ڕۊمانو ( برا شېردڵەکا )، ئاسترید لیندگرینې
پاسە کە باسا ئاسترید لیندگرینە ساعبانېۋ پەنجەرەو قەتاریەنە دنیای ۋەرۋ و وەرەتاۋ ڕازنای، ۋینۊ و ۋەرو وېشەرە ماچۊ مشیۊ داستانېۋ بنۋیسو کە سرشتېۋی وەشەنە ڕوە بدۊ.
چامای و هەر چا کاتانە چەنی حەماڵېۋېش سەردای زیارەت تەڵانا لا کلیسێۋې کەرۊ و چاگە کېلېۋۆ ۋینو و موانۊۋە کە دۋې برێ بە سەرەو ساڵېۋ تەمەن بەینېیەنە چېگە ئارامشا گرتەن.
ئاستریدە یاگېۋتەرۆ کاتو فیلم هۊرگرتەی جە داستانېۋېش برێۋی گولانە، کۊڵې برا گۆرەکەیشۆ ۋینۊ کە چەمیۊۋە و برا گۆرەکەیش ماچ کەرۊ. ئاستریدە ئینیشا مدۊ پاڵو یۊی و گنۊ ۋیرو خولقنای ڕۊمانو برا شېردڵەکا و بە جۊرېۋ نزیک پی باسو واریە ملۊ تاکو میاۋنۊش پەنە.
دۋې برێ کە گولانەکەشا نەوەشا و گۆرەکە چەمو گولانەکەیەنە جۊرېۋ پاڵەۋانا. ئەداشا ئەغڵەب ئینا هەرمانەنە و زېیاتەر برا گۆرەکەن کە ئینا دەمو گولانەکەیۆ. ڕۋېۋ گولانە پەرسۊ: تۊ مزانی من پی زوانە مرو؟
ئەۋیچ مەشارۊشۆ و ماچۊ: ئەرې مزانو و بەڵام دەی قێدو چیشی کەرۊ خۊ ئاندە گرنگ نییا و ئانە کە مرۊ و مەنۊ جیا تەنیا تۊکلېۋا، ئەندا تۊ وېت باڵېت گرتېنې و لۋانی پەی مەملەکەتو ئۆ دیمو هەسارەکا و منیچ ئاندە مەبەرۊ مەو و میاۋوت پەنە.
گولانە ماچۊ: دەی تۊ گاهەن نەۋەد ساڵې عەمر کەری من تەنیایەنە چېش کەرو؟!
ئېدیچ ماچۊ: چا مەملەکەتەنە نەۋەد ساڵې پېسەنە دۋې ڕۋا و خۊ تۊ متاۋی دۋې ڕۋې تاقەت باری.
چاگە کەیې فرېنې و یانەت ئینا دەرەو گیلاسانە و ....خەبەرېۋ جە ماشینا نییا و بە یاگیشا ئەسپې هەنې و جېیاتی تەلەفونیچ کاۋەتری گېڵا و... تۊ متاۋې بە کاۋەترارە پەیام کیانیۆ و ئەپاسە....
پاسە مێ ۋەرۆ یانەشا ئێر گېرۊ و برا گۆرەکە گولانەکەی گېرۊ کۊڵېۋۆ و پەنجەرۆ پڕۊرە و برا گۆرە مرۊ. شۊنەو ماۋېۋیەرە وەزعەو گولانەی خرابیۊ و بەراش بیمارستان. ڕۋېۋ کاۋەترېۋە منیشۊ پەنجەرەو ئا چوەریۆ کە ئادش چەنەن و ئادیچ ئجۊش براکەیش کیاستېنە.
درېژەو داستانەکەیەنە ئاستریدە باسو یاۋا بەیۊی و وەشییا مەملەکەتو ئۆ دیمو هەسارەکا مارۊ و پا جۊرە تەلاش کەرۊ تاکو سامناکی مەرگی لا زاڕۊڵاۋە کەمڕەنگ ۋزۊ.
ئاسترید لیندگرینە ( 1907_ 2002ز. ) ژەنېۋەی نۋیسەرەی سویدېیەنە، کە بە نۋیسەی کتېبا پەی زاڕۊڵا شۊرەتی جەهانیش هەن. فرەو کتېبەکاش کریێنې بە فیلمې، چانیشا پیپیە گۊرەۋا درېژە و ئێمیل و برا شېردڵەکې و...بەپاو ئامارو (2019ز.)، سەدو شەس و پەنج ملیۊنې کتېبېش ۋرەشیێنې و بە (107) زۋانې تەرگومە کریێنێ.
سیامەند هۆرامی.[1]