جوٙریٛو هوٙرگیٛڵنای
نویستەی: #ناجح گوڵپی#
جوٙریٛ هوٙرگیٛڵنای فریٛنیٛ، سەختیچەن بەئاسانی پەیواچ بڎەیوە، پەی نمونەی ئەگەر توٙ گەرەکت بوٙنە تێکستێ هوٙربگیٛڵنی، یانی پەیت هوٙر بگیٛڵنان، پەی وانایوەو ویٛت، ڕەنگا ئاندە نەکوٙشان پەی هوٙرگیٛڵنایش، یانی بە قیمەتێ کەم مکەرانیٛش، وەلێم ئەگەر پەی وەڵاوکەردەی ببوٙنە جە ڕوٙنامێنە یام یاگێ تەرنە پسەو ڕادویٛنی و تەلەفزیونی، ئاوەختە فرەتەر مەکوٙشی تا هوٙرگیٛڵنایەکە بیٛ لەکە بوٙ، وە نرخەی گرانەش منیەی سەر، یانی نرخە بە پاو جوٙرو هوٙرگیٛڵنای مفاڕیوٙنە، پەی نمونەی هوٙرگیٛڵنای قانونی زیاتەرش مشوٙنە تا ئەویٛ تەریٛ. یانی نرخە جوٙرو هوٙرگیٛڵنای دیاری مەکەروٙنە و جیاش مەکەروٙوە!! مەبەستم چی نمونەی ئانەن هەکە دەسەبەشو هوٙرگیٛڵنای سەختەن، متاوی گرد بارێرە لەیەکش بدەیەوە دەسەبەندیش بکەرینە هەرپاسە جە بنەڕاوە بزانمیٛ هەکە Translation ماناو هوٙرگیٛڵنای بابەتی نویسیاین، وەلێمInterpretation ماناو هوٙرگیٛڵنای قسیٛکەردەین، دواین-دەمواچ، هەرچنڎە جە ویاری تەرنە ماناش فراوانتەرنە. بەپاو پەیلوایو زانایانی چنڎە لزگیٛ هەنیٛ پەی بەشکەردەیو جوٙرەکانو هوٙرگیٛڵنای بەپاو پەیلوای زانشتو هوٙرگیٛڵنای چندە دەسەبەندییٛ هەنیٛ، پیٛسەو:
یوٙ: هوٙرگیٛڵنای ئەدەبی Literary Translation چی جوٙرەنە مەشوٙ نە چەنەش بقرتنی و نە پەیش زیاڎ بکەری، مەشوٙ پەڕانپەڕو دەقە ئەدەبیەکەی هوٙرگیٛڵنایش پەی بکەری، ۋەرو ئانەیە ماناو دلیٛنەکەی پیٛسەو ویٛش بەر بشوٙنە.
دویٛ: هوٙرگیٛڵنای زانیاریبەخش Informative Translation، چیٛگەنە مەبەست بەخشای و یاونای زانیارین پەی وەنیاری، نەک کاریگەری هەست و سوٙچی.
دەسەبەندییٛ تەریٛ پەی هوٙرگیٛڵنای
یوٙ: هوٙرگیٛڵنای نویستەی Written Translation دەقێوی نویسیا هەن گەرەکەتەن هوٙرش بگیٛڵنی جە زوانی سەرچەمەوە پەی زوانی وەرپیٛکی، یام زوانی یېۋەمەو پەی زوانی دووەمی. یانی بەرهەمەکەیش پیٛسەو دلیٛنەی نویسیای هەمدیسان توٙمارمەکەرینە-مەنویسیشەوە. ئینەیچ متاوی بکەریش بە یەریٛ لزگیٛوە: لزگی یوەم یانی هوٙرگیٛڵنای جە زوانی یوەموە پەی هەمان زوانی، یانی نویستەکەی بە جۆرێ تەر بەهەمان زوان مەمجیرە، تەشک و بیچم و شیٛوە ڕستەکان و دەسەواتە و واتەکان مەواڕینە بە جوٙرێ تەر، هەڵبەت ئینە فرە کەمەن. پیٛسەو ڕازێوە بە هەورامی بە دویٛ شیٛوازیٛ جیای بنویسیش.
لزگی دوەمش ئانەن نویستەکەی زوانی سەرچەمەوە هوٙرمەگیٛڵنی پەی زوانی وەرپیٛکی، یانی متاوی پەی چنڎە زوانێ تەری هوٙرش بگیٛڵنی. پەی ئینەی پیمانێوی جەهانی هەن کە هوٙرگیٛڵناکەیت مەپیموٙنە، هوٙرش مەسەنگنوٙنە پەنەشا مەواچان پیمانەو (ISO 17100)سەرو حەنڎاو جەهانی باوڕپەنەکریان پەی خزمەتو هوٙرگیٛڵنای. ئەچی جوٙرنە متاوی تەنیا بە کوڵی پەی زانیاری هوٙرگیٛرتەی for information هوٙرش بگیٛڵنی، ئەوی تەرش ئانەن کە بە شیٛوی باوڕپەنکریا بە دورو دریٛژی و زانشتی هوٙرش بگیٛڵنی.
لزگی یەرم، هوٙرگیٛڵنای ئاماژەکیٛو درکنای (لەفز) پەی ئاماژانی تەری کە درکنای نیەن، پیٛسەو ئاماژەی موسیقی و ویٛنەی، یانی زوانەکەیت بە تەشکو ئاوازەو موزیکی بەر مەوزینە، یام جە بیچمو ویٛنێوەنە بەرش مەوزینە. ئاشکران کە نوٙتەو موسیکی ئەژمار مەکریوٙ بە جوٙرێ نویستەی، کە مەواڕیش پەی موزیکی.
دویٛ: هوٙرگیٛڵنای عادەتی Traditional Translation، ئی جوٙرە هوٙرگیٛڵنایە ئانزانی کەردەن زەمانو زوینە، وەلێم ئەچی زەمانەن یاردی دەریٛ فریٛ پەیدابییٛنیٛ پەی هوٙرگیٛڵنای.
یەریٛ: هوٙرگیٛڵنای دەمواچی یەکسەر Interpretation یانی هوٙرگیٛڵنای دوای، قسیٛکەردەی جە هەمان کاتنە، خیٛرا و کرژ، فەوری، ئیڎیچ چنڎە لزگێوش هەن:»»»دریٛژەش هەن.[1]