ژەنی ناوچەکانو هۆرامانی، جە فەرمانڕەوایی و دەمڕاسینە
هۊرئەوەگېڵنای و ئاماڎەکەردەی: #ئەسعەد ڕەشید#

پېسە واتمان، بە هۊکارو بەستەی و ۋستەرەی مەرزەکا هۆرامانی بە دەسو ئەسکەڼەری و هێلینییەکا، پەی ماوێ درېژی و توولانی، خەڵکو هۆرامانی سیاسەتو (وۍ وەسی)شان پیاڎەکەرد، پەشتیشان تەنیا بە وېشان بەستە.
بېگومان ئا وەربەسە ئابووریە توولانییە، بی بە هۊکارو ئانەی کە هەنگامۍ ژیوای جیاواز جیاوازۍ وېکەردۍ و خۊدسازۍ بنیا، چانەی زېیاتەریچ پارېزگاری جە کۊنتەرین زوانی ئاریایی (ئاریانواچ= ئێریەن ڤەچ)ی کەرا کە وېنێوە هەرەنزیکو زوانو گاتەکاو ئاڤېستایەن، کە ئاڎیچ شېوەو هۆرامانییەن، کە بەعزێ بە هەڵە پەنەش ماچان (زوانو گۊران)ی، و بەعزێ تەر زوانئەشناسۍ بە زوانو ماچۊی، یام کورڎی کۊنی نامېش بەران.
میرەکۍ ئا سەردەمەو ناوچەکانو هۆرامانی نەشناسیێنۍ، بەڵام بە مەڵامەتو سکێ (دراو) فرە کۊنۍ کە ئېزیێنۆ، نامۍ ژەنێ بە نامبانگ و بلیمەتۍ کوردۍ جە ناوچەکانو هۆرامانی بە ناامۍ (ئاداد)ی ئینا سەرشۆو پاسە پیشانە مڎۊ هەکە ئا ژەنۍ فەرماندارەو ناوچاکانو هۆرامانی و چواردۆریش بیېنە، پەوکەی سکەکېش بە نامۍ وېشۆ دێنەوەنە، کە دیمێش وېنێوە ڕەنگینو وېشەن و دیمەکەی تەریچش نامۍ وېشەنە (ئاداد)، بە (ئەلف بۍ) ئارامی نویسیان.
ئەچېگەنە پەرسێ وېش قنجە مەکەرۊوە، ئەرۍ چا دەمەنە (دەمو ئەشکانییەکا) بېجگە ناوچەکانو هۆرامانی، میرایەتی، یام (ستراب) و سترابنشینی تەر بېیەن؟
جە پەیتواچەنە مەشۊم لاو ڕاسی گېریۊن و واچیۊن سەرتاپاو ناوچەکانو کوردەسانو ئێرانی جە دەمو فەرمانڕەوایی ئەشکانیەکانە، بەشکریان پەی چن ناوچێوە کە چېرو سایەو سیستەمو دەرەبەگایەتینە بیېنۍ و هەر ناوچێ شاهێ گولانە، یام میرێ خودموختاری ئاساش بېیەن، ئا میرەیچە فەرمانداری ناوچەکەو وېش کەرڎەن، فرېچشان سوپاو لەشکەرو وېشان و سکۍ تاییبەتتەو وېشان بیېنەشان.
ناوچەکۍ هۆرامانو کوردەسانیچ، ئا جۊرە میرایەتیە یام ئا جۊرە ستراپنشینیەش هەر جە کۊنۆ بېیەن، ئینە چیلاوە، چەولایچۆ ئا جۊرە نامۍ بېجگە جە هۆرامان، جە هیچ یاگێ تەرو کوردەسانینە نەبیېنەو وەرچەم نەکۆتېنە، ڕەنگە مانایچش نەزانیێبۊ. بەشێ جە کتېبو ئاوەڎانییەکۍ هۆرامانی، نویستەی: هیدایەت گوڵپی، فاڕای پەی سەرو زوانی هۆرامی: ئەسعەد ڕەشید.[1]