا سەراسەر پارادۆکسیکاڵا؛ ڕەنگا ژیانی شەرقی بە گردینی پاسەش فێرێ کەردێبیمێ کە ئی دژوازییە ئاساییبۊ لامانۆ. ئانە کە جەنابت تەمەنێو دەرست وانان و دانشگانە فێر کریانی و وېت مۆمارەسەو ئانەیتە کەردەن کە پەی باوەڕ یام قبووڵو ئیدېوی لازما صغری - کبری کەری و لۆژیکمەندش کەری، پەی کوڵ‌کەسېوە مەترەح نیا. قەرار نېیا پزشکێ جگەرە نەکېشا (ئەرچی ئینتیزار ئانەنە کە پاسینەبۊ).
2- ئی کەسانێ کە جەنابت وەروو ئانەی بەیا وېشا پېسەو کوردی پێناسە کەرا، مەجبوورەنی دوێ پاراگرافێ تاریفێشا دەی ئیجا ڕەخنێوی مچکلانەشا وەنەگېری، -هەرپاسە کە وېت خاستەر مزانی- وەڵتەر هەمپالەکیێ گۊرانیستا بیېنۍ و ملانە شموولو ئانیشا کە
(من الرواد في عداوت الأکراد) بیېنۍ.
تۆ نەژنېیەنت ماچا: نرود میخ آهنین در سنگ؟
ئێحتماڵەن فەرماودێ پاسه نېیا و هەر ئی تاقمە زەمانێو بۍ چنی گۊرانەکا دوژمەنی مۆشتەرەکشا کورد بۍ، بەڵام ئیسە وېشا ماچا کوردێنمێ. کاکە ئی کورد بېیەیە من نامېم نیان (کورد بېیەی یەواشڵانە) و (کوردهای یواشکی).  ئی تاقمه گرفتێ پارادۆکسیکاڵێشا هەنێ. تاکو یەرێ چوار ساڵێ هامکردەوێ بڕېو کەسا بیېنۍ و مەقادیرێوی فرە قسێشا کەردێنێ ئیسە یەکدەفعه نمەتاوا چېروو ئی باریەنە شانە هاڵی کەرا. ڕەنگا ئەر مەجالی فرەتەرشا بد٘یۆ پەنە پتاوا وېشا جە ئی وەزعیەتو (شترگاوپلنگ)ییە نەجات بد٘ا و گېڵاوە سەرو ئەسڵی وەڵینیشا، کە باوەڕشا پاسینەبۍ گوایە هۆرامی میللەتا و وەڵێ میلادو مەسیحی تاکو ئیسە سۆرانیێ ئینای شۆنۆ پاکتاو کەردەی ڕەگەزی و زوانیشاوە (چوون خەلەفو یۆچا سۆرانیاو وەڵی میلادو مەسێحیە قەڕنۆ ویس و یەکیەنە واتەنش هۆرامی فڵتەفڵتا).
خەریکەنی هەزینەی فرە جە ئابڕوو و ئێعتباروو وېت منیایمنیەی پەی ئینیشا.
چن ڕوێ و بە چن جۊرێ جیاوازێ نەک هەر جەنابتا، بڕېوتەر برادەرێ، ماچا واچدێ ڕانویسی کوردی، بەڵام ئاد٘ێ هەر وازنمارا. دەی کاکە خۊ شوناس زۊری مەبۊ، چی مشۊ لاڵیەیمێشا وەنە پەی ئانەیە جۊرێو قسێ کەرا نموودی کوردی وېشا برمانا؟!!! ئەر ویستو وېشا ئانەبۊ لازم نېیا من و تۊ ساحب و ۋېرەگا یاداوەریشا پەی کەرمۍ.
قەرار نېیا منەتەشا کېشمێ پەی ئانەیە کوردێ بانێ.[1]