ئیعلامی کۆن و ئێستا
نووسینی: #شێرزاد شێخانی#
لەو سەردەIمانەدا، تەبعەن دیسان مەخسەدم سارانی پەنجا و شێست و حەفتایەکانە، لە هەموو عێراقدا یەک ئیزاعە و یەک تەلەفزیۆن هەبوو ئەویش لە بەغدا بوو، ئێستا بەس لە گەڕەکی #عەنکاوە# دا 28 ڕادیۆ و 16 تەلەفزیۆن هەیە.. ئەوجا ئەو ئیزاعەی بەغدایەش دەورەکی زۆر گەورەی هەبوو لەسیاسەتدا، وەکی ئێستا نەبوو هەموو ڕادیۆ و تەلەفزیۆنی کوردستان باسی گەندەڵی و ڕوبعە مووچەی بکەن حکوومەتیش تەقەی سەری بێ!. ئەو کاتی ئیزاعە زۆر موهیم بوو بەخسوسی لە گۆڕینی نیزامی حوکم. چار پێنج زابت و عەریف و نائیب عەریف لەناو خۆیان ڕێکدەکەتن و بەمودەرەعەیەک دەچونە سەر ئیزاعەی بەغدا و داگیریان دەکرد و بەیانی ڕەقەم یەکیان تێدا دەخیندەوە و ئینقلابی خۆیان ڕادەگەیاند! بەیانی دووەمیشیان قەراری ئیعدامکردنی هەرچی وەزیر و گزیر و کاربەدەستی پێش خۆیان بوو!. ئێستا ئەگەر بمانەوێ ئینقلاب بەسەر ئەو حوکمەتە گەندەڵەیدا بکەین نازانین کێهان ئیزاعە و تەلەفزیۆن بگرین، چونکی ئەگەر تەلەفزیۆنی ڕووداو بگرین کەناڵی بیست و چار دێتە مەیدان، ڕادیۆی دەنگی کوردستان بگرین، ڕادیۆی لقی دوو دێتە دەنگ، ئیشەکە وا زەحمەت بووە پیاو ناتانی دوو سێ ئینقلابیش بکا بەشک و ئەو سیستەمی پاشەکەفتە بگۆڕی.
ما عەلینا، با بێمەوە سەر مەوزوعی ئیعلامی ئەو سەردەمە. لە سینەماکان وەختی خۆی پێش دەستپێکردنی فلیمەکان هەندەک دیعایە دەکرا لۆ حکوومەت، ئەو زەمان حزبی #بەعس# تازە هاتبووە سەر حوکم و ئەحمەد حەسەن بەکر ڕەئیسی جمهوری بوو.. ئەوجا لەگەر دەستپێکردنی فلیمەکان هەندەک دیعایە پیشان دەدران، وەکی ئەوەی بەکر مەکتەبەکی کردیتەوە یان سەردانی فڵانە پڕۆژەی کردیە، ئەوجا لەگەر دەرکەتنی بەکر دەبایە ئەوانەی چونە سینەما لۆ دیتنی داراسینغ و هەرقەل و فەرید ئەترەش هەستنە سەرپێ و چەپرە لۆ بەکر ئەفەندى لێدەن!.
ئەوجا نوکتەیەک هەیە دەرێ ڕۆژەکیان ئەحمەد حەسەن بەکر خۆی گۆڕی بوو بەدزی هاتبووە ناو بازاڕ و گۆتی بابزانم وەزعی میللەتەکەم کوە و کوو نییە. کە دێتە بازاڕ دەچتە سینەما و دادەنیشی. کە فلیم دەست پێدەکا دیعایەی ئەحمەد حەسەن بەکر دێتە سەر شاشە و خەرکی دەست دەکەن بە چەپرە لێدان بەکر هیچ ناکا، لە تەنیشتییەوە کابرایەک نوقورچەکی لێدەدا و دەرێ کوڕی کەر چەپرە لێدە ئەگینا دەتبەنە دائیرەی ئەمن خازوقت تێ دەبڕن؟!. ئاخر ئەو کاتی ڕادیۆ و تەلەفزیۆن و جەریدەش هەمووی دیعایە بوو لۆ بەکر و سەدامى..
لە سارانی هەشتاکانیشدا کە زەمانی شەڕی عێراق و ئێران بوو، یەک تەلەفزیۆن هەبوو ئەویش سەدام داگیری کردبوو بە ئامان و زەمان بەجێی نەدەهێشت، بەناوی مەراسیمی نۆتی شەجاعە ڕۆژانە چار پێنج سەعات شاشەی بەرنەدەدا، کە دەبووە سەعات دوازدەی شەو موزیعەکە دەهات و دەیگۆت (الی هنا تنتهی برامجنا شەوتان شاد)!. لۆ سبەینیش عەینەن تاسو عەینەن حەمام!.
ئەو زەمان بەس دەوڵەت ئیعلامی هەبوو وەکی جەریدە و ڕادیۆ و تەلەفزیۆن، ئێستاکێ حەمەی کوڕم و سەعەی کوڕی فەتاح بەقار و شاگردی چایخانەکانیش هەموویان وەسائیلی ئیعلامیان هەیە، خۆیان خاوەن ئیمتیازی جەریدە و مودیری تەلەفزیۆن و موزیعی ڕادیۆ و موخریجی ئەفلام و هەموو شتەک بەخۆیانن بەو فەیسبووکەوە. دەتانن وەکی جەریدە چییان بوێ لەسەر لاپەڕەی خۆیان بینووسن و براوی بکەنەوە، ڕای خۆیان لەسەر کێشەی کۆریا و ئەمریکاش دەرببڕن.. ئەگەر حەزیان کرد خیتابی سیاسیش بدەن لایفەکە دەکەنەوە و بەسەعات قسە دەکەن و کەس نارێ لەسەرچاوت دوو برۆیە، ڕەخنەی توندیش لە حکوومەت دەگرن. ئەوەش ماروێرانییە لۆ حکوومەت چونکە نازانی بەکێ ڕابگا و قۆڵبەستی بکا و بیباتە حەپسخانەکانی محەتە، ئاخر وەکی دەرێن دونیا دەوران دەورانە بەگم.[1]
باقی وەلسەلام...
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!