دەسەبەشێ تەر پەی جوٙرەکاو هوٙرگیٛڵنای
نویستەی: #ناجح گوڵپی#
یوٙ: هوٙرگیٛڵنای ئەدەبی، ئیجوٙرە فرەسەختەن چون جە هوٙرگیٛڵنای ئەدەبینە بڕێ هەستیٛ هەنیٛ کە ویارو ئەدەبی و شعریٛ بەرهەمە ئەدەبیەکانەنە بەکار مەیانیٛ، ڕەنگە هوٙرگیٛڵنایشان سەخت بوٙنە و مانای پەڕە نەبەخشانیٛ زوانی دووەمنە، جا ۋەرو ئانەیەە مەشوٙ هوٙرگیٛڵن فرە بەوردی بگیٛڵوٙ شوٙنەو واتارە تا مانای پەڕەو تەمامە ببەخشان پا هەستە ئەدەبیەیە کە زوانی یوەمنە هەن کە زوانو سەرچەمەکەین.
دویٛ: هوٙرگیٛڵنای ئاینی، گردما مزانمیٛ ئاینو ئیسلامی کە دینێ وەروەڵاوەن جە جیهانەنە، زوانی سەرچەمەش عەرەبین، مەشوٙ جە وەڵاتانو جەهانینە هوٙرش بگیٛڵنی پەی زوانە لایڎەکان، یانی جوٙرێ تایبە جە ویارو ئاینینە مەشوٙ وەرچەم بگیٛریوٙنە پەی هوٙرگیٛڵنای فەرمایشتەکانو پیٛغەمبەری (د.خ) وە هەر چیٛوێ تەری ئاینی کە پەنە واز بوٙنە. ئینە پەی ئاینەکانی تەریچ هەر پاسنەن، مەشوٙ هوٙنەر و هوٙرگیٛڵنای نویستە ئاینیەکان وەرچەم بگیریوٙنە. هوٙرگیٛڵنای ئاینی تەمەنێ دوورو دریٛژش هەن، متاومیٛ بواچمیٛ کوٙنتەرین جوٙرو هوٙرگیٛڵنای بیەن کە ئانزانی کەردەن.
یەریٛ: هوٙرگیٛڵنای زانشتی، دیارەن ویارو زانشتی کەمێ سەختەن چون ئەوەجەمان بە هوٙرگیٛڵنای بڕێ واتا هەن کە مەشوٙ پەڕمانا هوٙربگیٛڵیان، چونکەتەی نامیٛ زانشتییٛ فرە کەم هام ماناشان هەنە گردو زوانەکانەنە، مەشوٙ تەقەلا بڎەیمیٛ ماناکیٛشان ڕوٙشنە بکەرمیٛوە جە زوانی دووەمنە، زوانی وەرپیٛک.
چوار: هوٙرگیٛڵنای بازرگانی، جە ویارو مامڵە بازرگانیەکانەنە ویٛش مرمانوٙ، کە ئاروٙ جەهانەنە فرە پەرەش ئەسان.
پەنج: هوٙرگیٛڵنای قانونی Legal Translation، یوٙن جە هوٙرگیٛڵنایە کریٛڵیەکان، کە یانگێ گرنگەش هەنە دلیٛو وەڵاتانینە، تایبەمەندییٛ ویٛش هەنیٛش، بەڵگەنامیٛ و سەنەڎیٛ قانونییٛش پەنە تەرجمە کریانیٛ.
شش: هوٙرگیٛڵنای ئەرەیاونای، جە ئاروٙنە فرەتەرین جوٙرو هوٙرگیٛڵناین کە برەوش هەن دلیٛ کوٙمەڵینە. پەی نمونەی ئامادەکەردەی هەواڵی هەکە گردو دەزگا تەلەفزیوٙنیەکانەنە بەکار مەیوٙ، فرەتەرین کات مەبەروٙنە تا هەواڵێ جەهانی هوٙرمەگڵیوٙنە پەی گردو زوانەکانو جەهانی، بە تایبە ئەچی سەردەمنە کە توٙڕەو ئینترنێتی پاسەش کەردەن جوٙرەها ئەرەیاونیٛ کوٙمەڵایەتییٛ کاربکەرانیٛ.
حەوت: هورگیٛڵنای هونەری Technical Translation جە ویارو کارە هوٙنەریەکانەن بەکار مەیوٙنە، کە هەر ویارێ تایبەمەندی ویٛش هەنش پەی هوٙرگیٛڵنای.
هەشت: هوٙرگیٛڵنای دەمواچی یەکسەر، میانو کەسێ چەنی چندە کەسێ تەری بەکار مەیوٙنە، کە ئیسە فرەتەر وەروەڵاو بیەن کاتێ کەسێوە نمایندە گەلێوەن مەیوٙ سەردای پەی لاو ئێمە، وەختو قسیٛکەردەینە، یەکسەر قسەکانش هوٙ مەگیٛڵنی کە هونەرو هورگیٛڵناینە پەنەش مەواچان Interpretation یانی کەسێ قسیٛ مەکەروٙنە و یوٙتەر هەر بە قسیٛکەردەی قسەکانش مەواڕوٙ پەی زوانێ تەری. پەی نمونەی کەسێ بە زوانو عەرەبی قسیٛ مەکەروٙ، منیچ لاشەنە مدرانارەو قسیٛکانش مەواڕو پەی هەورامی تا کوٙماو مەردمەکەی بیاوٙومانە.
هوٙرگیٛڵنای جە ڕاو دەزگاو ئنترنێتیوە Internet Translation
یام متاوی بواچی هوٙرگیٛڵنای جە ڕاو دەسینەیوە Machine Translation، ئیسەتیٛنە بە نونگەو وڵیٛکەوتەی تەکەنلۆجیای و زانشتو ئینترنێتی و بە خاترەو وەروەڵاوی هوٙرگیٛڵنای و ئەوەجەو ئانزانی پەنەش، چون هوٙرگیٛڵنای ئانزانی بە دەسو ویرو ویٛش نمەیاووٙنە پوٙرە ئی گردە ئەرکیە بکیٛشوٙنە، پەوکای پەناشان بەردێنە وەرو دەزگاو کامپیوتری و مۆبایلی، کارپەنەکەریٛ Application ئینترنێتی مەرزنارە سەرو دەزگاکەیشانوە تا ڕادێوە خاس هامکاری مەکەروٙنە پەی هوٙرگیٛڵنای، جە زوانێوە پەی زوانێ تەری، فرەو زوانە زینڎەکانو جەهانی ئی کارپەنەکەرشان هەن، مەوینمیٛ جە ئینترنێتنە زیاڎ جە دە کارپەنەکریٛ هوٙرگیٛڵنای هەنیٛ هەکە بە بەلاش واتیٛ و دەسەواتیٛ هەتا میاووٙنە پەرەگراف پەیت هوٙرمەگیٛڵنان، هەرپاسە هوٙرگیٛڵنای بە دەنگیچ هەن ئەچی کارپەنەکەرانو ئینترنێتینە، هەڵبەت هورگیٛڵنای چی دەزگانە فرە ورد و پەشتی پەنە بەسیا نیەن، چون بڕێ جاریٛ چیٛویٛ هام مانێش وەنە فاڕیانیٛ و هەڵە مەڎوٙشان جبەر، وەلێم سودێ فرە فرە مەیاونان بە ویارو هوٙرگیٛڵنای، ئێمە چیٛگەنە نامیٛ چندە ئەپلکەیشنێ ماوەرمیٛ، پیٛسەو (گوگڵ ترانسلەیت، مایکرۆ سۆفت ترانسلەیت، ئای ترانسلەیەت ڤۆیس، های ترانسلەیت...هەنیچتەر) کە خزمەتێ خاسو ویارو هوٙرگیٛڵنای مەکەرانیٛ. مەنەنش. [1]