چڵەدارێ بەردەبېنېوە، پېسە کەسێ کە ئازارەو (فێ)ش پەنە بۊنە
پېسە وېما پەنەش ماچمې:ئیپیلیپسیepilepsy-صرع.چەمېم واقوو گزیە زەڕاتینە بییێبېنې. بې ئێختیار و بېنەوا. دڵوو وېمەنە واچینێ: داخۆم ئینە چېشەن؟ئسنەنا و پاسەم سەرئامان؟من ئاخەرین نەفەسەکاو وېم کاوېژ کەروونە! هەناسە، دما تەماشا، دما بې دەنگی و دما سکووت. لوابېنې ۋیرلەرە، ئاوەزیچم هەرمانە نەکەرې. ۋیرم تەنیا قسێ مەرگی کەرې پەیم و کتېبەکام و دەس نویسەکام. چی حاڵیچنە کتېب ئاما فریامەوە؛ ئامانێوە ۋیروو نویسەرېوە ڕەوانکاوی ئەمریکایی - کە چی هامنەنە کتېبەکەش بە نامۆ(موضوع مرگ و زندگی). مەرگ و ژیوای، وانامەوە، ئێروین د. یالۆم کە باسو وېش کەرۊنە کە دمای مەرگو وېش و ژەنەکېش کە ئاڎېچە نویسەرەنە، ماچۊ: داخۆم دمای وېم کتېبەکام، کتېبیانەکەم چېشش سەرمەی؟یاڎگاریە عالەکام کە جە بڕێ جە وەڵاتانە ئەساینێم، بەتاییبەتت تەندیس و سەردیسە تاییبەتتەکاما ( نامېشا بەرۆنە) کە چەنی خېزانێم جە سەفەرەکامانە کە پەی دانشگایەکا دەعوەتێ کریێنمێ و جە سەفەرە وېمانەکایچمانە ئەسەینێما و یانە خنجیلانەکەمانە بە یادگار هەریۆ یاگې وېشانە نیاینێمارە، گنا دەسو کێ؟ ( ئانە نەبۊ کە زاڕۆڵێچشا نەبانە- دوې کوڕێ و کناچېچشا هەنە)پەیشان موهێم و گرنگا کە گنا دەسو کێ؟ا سەرمەی؟
دمای موتاڵاو ئی کتېبییە واتم؛ تەماشا کەرڎې جە وەرئاوانە (غرب) بە تاییبە پەی نویسەرېوە جېیاتی ئانەی ۋیروو سەرمایەی مادیشنە بۊنە و یانە و ماڵیشنە، ئینا ۋیروو کتېبیانەو کتېبەکاشنە و دەسنویسەکاش و
چېوە هونەرییەکاش کە چەنی ڕۊحیشا و بییەیشا گەورێ بییێنێ! داخۆم ئېمە چېش؟ چەنی ۋیر کەرمېوە؟وېما چېش جیا مازمێنە؟بەرنامەما چېشەن؟
ئاوێنێوە کەوێڵەکەمانە بې، تەماشاو وېم کەرد. زەرد هۊرگېڵابېنېوە- ئەجې مارەزەردەو چیروو پووشا بېنې! زوو ئارەقێوە سەرد-چیامانی؛ عەڼاموو گېیانیم گېرتشەرە. خەریک بې تەماشام جە مڵکەکەیم تەمامیۆ.وڕ بییەبېنېنە چڵ بە چڵیش. تۊ واچینە ئینە ئاخەرین دیڎار، ئاخەرین تەماشام بۊنە. ئەر تاوایێم؛ لەق بە لەق و چڵ بە چڵ تەماشاو درەختەکام کەردایە. وەزی 3-4 ساڵانێ، هەمرۊی پەڕووپا قورسی 2-3 ساڵانەی، هەشتاڵوێ لەمپەڕێ و عالەی چوار- پەنج ساڵانێ، هەڵووچە جەوانێ 10-12 ساڵانێ و هەنیچ...تەر.
بێ ئیختیار جە تەماشایشا کنیانېوە. خەریک بې سەردی لاشەیم زگارم کەرۊنە. کەمېوە هەناسەم ئاماوە وېمەرە. ئازارەکې لاشەمەنە سووکە بییە. بې هازیێنە وېم وست دلې ماشینەکەیم. گیسنامەنە، ئەجې ئازارەکۆ منش گرتێنە، ڕوو بە یانە کەوتا ڕا. چی حاڵنە ماشینەکەم ڕەفێقێوە ئەهوەن و سەرو وێ بې. پا دلې شلۆقی و هارووهاجی خیابان و بلوارانە، سیاوچەمانێوە لووت بەرز و ئاودار، تاکو یانە وادرۆشەش کەردانێ!لاشەی بې گېیان و بې ڕۊحم، تاویاوە دلې بوە و بەرامەو چاشتەو یانەی. ئامانێوە قسێ. لاشەم سووک بی.
بورهان ئەختەر.[1]