‍ خوەم مەی، خوەم مەی
پی ڕوانە دریێنێ پەنەم، بەڵام نمەبۊ دەنگو قللەیم بەرز کەروو نەکوو یۊ بزانۆ.
حەسرەتوو وەشیەکانوو کاتو کناچەییم کە جە دەورو  بەریام تەنیا بە بۊنەو کناچە بییەیم چەنەشا گېرتێنا و تابوتو مەرگو ئاواتام واراچەمەنە ڕوو بە قورسانو باوەڕە هیچ و پووچەکا زیڼەچاڵشا کەرڎېنێ، ناقیم هاژەنا.
ئا بەرزە فڕیە و هوڵ دایە چا دەورانە دلې مەژگیمەنە بییەن و حەسرەتوو یاوای بە سەر چەمەو هیواکام چەنەشا گېرتێنا لاشەیم لەرزنا.
ئا هەناسه بڕکیانە و یاو و لەرزانە چا کاتانە  لاشەیشا لەرزنینا یاڎشا موچرکی بڕۊ جەسەیمەرە.
ئا حوکمە ناهەقیا چا دەورانە بڕیێنشاوە پەیم  پېسەو تێخی تێژی پاچێناشارە و هەستەکاشا چەنە گېرتێنا وڕم کەرا.
ڕاسی من کێنا؟
من ئا کناچېنا کە بە دیاری دای ئەوەڵین نیشانێ ژەن بییەیم مۊرەو بې‌حیایی کوا میاچەمانم و جە ژەن بییەیم بېزارەم کەرا.
من ئا کناچېنا حەتا تەماشا کەرڎەو سرۆشتی جە دەلاقەو یانەباوانیم قەڎەخە بېیەن پەیم. ئا کناچې کە هەزاران گۊرانیێ نەواچیای قۆڕگەشەنە گیرشا کەرڎەبۆ. ئا کناچې کە بۊنەو عاڎەتی مانگېیانەی، مانگیە جاریە یاو و لەرز گرڎو لاشەیش گېرتەبۆ نەکوو یۊ بزانۆ بە پیس و چەپڵ تەماشاش کەرۊ.
ژەن بییەیم هېزو ڕۊشن کەرڎەو چراوەو هیواکامش نەمەنەن. ئا ئاواتا چا دەورانە زیڼە چاڵ کریاێنێ هیچ وارانێوە ئاوەزدارشا پەنە نمەبەخشۆ. ئیسەیچ کە ژەنینا مەحکوومەنا، هەمیشە مەحکوومەنا بە هەزاران هەزار کۆتەکە بېدەنگا، مشیۊم بە مەژگیم سڵەمنوو زرمەو ئی کۆتەکا جاڕ نەڎەو.  پایام خڵەتنوو بې چرکە ڕا گەزە کەرا. دەسێم مۊچیاری کەروو ئەنقەس نووکوو قەڵمی ماڕا. چڤنوو گۊشامەرە کەڕێ با و وەرو چەمام گېروو نەوینا.
من کە نە ویرەوەریێ کاتو کناچەییم وەشحاڵەم کەرا. نە ژان و ئازارەکانوو ئاروېم وێڵم کەرا.
شەریفی بېساران.[1]