‍ یاڎێ جە قەڎیمی
نویستەی: #ناجح گوڵپی#
ئۆسا خەڵکو دەگای بە هەسەر و هەر بارەکاشا بەریٛنیٛوە پەی یانەی، بەتایبەت بارە سمەر، یام ڕەشکەسمەر کە فرە زل و ناکڵوٙکار بیٛ، ئتر بارەکە ماڵیٛ دیوارو کەڵەکیٛرە، یام دیوارو یانارە، ئەچا کوڵانانە هەکە تەنگە بەریٛ بیٛنیٛ، فرەو کوجیا بەشو لوای پوٙرەو بارە سمەری، بارەهەژگی، بارەهیٛزمی دیٛنیٛ، جا ئەگەر وەڵاخێو نابەڵەد بیێ ماڵیٛ دیوارەکەیرەو بارەکەش لار بیٛوە خەریک بیٛ بگنوٙ، ۋەرو ئانەیە نەماڵێش دیوارەکەیرە خوتایەکەش (هەرەبەنەکەش) واچیٛ تەک تەک، یام تەکە تەکە، ئتر ئی بیٛزوانە و ئی وڵاخە تەکێ دیٛ ئیلاوە و بەگوٙشو خوتایەکەیش کەریٛ، چون زانیٛ هاگادارش مەکەروٙنە جە چیٛوێ هەکە مەبوٙنە بایسو لاربیەی و کەوتەی بارەکەیش و هوٙرویٛڵیای هەردویشا (هەرەکە و بارەکە)، پەوکای بە گوٙشش کەریٛ پیٛسەو زوانزانێوە. خوتایەکەش هەر لاێوە چڕیێش وەنە ئەچاگەوە تەکە دێ ئەولاوە، یانی زانیٛ چکوٙوە موٙچیارەیەکەش مەکەرینە تا ویٛش لابدوٙ. چون هەر و هەسەر و وڵاخیٛ زوان نمەزانانیٛ و بیٛ زوانیٛنیٛ. ئەگەر جارێوی تەر ئا وەڵاخە ئامێوە پا کوجیٛرە هەرگیز نەماڵیٛ پا لادیوارەرە یام پا کەڵەکیٛرە، چون هەرەکە ئیٛوە ویرش کە هەربەنەکەیش هاگادارو خەتەریش کەردەن چیٛگەنە، نەماڵیٛ لا دیوارەکەیرە بە جوانی و ڕیٛکو پیٛکی ڕەدبیٛ کوڵانەکییٛرە.
جا مەبەستم ئانەن ئۆسا وڵاخەکیٛچما پەی ویٛشا و پەی ئیٛمەیچ ئاقڵیٛ بیٛنیٛ و بە گوٙشما کەریٛنیٛ، موٙچیاری هوٙرگیٛریٛنیٛ، چون جە خەتەری و هوٙرویٛڵیای ئاگاداریٛشا کەریٛنمیٛوە، یانی پەی ویٛشا ژیریٛ بیٛنیٛ. باوڕکەردیٛ ئەچی زەمانەنە، جە ئیسەتیٛنە کەسی چامنە هەن یەریٛ چوار جاریٛ، کورە کول بی ئنڎە ماچی پاسە مەکەرە، ئەپیٛسە بکەرە، ئەچانە ویٛت لابدە ماڵی کەلەکێرە کوٙرت مەکەروٙ، بارەکەی مەوزی! کەچی ئەجوٙ پادیت نەبیەن. مەزا کەڕەن یام بیٛزوانەن؟
بەداخەوە ویٛنەو هەریم دەس نەکەوت بە ڕەشکەو سمەراوە.[1]