یاوەرنامیٛ نادیارە
نویسای: #ناجح گوڵپی#
وەختیٛو، کە سیفەت پەیوەس مەبوٙ بەنامیٛوە تا مەفهومو چەنیەتی، ژمارە، حاڵەت، یام جوٙرو سیفەکەی بە شیٛوەی نادیار وەسف بکەروٙنە، پەنەش مەواچان یاوەرنامیٛ نادیارە (صفت مبهم). واتچننە مەگنوٙ وەڵیٛو نامیٛوە یام یاگەگیرونامیٛوە بەبیٛ یاردی، یام بە یاردی سازەوی دماو نامەکیٛوە مەیوٙ، پەیئانەی بە شیٛوێوی نادیار نامەکیٛ و یاگەگیرو نامەکیٛ دەسنیشانە بکەروٙن. یاوەرنامیٛ نادیارە مەبوٙنە بە تەمامکەرو کەردەوەی ناتەمامی: بەوردی سەرنجەو ئی واتچنا لای واریە بدەیمیٛ:
هەر کەسیٛو سەعیە بکەروٙن بەرمەشوٙ.
جە گرد هەوریٛوی واران نمەواروٙ.
بڕیٛو، بڕیە زەمین هەرچیش چەنی بکەرینە هەر بیٛخەیرەن.
من چە دەرسیٛو بە توٙ بواچو؟.
ویٛت جە ڕەفیٛقی هینی دوربگیٛرە.
زمسانی چیمنەی وشکم هەرگیز نەڎیەن.
من ژیوایمەنە زەحمەتی فرەم کیٛشتەن.
ئەوی تەر جە یاگەکیٛ ویٛشنە نەمەنە بیٛ.
پیای پاسنە جارێو تەر هوٙرنمەگنوٙ.
بەڵاهیٛریٛو گیواوم وست وەرو گاوەکان.
ئو واتیٛ واتچنکاو سەرینە هیٛڵە ئامێنە چیٛرشارە، یاوەرنامیٛ نادیاریٛنیٛ، وەلیٛم چنڎەها یاوەرنامیٛ تەریٛما هەنیٛ (کەمیٛو، کەمیە، توزیٛو، توزێ، توزیە، نەختێو، بەحرێو، دنیێو، بارێو، توزقاڵێو، دندالێو، ئەپیٛسنە، ئەپاسنە، ئەپوٙسنە، ئەچیمنە، ئەچامنە، چومنە، چامنە، چینە، پیٛسنە).
یاگەگیرونامیٛ نادیاریٛ و یاوەرنامیٛ نادیاریٛ، جیاکاریٛنیٛ، یاگەگیرونامیٛ نادیاریٛ جیاتی نامێوە، یاگەگیرو نامێوە بەکارمەیوٙنە، وەلیٛ یاوەرنامیٛ مەبوٙنە بە یاوەرە، رەفیٛقەو نامێوە، یاگەنامێوە.
گرڎ زاڕوٙڵەکیٛ وتیٛ. کاڵەکی هین نەسانی. یاوەرنامیٛ نادیارە.
گرڎ وتیٛ. هین کاڵەک نەسانوٙ. یاگەگیرو نامیٛ نادیاریٛ.
ئا یاوەرنامیٛ بەیاردیو ئامرازو پەیوەندی واتچننە مەیانیٛ متاوان:
نیشانیٛ کوٙی هوٙربگیٛران، ویٛشان و مەوسوفەکەشان:
زمسانیٛ چیمنیٛ وشکیٛم هەرگیز نەڎینیٛ.
من ژیوامەنە زەحمەتیٛ فریٛم کیٛشتیٛنیٛ.
مەشوٙ(ی) بگنوٙ میانشان، وەلێم وەرو سەختی درکنیاش نەنویسیان.
ئەویٛ تەریٛ جە یاگەکیٛ ویٛشانە نەمەنیٛنیٛ.
پیێ پاسنیٛ جاریٛوی تەر هوٙرنمەگنانوە.
مەوسوفەکە نویسەو ە هورمەگیٛروٙ، یاوەرنامەکیٛچ نیشانیٛ ئەژناسەی و یاگەگیرونامیٛ پەیوەسە:
زمسانە چیمنەکەم تا مەنەنا ویر نمەشوٙوە.
زەحمەتە فرەکەما خەریکەن کوٙتایش مەیوٙ.
پیا پاسنەکەما چیٛشش پەنە ئاما؟
نیشانیٛڕەگەزیهوٙرمەگیٛران: ڕوٙی چیمنە وەشەن.
شەوەی چیمنیٛ وەشەنە.
زەحمەتی فرەم چەشتەن.
دەردەی فریٛم چەشتیٛنە.
ئەوی تەر زو گیٛڵاوە. ئەوەی تەرە زو گیٛڵاوە.
مورفیمویچهوٙرمەگیٛران: وەهاری چیمنەیچ دڵگیرەن.
وەشی فرەیچما دی. ئەسپێ تەریچ مسانو.
میٛوەی چامنەیٛچە هەنە بەبار مەگیٛروٙ. هامسەری هینیچ نەبیەیش خاستەرەن.
یاوەرنامیٛ نادیارە مەبوٙنە بە تەمامکەرو کەردەوەی ناتەمامی.
ئا نانە فرەن. ئا شەربەتیٛ هینەنە.
پەتڵەکە هەرجوٙریٛو بوٙ بسانەش.
گوٙشت هەرچیش کەری هەر وەشەن.[1]