کورد دلۍ چەرخەکا تاریخینە
بەشۍ: یەرەسەڎ و چل و نۊهەمە
نویستەی: #هاوڕێ باخەوان#
ساڵەو (1932ز.)
* ئا پېشمەرگۍ کە دلۍ شۆڕشەکەو بارزانینە بەشداریشان کەرڎەبۍ و پەی تورکیای پەناشان بەردېبۍ و دەسبەسەرۍ بېنۍ، ڕزگارۍ کریێ، دلېشانە (موحەمەڎ صدیق و مەلا مستەفای بارزانی)شان چەنەبېنۍ.
* سەرەتاو ئی ساڵۍ؛ دوۍ وەفدۍ داگیرکەری تورکی لوێ پەی تارانی، تاکو چەربارەو گرفتو کورڎی و پڵۊسنارەیش واتە و واچ بکەران، ئا دوە وەفدە یەکەمشان بە سەرداری جەلال بایار و دوەمشان بە سەرداری تۆفیق ڕۆشتۆ بۍ
* وەهارو ئی ساڵېنە، ئینگلیزەکۍ گەرەکشان بۍ ئاسوورییەکا دلۍ ناوچەکانو بارزانینە نیشتەجایۍ بکەران.
* ئا، خاچاتۆریان؛ کتېبو ڕازوانی کورڎیش بە هەر دوە زوانی کورڎی و ئەرمەنی جە یەریڤان وەڵاکەردۆ.
* تورکەکۍ، شېخ ئەحمەڎو بارزانی و دۋۍ برێش بە نامەکانو (مەلا مستەفا و شېخ سدیق) ئازادۍ کەردۍ و ئیڎېچۍ دمای ماوێ دژو داگیرکاری ئېراقی شۆڕششان هۊرخېزناوە.
* کاڕڵ هەدانک، لوایۆپۊرێش پەی ئا باسا کە ئۆسکارمانی سەرو شېوە زوانو زازای نویستېبېنۍ، بە ئەڵمانی وەڵاکەردۆ.
* خېزیاو بارزانییەکا جە ناوچەو بادینانو پانیشتو کوردەسانی، کە دماتەر ژمارێ فرېشان بەرشیۍ پەی تورکیای.
* دادگای سەربازی تورکی جە ئەرزەڕۆم، سەلاحەدین کوڕو شېخ سەعیدی پیران، کە جە ئېراقۆ گېڵابېوە، ئازاڎ کەرد و دماتەر پېوەڼیش کەرد بە شۆڕشو دەرسیمیۆ.
* ئامای دنیای هونەرمەڼی گۊرانیواچ، فوئاد ئەحمەد دلۍ دەگاو (عەوێنە)ی ناوچەو هۆلېری.
* تاریخو (#23-01-1932#ز.) مۊرکەرڎەی ڕېککۆتەنامێوە میانو داگیرکاری ئێرانی و داگیرکاری تورکی پەی دایوەنەی شۆڕشو ئاراراتی، هەم ئێران کەشو ئاراراتی گولانەیش دا بە تورکیای، تاکو پەلامارەو ئاراراتی گۆرەی ئاسانتەرە بۊ، وەراوەرو ئینەیە تورکیا پارچە زەمینێ تەرش دا بە ئێرانی.
* تاریخو (#09-02-1932#ز.) هېرشەو داگیرکاری ئېراقی پەی سەرو ناوچەو بارزانی، ئەنجامەنە هېرشەکۍ مەڕیا و دەیان کەسۍ جە هەردوی لایا کوشیێ و زامڎارۍ بیۍ.
* تاریخو (#25-02-1932#ز.) ۋەرۋێ فرۍ دلۍ شارو سلېمانی و دۆروبەریشەنە وارێنە.
* تاریخو (#12-03-1932#ز.) داگیرکەری ئېراقی یاڎەوەریێش پېشکەشو شېخ ئەحمەڎی بارزانی کەرد، دلېشەنە مۊڵەتو (48) دەمژماراش پەنەدا، پەی ئانەی میری دەسەڵاتو وېش دلۍ ناوچەو بلەی مەرزنۊرە، بەڵام شېخ داواکېش وستە پەشتەو گۊشاش.[1]