گفتوگۆی قانع و مەهابادی کچی شێخ لەتیف؛ کە لە ڕێگەی مەکتەب تووشی بووە

کۆرپەی نازەنین! گوڵ‌خونچەی بەهار!
وەنەوشەی چیمەن، شەوبۆی لانزار!
بێچووەئاسکەکەی سارای کوردستان
سەرتەقەکێشی پۆلی چاومەستان
دایکی دواڕۆژ، نازاری باوان
لە خوا ئەخوازم دوور بی لە چاوان
ئۆغرت بەخێر، خەیاڵت کوێیە؟
دیارە کەرەسەی خوێندنت پێیە
کێژۆڵەی نازار، گوڵ‌خونچەی سەر چڵ
گڵۆپی نیشتمان، ڕوومەت تۆپی گوڵ
ڕاستم پێ بێژە کە تۆ کچی کێی؟
لە کام شار، کام دێی؟ لە کام ماڵ، کام جێی؟
وەڵامی مەهاباد
مامۆستای دڵسۆز! شاعیری کوڵۆڵ!
وێڵی بیابان، هەردەی چۆڵ و هۆڵ
نەوەی شێخ مەحموود، کچ شێخ لەتیفم
خزمەتگوزاری جنسی زەریفم
باوکم لە ڕەگەز ئەحمەدی کاکە
کە بۆ دینداری، لە گێتی تاکە
دایکم لە خانان سەرحەدنشینە
بەگزادەی بانە، ئیختیاردینە
مێژوو شاهیدە ئیختیاردینی
دووهەزار ساڵە وانە ئەیبینی
گاگا سەربەخۆ ئەژیان لە نیشتمان
گاگا ئەکەوتنە ژێر دەس فارسەکان
تایەفەی باوکم مەشهووری شارن
هەتا پێغەمبەر لە عام دیارن
ناوم مەهاباد پۆلی یەکەمم
بۆ خۆم و هۆزم دڵ پڕ لە خەمم
بۆ خۆیندن ئەچم بۆ قوتابخانە
بۆم بەیان کردی زۆر چاک بزانە
وەڵامی قانع
بۆچی کیژۆڵە، ئێوەیش ئەخوێنن!؟
بۆ پێشکەوتنتان غیرەت ئەنوێنن!؟
وەڵامی مەهاباد
بەڵێ مامۆستا، زۆر چاک ئەخوێنین
ڕیشەی نەزانی لە پنج دەردێنین
خوێندن بۆ کچان فەرزی تەواوە
چونکوو کچ دایک کوڕانی لاوە
لە کۆش ئێمەدا کوڕان پێئەگەن
خزمەتی گەل و نیشتمان ئەکەن
گەر ئێمە خۆمان نەخوێندەوار بین
وەک ژنانی زوو کز و بیمار بین
کوڕمان کە زل بوون بێ‌عەقڵ و فامن
چونکە پەروەردەی دەستی عەوامن
هەر دایکێ کە خۆی چاک خوێندەوارە
ئەڵبەت کوڕەکەی زرنگ و هۆشیارە
گەر دایکەکانمان خوێندەوار ئەبوون
ئەولادەکانیان وا هەژار ئەبوون!؟
مەعلووم هەر کوڕێک بە جنۆکە و دێو
بە هاڵ و شەوە و شەولەبان و خێو
پەروەردە بکرێت قەت بە هیچ نابێ
هەتا قیامەت ئەبێ هەر وا بێ
بێ‌شک هەر دایکێ کە خۆی زانایە
کوڕێکی زانا دێنێتە کایە
بە شیری ڕاستی بەخێوی ئەکا
بۆ فیداکاریی گەل هانی ئەدا
وەتەن نافرۆشێ بە فلس و دینار
هەڵنامژێ خوێنی فەقیر و هەژار
مامۆستا! ئێمە لە دەس دەرچووین
لە خەفەت نیشتمان تەواو مردووین
خزمەت نیشتمان لە سەر ژن و پیاو
هیچ فەرقی نییە وەکوو یەک تەواو
بە تۆفیقی خوا، چینی دوایی
نیشتمان دەردێنن لە ژێر ڕیسوایی
نایەڵین هەرگیز ببن بە جاسووس
بە پارەی دوژمن بفرۆشن نامووس
ئەیاندەین بە کوشت لەسەر حەقی گەل
تا هەوارگەیان ئەبەنە سەر کەل
گەر ئێستە کوڕان خایەنی هۆز بن
خەتای دایکیانە، دەک ئەولاتر چن

هۆزانەوان: #قانع#
دیوان: #دەشتی گەرمیان#
[1]