شېرکۊ بېکەس و نیشتیمانەکەش کە جە هیچ نیشتیمانێ نمەشۊن
هۊرئەوەگېڵنایو ئاماڎەکەردەی: #ئەسعەد ڕەشید#
بەشۍ دوەمە
مەحوی ئەپی تەرزە باس جە ڕۊحی و جەهانەکەیش مەکەرۊن:
شەوێ لەیلا بە مەجنوونی وەها وادەی تەماشادا
دەبێ ڕۆژێ ببینی من، کە تۆ ڕێ خەیتە دەشتی خەو.
مەجنوون، هەر کوردێن کە ڕۊح دلۍ جەهانە دلېنیەکەو وېشەنە کوردیانە وېش وەرجەسە کەرۊن. ئا کاتە هەر کوردێ مەتاوۊن درۆشایۆ ڕۊحیش دلۍ جەهانە دلېنەکەو وېشەنە بۋینۊن، گەر تەمامو هەسە بەرینەکېش جە هەرمانۍ کۆتېبان و پەشتیش کەردېبۊ ئەو دنیاو بەرو وېش و لوابۊنە دلۍ ساراو وەرمی. دلۍ ساراو وەرمینە لەیلۍ پېسە ئا ڕۊحە کوردییە دلۍ جەهانە دلېنەکەو ئا مروڤینە ڕازەکانو وېش پەیش ئاشکەرا مەکەرۊن، ڕازەکېچ پانەیە ئاشکەرێ مەبان که بە وەرم بلمېنە دلۍ ساراو وەرمی و چاگە ئانەیە بۋینمۍ کە دلۍ قۊمیاکا جەهانە واقیعی و هەسسیەکانە هەن، بەڵام جبەرۆ و بە هەسسەکامان و جە ڕاو تاقیکاریۆ نمەتاومۍ بېیاومېشان پەنە، جە کاتێنە ئانەی کە دلۍ ساراو وەرمینە مەوینمېش مەغزو قۊمیا واقیعیەکاو دلۍ کەتوارین و بەبۍ یاوای و پەیبەردەی ئەپا جۆهەرەیە نمەتاومۍ ئا پېوەڼیە میانو قۊمیا واقیعیەکانە هەن بېزمێ و چانەی بېیاومېنە کە ڕوەمڎۊن.
شېرکۊ، تاکو دمایین هەناسەش پاش جە ساراو وەرمی نەبڕیا، چەنی قۊمیا سەختەکا حاڵو شېعرۍ گېرېش و ڕەوانەو دلۍ جەهانو ساراو وەرمیش کەرۍ، ئەچاگە ئانەی وینۍ کە چېگە هەن، بەڵام ئېمە بە دیڎەو سەرەی کاتێ تەماشەش کەرمۍ جە وینگاما وېش مەشارۊوە، هەر تەنیا شاعېرەکېما مەتاوان دلۍ ساراو وەرمینە بۋیناش.
هەر ئەچی شېعرېنە شېرکۆ باسو ئانەی مەکەرۊن کە چەنی ئانەی مەیاونۊش بە ئېمە ئامېتێوەن جە زوانی کە بېیێوە هەستەکی هەن چەنی ئانەی کە دلۍ ساراو وەرمینە مەوینۊش، ئاڎ ماچۊ:
جوانی خوڎایم تېکەڵ بە جوانی زوانەکەیم کەردەن.
دمای ئانەیچ ماچۊ:
پۆکەی مەتاوۊن وەشەویسیتان سەرسام بکەرۊن و
بە پەڕجوو زوانی کەمەندکېشتان بکەرۊن.
ئانەی چېگەنە مەدوۊن، شېرکۆ بېکەس نییەن، پېسە کەسێ واقیعی، بەڵکوم ئاڎەن، دمای ئانەی کە پاش کۆتەنەنە دلۍ ساراو وەرمی، ئەچاگە ئانەشە دییەن کە دلۍ قۊمیاکانە ڕوەشدێنە، بەڵام جە هەستەکانو مرۊڤی پەنهانیۍ و ئەوەشاریێنێ. ئانەی کە دلۍ قۊمیاکانە ڕوەمڎۊن و نمەپېویۊن، ئاڼەن کە تەنیا دلۍ ساراو وەرمینە مرۊڤ مەتاوۊن پەیش پەنەبەرۊن. شېرکۊیچ دمای ئانەی چېگە نمەمەنۊ و مەیاوۊ ساراو وەرمی و مەگنۊنە دلۍ نیشتیمانە سەمەرەکەو ئاگەی، چاگە ئانەیە مەوینۊن هەکە دلۍ قۊمیاکانە ڕوەشدێنە، بەڵام بە نەوینی مەنەنۆ. یانی پېسەو جوانی لەیلەکۍ مەحوی پاسەن کە بە مەحوی ماچۊ؛ نمەوینیش تاکو ڕات نەگنۊ ساراو وەرمی.[1]