کورد دلۍ چەرخەکا تاریخینە
بەشې: یەرەسەڎ و چل و حۆتەمە
نویستەی: #هاوڕێ باخەوان#
* تاریخو (#15-03-1931#ز.) تاریخنۋېسو کورڎی موحەمەد ئەمین زەکی بەگ، وەڵینەش پەی کتېبو (کورد و کوردەسان)ی نویست.
* مانگەو (04) ئی ساڵېوە تاکو مانگەو (05)، مامۊسا تۆفیق وەهبی جە لاو ئینگلیزەکاوە زیڼانی کریا.
* تاریخو (#05-04-1931#ز.) جەنگو ئاوباریکی میانو پېشمەرگەکا شېخ مەحمووڎی بەرزنجی و ئینگلیزەکانە قۊمیا.
* تاریخو (#24-04-1931#ز.) شېخ مەحمووڎ نامێوەش پەی قۆمیسەرو ئینگلیزی جە وەرکۆت کیاستە، بە نیەتو گفت و گۊی.
* دلېڕاسەو مانگەو (05) ئی ساڵېنە، داگیرکاری ئێرانی هېرشەش پەی سەرو خېڵو جەلالییەکا جە ناچەو (قەرەن عەین)ی کەرڎە، تاکو جەمېشان بکەرۊو کۊچشان پەنەکەرۊن، ناچاریۍ ئیسماعیل ئاغای سەردارشا پەناش پەی داگیرکاری تورکی بەردە.
* مانگەو (05) ئی ساڵېنە، هېزەکانو داگیرکاری ئێرانی دلۍ ناوچە سەرحەڎییەکانو میانو ئێران و تورکیای جاگیرۍ بییۍ، کە ژمارەشان (7) هەزار سەربازۍ و جاشۍ بېنۍ.
* تاریخو (#13-05-1931#ز.) ئینگلیزەکۍ بڕیارو ئانەیشان دا کە شېخ مەحمووڎ بگېڵۊوە پانیشتو کوردەسانی و ناوچێ پەی وېش هۊرچنۊ و چەنەش بنیشۊرە و بژیوۊن.
* تاریخو (#19-05-1931#ز.) هېزێ سەر بە خېڵو جەلالی و چن پېشمەرگێ سەرنیشتو کوردەسانی، هېرششان کەرد سەرو سەربازگێ ئێرانی، ئەنجامەنە (124) سەربازۍ کوشیێ و (200 تاکو 300) زامڎارۍ کریێ.
* تاریخو (#31-05-1931#ز.) مەحمووڎ خانو دزڵیۍ بە فیتو ئێرانی بە دەسو ئینگلیزەکا دەسگیرکریا.
*مانگەو (06) ئی ساڵېنە، بالیۆزو ئێرانی جە شارو ئەستەمبووڵی یاڎەوەریێش پېشکەشو باڵیۆزو بەریتانیای ‎ (سێر کلێرک)ی کەرد، دلېشەنە نویسیابۍ: مەشۊم مەسەلۍ شېخ مەحمووڎی بە مەسەلێ فرە وەرباسە و یاگۍ سەرنجۍ بزانیۊن.
* کۊتاو مانگەو (06) ئی ساڵېنە، مەلیک فەیسەڵ لوا پەی کەرکووکی تاکو ئانېشا خەڵات بکەرۊن هەکە بەشدارۍ بیېنۍ جە پڵۊسنارەی شۆڕشو شېخ مەحمووڎی.
* تاریخو (#11-06-1931#ز.) مەلیک فەیسەڵی یەکەم ئامان پەی سلېمانی.
* سەرەتاو مانگەو (07) ئی ساڵېنە، هورووژمەی دوەمەو داگیرکاری ئێرانی پەی سەرو ناوچەو (قەرە عەین)ی خېڵو جەلالییەکا، ئەنجامەنە داگیرشان کەرد.[1]