زەرێ و فەخری ڕازی
بەشەی پەنجەمە
بۆ با ئیسە کەس نېیەن بەرمێش پەی دوکتری. کتووپڕ برا ویکلەکەو زەرێ عەلی ڕەزا کە دواڼزە ساڵېش بې بە قێڕە قێڕ ئاما ملەرە. نەڕە نەڕ نەڕناش و واتش: گەرکتانەن ئی بې‌ئابڕوێ بەرڎې پەی دوکتری؟ ئینە قەسەمم بۊ ئەر بەیدې و ئی کاریە کەرڎې وېم لەمەم دڕیێنە.
ئەڎایم وات: ئێتر تۊ گۆڕەت گم کەرە کەم غەڵتێ کەرە. واتش: خاسەن حەر ئیسە ملو شۊنی عەباسی و مارووش. یانەنە زیارە و بەرشی. ئا ڕویچە کەس زەرێش نەبەردە دوکتر. دوێ مانگێتەر چی قەزیێ ۋېیەرد. دەنگە دەنگشا کەم بېیەبێوە. عەباس زەرێش وسێبێ چیرزەمین و حەر چاگەنە کوشێش. ڕوێوشا سەر وېرەگانێوە سڵتانە قیژناش و واتش: هەی هاواروو داڎ بېیاودێ کناچەکێم مەردە. ژەنی ڕەمای، ئەڎایم وات ئاخرش کوشتەشا. گرڎ لوای چیرزەمین منیچ شۊنیشارە لوانی. زەرێ بې‌هەناسه ڕمیایبێ، لەڕ و لاوازە، بەڵام لەمەی زلە.
عەباس ئاما نەڕناش و واتش: ئی گرم و قاڵە چېشەن، پەی چێ شلۆقتا کەرڎەن؟ گیرام زەرێچ مەردە، مەردە بەتوون. کتووپڕ ماما زێنەبە ئەڎا گەورێ ئەڎایش ئاما ملەرە. نزیک بە هەشتا ساڵاش بې، شېرە ژەنانە مدرا و چوار شەپڵاخێ سفت و سۆڵێش کېشتێ بنا ملو عەباسیرە. واتش: ئەحمەقی گەوج من چوار مانگێ چیوەڵی واتم ئی کناچې زاوڕو نېیەن لەمەشەنە بەرڎېش پەی دوکتری. شمەی گەوج و یابوو هیچ نەبەرڎېنەتا دوکتر تازە داینایچتا وەرو شەق و لەقی و ئازاریچتا داینە. ماما گەورێ واتش: ئینە ئێتر چی لەمېوەنە شۊنی دوانزە مانگارە هەڵای زاڕوڵەش بە دنیا نامان؟
تۆوی ناحەز و لەم هۆڕ چەنی ئا لالوە خوێڕیاتە نمازدێ ئی کناچە هەژارێ بەرا دوکتر بزانا دەردەش چېشەنە؟
قاڵشا وستەرە زەرێ مەردێنە، پیا هامساکەیچشا پی قاڵە وېشا یاونارە چیرزەمین.
ماما زێنەبە چارشێوەکېش بینا دەوروو قەڎەو وېشەرە و بە پیاکا واتش: وەرو ئی کەلە هەرانە گېردێ با ئی کناچې بەرمێ پەی نەوەشخانەی.
ماما زێنەبې وات ئاغە ئەحمەڎی هامسایشا، گېیانەکەم بلۆ پاسەوانێ بارە. پی حەڎە عەباس گەرەکش بې دەم کەرۊوە مەعسێ ژەنەو قاسمی بە تا پاڵایە کېشاش سەرەشەرە و واتش: تۊ بې‌دەنگ بە گېل و گەوج.
ژەنەکا کومەکشا کەرد زەرێشا پېسەو مەردەی جە چیرزەمینەنە کېشا بەر و ئاوردەشا دلې حەوشێ. ڕەجەبی هامساشا ماشینش وست ڕا و ماما زێنەبەی هەشتا ساڵې زرەنگانە زەرێش بەردە پەی نەوەشخانەو هەراتی. معاینەشا کەرڎە و کرژ بەردەشا پەی نەشتەرگەری چاگەنە وەرهەمێوە (غدە) نۆ کیلو و نیمیشا دلې لەمشەنە بەر ئاورد. من وېم لوانی و بە چەماو وېم دیم وستەبېشا دلې شیشېوە گۆرەی و نیابېشارە.
زەرێ نزیک بە چل ڕوا نەوشخانە وسناشا تا حاڵش ئاماوە سەرو وېش و نەختێو خاسە بېیە. چا بەینە من نزیک بە حەفت تا هەشت کەڕەتا لوانی و سەرم داوەنە و هەواڵپەرسیم کەرڎە. جارێوشا دەسش گېرتانی و واتش: خەڵک جە بارەو منوە چېش ماچۊ؟
واتم سەکینە خانمە کە داواو تۊش کەرڎە پەی کوڕەکەیش و جوابت کەرڎە جە گرڎی فرەتەر خراوەت واچې. ئیسە ئاڎەیچ عەزاب ویژدانی گېرتێنە و دایېمە مەلاڵیۊوە خوڎای بەخشۆش. وەرهەمەکەو زەرێ نریابێرە و ژەنی مەحەلێ یۊ بە یۊ لوێنێ تەماشاش کەرېنێ. زەرێ شۊنی چل ڕوارە ئاماوە پەی یانەی.
منیچ وردە وردە گۆرە بېیانی و پام نېیا دلې دوانزە ساڵا، زەرێچ شانزە ساڵېش بې.
گجار لوێنێ پەی لاو زەرێ و پەی دەرسەکام یاردەیم دێ. زەرێچ واچې حسەین گېیان حەر پەرسېوە جە حافێزی و سەعدی و فەخری ڕازیت بېیە ماچووت، تۊویچ حەساوم پەنە واچە و فێرەم کەرە.
من پلەو پەنجۆمی بېنێ و بە زەرێ دەرسوو حەساوی واچېنا. ماواو دوێ مانگانە ئاڎە کاریەش پەنە ئاما بېیە مامۊساو من. حەساو هێندسە و گرڎیم پەنە واچې.
زەرێ گەرەکش بې پەی بڕوانامەو کەلاس ششی نامې بنوویسۆ و ئازموونش چەنە گېرا یانەنە بوانۆ.
دیسان شەڕ دەسش پەنە کەردوە. عەباس ئاژاولێ کەرې و عەلی ڕەزایچ گۆرە بېیەبێ ئیدعاو براگەری کەرې.
تاقە دوێ ڕوێ موڵەتوو نامنویسیش مەنە بې، زەرێچ هەڵای نامېش نەنویستېبێ و حەساوی حاڵش گیریا بې و سەرش وەنە شێویا بې.
شەریفی_بېساران.[1]