ئاسکێوە دلیٛو تەویلەو هەرانە
هورگیٛڵنای: #ئیبراهیم میکە عەلی#
بەشی یەکەمە
ئیجارە یوە جە وەشتەرین داستانە وەشەکا مەسنەوی مەعنەویتا پەی گیٛڵنمیٛوە هەکە پەڕەنە ئیٛش و ئازارێوە هەکە دمای گوزەرنای چندەها سەدا هەڵای متاووٛ سەرو بنیاڎمە هامچەرخەکا ئی سەردەمیچۆ کاریگەریش بوٛ و ئیٛمەیچ متاومیٛ پەند و موٛچیارییٛ فریٛش چەنە هورگیٛرمیٛ.
بیٛ... بیٛ، ئاسکێوە بیٛ... ڕوێوە ڕاوچیێوە کەشۆ ئاسکێوەش گیٛرتە، ویٛرەگا گیٛڵاوە و ئاسکەکیٛش ئاردۆ یانە چەنی ویٛش، دیش یانەکەشەنە هیچ واردێوەش نیا، ئەوەڵۆ نیازش کەرد ئاسکەکیٛ سەرەبڕوٛنە و بریٛژنوٛش و بوەروٛش، وەلێم دڵش ناما سەرەش بڕوٛ.
ئاسکەکیٛش گیٛرتە باوشیشۆ و بەردەش پەی مەیڎانو شاری، چنڎ کەسێوە هەڵای چاگە بیٛنیٛ.
ڕاوچیەکەی وات: ئی ئاسکیٛ ورەشای ورەشوو کیٛ مشتەرین با بێ وەرۆ.
- داواو چنڎیش وەنەکەری؟
+ ئی ئاسکە زەریف و مەکینیٛ لاو کەمیۆ پەنجا تمەنیٛ میٛژوٛ وەلێم وەرو ئانەی من ئیسە مەنەنارە پەی زەڕی مڎەوش بە دە تمەنیٛ.
وەختێ زاناشا ڕاوچیەکە مەنەنەرە پەی زەڕی، یووٛیشا وات: من بە دویٛ تمەنیٛ مسانوونەش.
یوٛتەریشا وات: من یەریٛ تمەنیٛش مڎەو پەنە.
یوٛیچ چوو دوورۆ ئاماوە جواب و واتش: من چوار تمەنیٛش مڎەو.
کابرێوە تەریچ هەکە ئاسکەکیٛ چەقێبیٛ دڵشۆ و زەڕیچش پەنەبیٛ ئاما وەرۆ و واتش: من پەنج تمەنیٛش مڎەوپەنە، هیچکەس پی نیمەشەوە چانەی فرەتەر نمەڎوٛ پا ئاسکیٛ، چی مەگەر ئا ئاسکە لاتیٛ چنڎ گوٛشتش پۆن!.
ڕاوچییەکە قسیٛ ئا کابرایشە لاوە گولە بیە و واتش: جا کیٛ ئاسکە پەی گوٛشتی مسانوٛ؟ ئاسکیشا ئاسکی واتیٛنە، خوٛ گوٛرەکە نیا.
کابرای وات: هەرچی بوٛ، لاو ئیٛمۆ پەنج تمەنیٛ زیاتەر مەئیٛژوٛ.
ڕاوچی بە ناچاریی ئاسکەکیٛش ورەتە.
کابرای بسان ئاسکەکیٛش دەسۆ گیٛرت و بەردەشۆ پەی یانەو ویٛش و کەردەش دلیٛ تەویلەو یانەکەیش هەکە چنڎ هەرێوەیچش بیٛنیٛ و دلیٛ ئا تەویلەینە بیٛنیٛ.
ئاسکەکیٛ لوا دلیٛ تەویلەکەی، سەرەش سڕ مەن جە تەویلەکەی و وەرو ویٛشەرە واتش: واییی چنڎ یاگێوە گولە و سامناکەنە.
تەویلەکە چنڎ ئاخوڕێوەش چەنە بیٛنیٛ و هەر ئاخوڕێوەشانە بڕێ سمەری کریێبیٛنیٛرە و یوٛ چنگێ یەویٛچ شنێبیٛنیٛ سەرو سمەرەکارە، دلیٛڕاسەو تەویلەکەیچەنە دوٛڵچێ نرییابیٛرە ئاویش چەنەبیٛ و سەرو ئاوەکیٛ پەڕ بیٛ پوش و پل، بوەو سەرتەقولا و پەینی و هەوای خەفەبیەی تەویلەکەش ماسنابیٛ و بەرەکەیچش وزیابیٛرە.
هەڵای ویرو ئانەینە بیٛ چیٛش کەروٛ و چیٛش نەکەروٛ، هەرەکیٛ گرد دییٛنیٛش پوٛرە و دییٛنیٛوە یوٛترینیرە و قەپوٛسە ئاریٛنیٛ هەنترینیرە و بزێوە کەریٛنیٛ پەی یوٛترینی.
یوٛ جە هەرەکا ڕووەش کەردە ئاسکەکیٛ و پەرساش: توٛ کیٛنیٛ و کوٛگەیەنی؟
ئاسکەکیٛ وات: منیچ یوەنا جە دروسکریایەکا خوڎای و نامیٛم ئاسکینە، پا کەش و کوۆ مژیوو، کابرێوە گیٛرتا و ئارداش و ورەتاش بە ساحیبەکەیتا و ئاڎیچ ئاردا کەرداش لاو شمە.
هەرەکا وات: ئێ فرە خاسا، هەرچی هەنی فەرماوە بوٛ دلیٛما و ئیٛگە یاگێوە وەشەنە، بڎیە دوٛڵچەکە پەڕا ئاوی و ئاخوڕەکیٛ پەڕیٛنیٛ سمەری، تا سەحبێ کەس بەرەما وەنە مەکەروٛوە و کەس مەواچوٛ چیٛش کەردیٛ و چیٛش مەکەردیٛ، تویچ میٛمانەو ئیٛمەنی، بوٛ حەزت جە هەرچی هەن تیٛر وەرە و کوٛگەیچت پەنە وەشا چاگە بوسە پەی ویٛت، تەنیا ئانڎە وریابە نەبی چیٛرو پەیا ئیٛمۆ.
ئاسکەکیٛ وات: فرە سپاستا کەروو، تازە هەرجوٛر بوٛ ئامێنا دلیٛتا، وەلێم من نمەتاوو ئا ئاو و سمەریە بوەرو هەکە شمە موەردیٛشا، شمە فەرماودیٛ خجڵیٛ هەرمانەو ویٛتا بیدیٛ و منیچ چی کەنارۆ ستار گیٛروو پەی ویٛم.
هەرەکیٛ خجڵیٛ ئاڵفواردەی بیٛنیٛ و چی ئاخوڕۆ لویٛنیٛ پەی ئەو ئاخوڕیٛ و بوٛقیٛ نییٛنیٛ یوترینیۆ و تەویلەکەرە ئیٛنیٛ و لویٛنیٛ و جوتلیٛ دیٛنیٛ ئەو یوٛترینی و تەویلەکەشا پەڕکەرد تەپ و توٛز.
ئاسکەکیٛ فرە تەرسا و چەنی هوٛمەرەمزەکیٛ ئاڎیشا ئاڎیچە چی کونجۆ لویٛ ئەو کونج و ڕەمیٛ و ویٛش لادیٛ جە دەس و پاو هەرەکا، تاوەو تەرسای و بویٛ گولیٛ و هەوای خەفەبیەی و خرتەبوڵو تەویلەکەینە خجڵبیٛ خنیکیوٛ.
هەرەکیٛچ جار جار لاچەمێوەش پەی وزیٛنیٛ و دییٛنیٛ هەنترینیرە و بەینو ویٛشانە خویٛنیٛ و بە پرمێوە تەشقەڵە ئامیٛزۆ واچیٛنیٛ: ئاسکێوە نازارەنە.
گیانەوەرێوە عەجایبەنە، قاچیٛش ئەجوٛ سەبیلا، کورە بڎیە پەی شاخاش، بڎیە ئا چەمە زەریفا، هیچش نە بنیاڎمەکا و نە هەرەکا نمەشوٛ، سەیرا نە قسیٛ کەروٛ و نە هیچ موەروٛ، هەر ئی کونج پەی ئەو کونجی ڕەموٛ و جە ئیٛمە تەرسوٛ، ئەجوٛش ئیٛمە وەحشییٛنمیٛ و موەرایشموەرمیٛ ئی قسا کەریٛنیٛ و گرد جارێنە پیٛوە خویٛنیٛ. [1]