هوٙرگیٛڵنای دەمواچ
نویستەی: #ناجح گوڵپی#
هەرمانێوی چالاکەو هوٙرگیٛڵنای واتە واچیاکانە کە یەکسەر جە ڕاو دەمواچیوە ئەنجام مەدریوٙنە پەی کەسێو یام کوٙمەڵێ کەسان، جە زوانێو پەی زوانێوی تەری. یام هوٙرگیٛڵنای دەمواچی یەکسەر وریتین جە ئەوەواڕی دەمواچو دوای و قسیٛکەردەی میانو دویٛ یام زیاتەر قسیٛکەراو زوانە جیاوازەکانە. هوٙرگیٛڵنای دەمواچ پەیوازش بە چەنەئامای بەرزو زوانزانای و فەرهەنگو کوٙمەڵینە هەن، کە هەردوی ویارەکیٛ گردینییٛ و ویاری تایبەتیشا هەن پەی هوٙرگیٛڵنای دەمواچی یەکسەری.
هوٙرگیٛڵنی دەمواچی یەکسەر-دەمو دەس ئەوەجەش بە:
نایابی زانیاری و کارامەیی و چەنەئامای هەن، پەی ئانەی تەفرنجە و جیاوەکەردەی هەستەکاش تا فرە بەو ڕدی بوزوٙشا دلیٛو مەژگیش شیتاڵیٛشا بکەروٙوە و ئیجا بەرشا بڎوٙ بەروٙ پەی وەرانوەرەکەیش.
نایابی جە زانیاری بابەتینە، مەشوٙ بەڵەدو ویارو بابتەکەی بوٙنە تا بە پوختی هوٙرشبگیٛڵنوٙ
نایابی چەنەئامای میانو خەڵکینە، یانی مەشوٙ بەڵەڎو هەرمانکەردەی میانو مەردمینە بوٙ، بەڵەڎو هوٙرز و نیشتو خەڵکی بوٙنە.
نایاب بینە جە پیٛشکەشکەردەینە، ئا بابەتە کە هوٙرشمەگیٛڵنی مەشوٙ فرە بە جوانی و زاڵی بیاونیش بە جەماوەرکەیت.
نایاب بینە جە دەنگەنە، مەشوٙ بە دەنگێوی زاڵ و بەرز بابەتەکەیت پیٛشکەش بکەرینە.
نایاب جە پیٛشکەرشکەردەینە پیٛسەو کسمێوی هەمیشەیی ویٛت، مەشوٙ فرە زانا و چەنەئامابی کاتێ بابەتەکەی هوٙرمەگیٛڵنی پەی وەرانوەرەکەیت.
دویٛ جوٙریٛ هوٙرگیٛڵنای دەمواچی هەنیٛ
یوە: یەکسەر، دەمو دەس Simultaneous Interpreting
دویٛ: شوٙنیرە Consecutive Interpreting
پەی هوٙرگیٛڵنای دەمواچی هەر دوە جوٙرەکیٛش مەشوٙ ئی خاسیەتیٛتە چەنەبانیٛ
یوە: تەمام بەڵەڎو هەر دوە زوانی و فەرهەنگی بینە.
دویٛ: مەشوٙ کرژبی جە دواینە و هوٙرگیٛڵنای مەژگتنە-ویرتنە.
یەریٛ: مەشوٙ تەکنیکێوی بەرزت ببوٙنە جە کوٙگاکەردەی قسەکانە دلیٛو مەژگیتنە، ئیجا بە کرژی هوٙرشا بگیٛڵنی و بدەیشاوە جبەر.
چوار: مەشوٙ هازەو تەفرەنجەی و سەرنجیٛ و وردۆبییەت فریٛ بوٙنە.
پەنج: مەشوٙ ئەخلاق و ئەمانەت پاریزنی جە هوٙرگیٛڵنای دەمواچنە، چەنیت ئەژنیەن پاسەیچ بواڕیشەوە.
شش: هەستو وەرپەرسیت چەنە بوٙنە، کە هەرمانەکیٛت بە ساقی بیاونی ئەنجام.
حەوت: مەشوٙ ئاستو پەروەردی و فەرهەنگیت بەرز بوٙنە.
هەشت: مەشوٙ ناموەربی جە بڕێ ویارەنە، نامیٛت لوێ بوٙنە خەلک بشناسوٙنەت، پەی نمونەی جە ویارو پزشکی، پەروەردەی، یاسای، کوٙمەڵایەتی...
نوٙ: مەشوٙ بیٛلایەن بینە و لاو هیچکەسی نەگیٛری کاتو هەرمانەکیٛتنە.
دە: مەشوٙ تەوانات ببوٙنە پەی تومارو بڕێ سەرنجا کە پەویوازیٛ شیکەردیۆ بانیٛ.
یانزە: مەشوٙ تەونات ببوٙنە کاتو فشارینە تیٛک نەشی و هەرمانە ویٛت ببەرینە.
دوانزە: مەشوٙ تەونایێوە فرە بەرزت ببوٙنە جە توٙمارو تەفرنجەی و سەرنجەکاتنە.[1]