هوٙرگیٛڵنای دەمواچی یەکسەر
نویستەی: #ناجح گوڵپی#
یانی هوٙرگیٛڵنای دوای، قسیٛکەردەی جە هەمان کاتنە، خیٛرا و کرژ، فەوری، ئیڎیچ چنڎە لزگێوش هەنیٛ:
لزگی یوەم: هوٙرگیٛڵنای دەمواچی هامکات Simultaneous Interpretation جە هەمان کاتنە، ئی جوٙرە هورگیٛڵنای قسیٛکەرین جە هەمان کاتنە نیەنی چەنیش، ئاڎ یاگێوە تەرۆ قسیٛ مەکەروٙنە توچ یاگێ وێتوە پەیش هوٙر مەگیٛڵنی، پیٛسەو کەسێ جە ئەوروپاوە دلیٛو کوٙنفرانسێنە بە زینڎە قسیٛ بکەروٙ منیچ جە هەورامانوە گوشبدارو قسەکانش و هوٙرشان بگیٛڵنو پەی تەلەفزیونو هەورامانی، ئی جوٙرە هوٙرگیٛڵنایە فرە سەختەن، چون تێکستو نویستەکەی نیەن وەرو چەماتەوە مەشوٙ فرە مەژگش دەی پەنە و ویرت جەم بکەریوە لاو ئەژنیەی پەیامەکەیش تا بتاوی بە ڕیٛک و پیٛکی و بیٛ کەم و کوڵی هوٙرش بگیٛڵنی. ئی جوٙرە هورگیٛڵنایە فرە باوەن فرەو کاناڵە تەلەفزیوٙنیەکانو جەهانی هەنشا کاتێ پەیامێ گرنگ و فڵانە کەسایەتی جەهانی قسیٛ مەکەروٙنە، ویٛڕاس مەواڕانشەوە چەنی هوٙرگیٛڵنای کرژی پەی بوینەکانشان، ویناکاشا. متاومیٛ نامیٛ هوٙرگیٛڵنای دەمواچی یەکسەرش بنیەیمیٛ.
لزگی دووەم: شوٙنیرە هوٙرگیٛڵنای دەمواچ Consecutive interpretation ئی جوٙرە مەمدری تا قسیٛکەر پەیامەکەو ویٛش میاونوٙنە و متەمامیوٙنە، توچ دماو ئانەی گوشش پەی مەگیٛری و جوان مەیاویشنە یەکسەر دەس مەکەری بە هوٙرگیٛڵنای قسەکانش، ڕستەکانش، ئی جوٙرە چەپەوانەو هوٙرگیٛڵنای هامکاتیوەن، چون هوٙرگیٛڵن ئینا چەنی قسیٛ کەری، پاڵو یوینە مدرێنێرە، قسەکانش مژنەوٙنە بە جوانی میاووٙشانە و یەکسەر هوٙرشان مەگیٛڵنوٙنە پەی مەردمی، ئی جوٙرە مەشوٙ هوٙرگیٛڵن وەی ویرمەندی فرە بەهازی ببوٙنە چوون سەختەن قسێ کە مژنەویش و یەکسەر دماو چندە چرکێ یام دەیەقیٛ بتاوی مەژگتەنە بواڕیشان پەی زوانێ تەری و بە شیٛوێ جوان و ڕیٛک و پیٛک کە مەردم چەنەت ڕازیی ببوٙ، چون جاری چامنە هەن، خەلکەکە بەڵەدو زوانەکەین وەلێم هوٙرگیٛڵنەکە هەڵەمەکەروٙنە جە هەرمانەکیٛشنە، ئینەیچ وریای و هاگاییش گەرەکەن، تا لوٙمەت نەکەرانیٛ. لزگی یەرەم: هوٙرگیٛڵنای وینیا، بە چەمیٛ، Sight Interpretation یانی مڎیەی نویستەکەیرە موانیشەوە، یەکسەر مەژگتنە هوٙرش مەگیٛڵنی، پیٛسەو هورگیٛڵنای، تێکستێوە کە ویٛت گەرەکت بوٙنە لەیەکش بڎەیوە و ئیجا بواچینەش، یام سەنەڎ و بەڵگەنامەکان بەدەمی لەیەکشان بڎەیوە، یام هەر نویستێ تەر.
لزگی چوارەم: هوٙرگیٛڵنای ئەرەیاونای (ترجمە اعلامیە)، ئی جوٙرە جە بەرنامە تەلەفزیوٙنیەکانەنە فرەتەر بەکار مەیوٙنە، پیٛسەو هوٙرگیٛڵنای فلمە بەڵگەنامەیەکان، بەرنامە تەلەفزیونیەکانەنە، مەوینمیٛ یام بە دەنگ و قسیٛ یام بە چیٛرنویس هەرمانەکیٛ ملوٙڕاوە. ئی جوٙرە جە ئیسەنە ویارێوی فرەش گیٛرتەنرە، Audio-Visual Translation ، هوٙرگیٛڵنای دەنگی و دیەی، مژنەویش و مەوینیش. وارۆ بە دریٛژی باسکریان.
لزگی پەنجەم: هوٙرگیٛڵنای قانونی Legal Translation ، ئی جوٙرە جە دادگا و یاگە یاساییەکانەنە مەلوٙنە ڕاوە، بەڵگەنامە و سەنەدیٛ بە یاسایی هوٙرمەگیٛڵنینە، سەختەرین هوٙرگیٛڵناین مەشوٙ جە لاو هوٙرگیٛڵنی باوڕپەنەکریایوە (مترجم معمد، مترجم محترف) بکریوٙنە. هەرچندە ئینە مەلوٙنە یانەو هوٙرگیٛڵنای نویستەیوە وەلێم وەرو کریٛڵیش باس کریان.[1]