وانای و خانش سەرو شێعرەو تازێ ژەناو هۆرامانی
بەشەی یەرەمە
نویستەی: #سابیر عەزیزی#
یۊتەر چا شاعیرە وەش زۆقا ، قەڵەمش تاوێ تاییبەتتش هەنە و تاوانش ژەنانە بەینە مەیدان وئەسپو قەڵەمیش بە بووبەرامەو ژەنیوە جە گۆڕەپانو شێعرێنە تاو بدۆ نەمانیۆ ونەگنۊ هەناسەبڕکێ ،
خانم (سورەیا زارەعی)نە. (خوایچ پەی تۊ وەش کەرڎېنە) نامې بەرهەمو ئی شاعێرە پایەبەرزێنە جە ساڵەو (1395) کۆچی ڕۊجیاری دریان چاپ وئامان وەرو دەسو هۆگراو لایەنگیراو شێعرێ.
هەرپاسە جە نامې کتېبەکەی بەر مێ وگنۊ وەرو چەمی، جە دوورەوە هاوارە کەرۊ کە چەنی ڕوسەردەمی هەنا و شێعرە چا قەوارەنە مشناسو کە چەنی ژیواو ئارۊیم تیکەڵە بۊ وجە وینگاو یوتوپیای و ئیدەئال و تەوەهۆماتی جە دەنیاو شێعرێنە بېگانینا و تاقەتم نیا.
/وەشەویسیم /وەش بۊ/ جە هەناسە و چەمیت/وەشتەر مەرگم / جە باوەشەو دڵداریتەنە/من، تۊ/تاریکی شەوۍ/بی بە حەماسە عێشقی/عیشقیوە ڕووت/ س 105
بەپاو نەریتی باو لاو ئېمە کناچې و بە عام میینە، یاگې نکوولی و شەرمینە جە ملای عامەنە و حەتا فرەو یاگانە بە زار و دەنگ و هاوار کەرۊ، ڕازەو وەشەویسیش چە بارەو وەشەویسەکەیشۆ درکنۆ و بێ شاریاوە و پشت وپەنا ئا چیوە هەن دەروونشەنە بە نیسبەتوو کۆڕ یام پیای وەشەسیایش بە زار بارۆ . هەر ئیسیچش سەر بۊ حەتا جە لاو فرەو ئانیشاوە کە زانیاری ئاکادیمی و زانستگایشا هەن خروکشا مەوەنە جەلاو کەسیشاوە بە تاییبەتت فەزاو بنەماڵەینە ئی وەشەویسیە وزا بەر و ئاراستەو وەراوەریشا کەرا. بەڵام یاگې شانازینە خەریکا ئی تاپوە و لومپەڕە، ئاستی بەرزشا مێواری و تەپۆڵکێ وەرگیری ڕەمای ڕەماوە./وەشەویسیم/ وەش بۊ/ جە هەناسەو چەمیت/ بې پەروا هاوارێ کەرۊ کە نیم نیگات کە (جە دەقی تازەنە بە هەناسە نامېش بریەنە) ماچۊ ؛ ئی وەشەویسیمە بەردەوام و تکاندار و نەسرەوتە بۊ بە نیسبەتوو تۊی وەشەویسی و ئازیزی ، هەرکات نیم نیگات پېسە هەناسەن پەی حەیاتی و ئی هەناسە داوام هەنە هەمیشەیی بۊ./ وەشتەر مەرگم/ جە باوەشەو دڵداریتەنە/ بەڕاسی یاگې فەخریینە کە کناچې لاو ئیمە ئەنە جەسارەت، یام تاوی واچی یاغەیە بېیەنە کە بەسەراحەت بە داڵدارەکەیش ماچۊ: وەشتەرین مەرگا پەی من کە تاوێ تاو جە باوەشەو هەستوو دڵداریتەنە مرکیۆرە و ئارام گېرو. بەڕاسی ئی باوەشە مشۊم فرە یاگې بې وێنێ بۊ . تەنانەت جە قسەو وەڵینامانە هەن ماچا: فرە وەشا کە دمایین ساتەکاو مەرگیت جە باوەشەو وەشەویسیتەنە بی . پەی هەمیشەی ئارام گېری و ئی ئارامەشە نەبڕیاوەن.تا ئیسە هەرچی وچیان و کریان تاوی واچی تۊزەش فرە هەسە نەبییەنەو جە دەقی کلاسیکمانە، یام فۆلکلۆڕەنە ئەپېسە وئەچیمنە باسی هەنې. ئەڵبەت نەک پېسە ئەوەڵ شەخسی ئەر چیمنە باسانێ درکیەبا فرەتەر لایەنو وېما نەبییەن و جە فەزاو کینایەو ئیماو ئیشارەینە خۆلقیان. دیارا شەوە بە عام جە هۆنەری کۊردەوارینە مەکۆ یام فرسەتە بېیەنە کە دڵدارێ بە یۊی یاوا و جە مەیلانگەو دڵدارینە تاوە سەیاوە ئارام گېرا. /تاریکی شەوی/ بی بە حەماسەو عەشقی/ عەشقیوە ڕووت/ بەڵام نەدرکیان کە شەوە بۊ خەلقو حیماسەی پەی عیشق وەشەویسی، عیشق کە من، تۊ ئاڵنگارێ بیمێ و جە داستانەکانە بنویساما، بە حەماسەو ڕووتانە نامې ئی وەشەویسیما بریۊ.
سەرچەمەکې:
1-انسان درشعرمعاصر- محمد مختاری
2-شعر زنان جهان_گزیدە وترجمە : فریدە حسن زادە
3_ طرح _ جریان شناسی شعر هورامی-عادل محمدپور
4-گرێ _ دەفتەرو شێعری خانم کۆلسوم عۆسمانپور
5-خوایچ پەی تۊ وەش کەرڎېنە_ دەفتەرو شیعری خانم سورەیا زارەعی.[1]