هورچنیەی چ خزمەتێ بە هۆرامانی کەرۊ
نویستەی: #ڕێبوار هەورامی#
وەڵی ئانەینە بلو دلی بابەتەکەی بەشێ جە هونی هونیارێ هۆرامانیتا ماروە ویر کە ماچو :
هوشما جە فەرهەنگی بو
کەم بواچمی ئەمن و تو
وەشەسیایا ویتا زاندی ماوێ تەر قەرارا هورچنیەی کریو ئەر کریو! ئی ماوە هەریۆ لاو ویشۆ چ حیزبی لیستی هورچنیای سەربەوی خجڵینی ویشا مشناسا بە خەڵکی تاکو دەنگشا دو پەنەو هورچنیا پەی ژیرلاو مەری (پەڕلەمان) وەلی ئنەی کە دېیەنما ئی هەرمانی تەنیا پەی ئانەی بېیەن که ئانی ویشا هورچنېیەن یاوا ژیرلاو مەری و ژیوایێ وەش ویارا پەی ویشا ئینە ویرۆکەرڎەو فرێ جە خەڵکو پانیشتو کوردەسانین! پەی هۆرامییەکایچ من ئینەی ماچو ئەر گەرەکتانە خزمەت کەردی و هۆرامانی ئاوەڎان کەرڎې ئەر کەمێ ویر کەرڎې مزاندی کە هیچ حیزب و لایەنێ تەنانەت فرێ چا هام زوانایچە کە وەڵتەر هورچنیاینی تەنیا دماگیرو هۆرامیشا پەی ویشا بەکارئاردەن تاکو یاوا پانەی کە گەرەکشانە ئانیچ کە گەرەکشا بېیەن خزمەت کەرا حیزبەکەش بە هام زوانەکەو ویش وەرگیریش کەرڎەن چانەی کە خزمەت کەرو چا یاگینە کە هەن یا لابریان یا بی دەسەڵات کریان! توی وانەریچ هەکە ئی بابەتەیە وانیۆ ڕەنگە ئینەی بزانی ! هۆرامان چەوەتەی هەن چ ویش چ خەڵکەکەش بەس بەکار ئامان تەماشە کەردی بە گرڎی ئانەی هۆرامیا چ وەرپەرسش چ خەڵکی سادەش تەنیا جەنگشا پەنە کریان ئەڵبەت خەتاو خەڵکو هۆرامیا ویچماش چەنەن هیچ کات نامینمی ویرێ کەرمی کە جەنگ پەی مەنەوەی ویما کەرمی نەک ئیڎ و ئەوی و حیزبی! چوون کاتېو یاوان ئانەی کە بەرهەم چنمێ بە بڕی چیوی پیسە شمە ویتا جیا کەرڎې و بڕێ چیوی تەری چا مافەیە کە گرڎ ئانزانێ هەنش بیبەش کریاینمی! ئینەیچ پەی بڕێ چیوا گیڵوە چانیشا: نەبییەو کەسێ کە پیسە سەرکردەی نیاما بەداخۆ یۊتەر چانیشا وی وەری هۆرامییەکا و وی بەکەم زانای ! دماتەریچ بڕێ هام زوانی هەنی بەنامی هۆرامانیۆ یاوێنی خێرو بەرەکەت پەی ژیواو ویشا کاتېو با بە وەرپەرسیچ چیوێ خېیاڵشانە نەبوو هۆرامان زوان فەرهەنگا! ۋەرو ئانەیە هۆرامیی مشیو ویرکەراوە دنیا پاسە مەمەنو کە ئاوەزشانە ویرش چەنە کەراوە وچیان کە تەوەنە یاگی ویشەنە قورسەنە جا کاکی هۆرامی ئەر گەرەکتا ویت بی و حسابت پەی کریو ئانە مشیو گرڎما ویماوە دەس پەنە کەرمی هەر ئانزانێ چەنین بی پیسە ویش بی چەنیش هەرکات هۆرامی ئاما پاش گیرتەرە سەرو ئانەی کە گەرەکشا و مشیو پەیش کریو ئانە بە تەئکید یاوش پەنە وەلی ئەر بەیمی بیمی بە پیاو ئیڎ و ئەوی ئانە هەم یاگی ویت جە دەس مڎەی هەم بەکار مەی ماف مەدریو مسنیو جا گەرەکت بوو قاچ وزی سەرو قاچیو بەیا خزمەتت کەرا ئانە بزانە ئینای وەرمەنە مشیو چڵاکیەیرە و ژیوای پاسەی کە هەن پیسە ویش وینی !
یاگی واتەین ئی قسی ڕوەو گرڎ هام زوانێن بە گرڎی هەمیڎ وازو تاومی گرڎیماوه تاومی تەوەنێ وزمی سەرو تەوەنێ پەی خزمەت کەرڎەی هۆرامانی.[1]