دنیا ئینا چېگە
کوڵ و کۆتا؛ هەرجۊر بی کتېبیانە وەشکریا.
دەسوەشی کەروو چا ئازیزا زەحمەتشا کېشت، خەمشا وارد، پەیجۊرێ بییێ و کتېبېشا کیاستێ. دلەڕاسی و ئەرەنیاو ئی کتېبیانەینە، فرەتەر حەسرەتوو وېم و زاروڵەییم واردم؛ چی کەس نەبی ئاکاتە کتېبێم بڎۆ وەنۊوە؟ چی هیچکام جە معەلێمەکا دەحوێ کتېب‌داستانێوەشا نەژناسانی پەنە؟ چی مەدرسەنە جیاتی ئا گرڎ دەرس و بەزمە قۆڕا هەکە هیچ خەیرێوەشا نەبییە پەیما و ئېمەشا فێروو چەنی ژیوای نەکەردیمێ، چی دەحوێ یۊ ناما و داستانێوە یا شێعرێوە وەنۆوە پەیما و بەرۆما پەی دنیایەکای تەری؟ ئینێ و هەزاران پەرسۍ تەرێ مەژگیم ورنارە، بېتاقەتم کەرا، حەسرەتبار و خەفەتباریچ.
شەوق و زەوقوو ئی زاروڵا پەی وەش‌بییەی کتېبیانەی، دڵوەشکەر بې و هامکات تواز‌شانای بەعزێوەم هۊش بەرېوە. ئاواتەوازنا چېگەنە هەکە دوورا، دلې کتېبەکانە گېڵا، سەفەر کەرا، تەجروبە کەرا و وېشا و بەشەرەکا و دنیێ خاستەر بژناسا و ئی کوچە کتېبێ وەرچەمڕۊشنیێوەشا ژیواینە بد٘ۆ پەنە.
هیچ یاگێوە ڕیکە نەکەوتە دلې دەگێنە پینەی جیاتی ئانەی بلۊنە مەدرەسە، کریۆ بە کتېبیانەو گرڎو دەگێ و گرڎکەس تاوۆ بەهرەش چەنە بەرۆ، بەڵام بڕێ قەوڵ و قەرارێ دریێنێ کە یاگێوە سەربەوېش پەی دیاری کریۆ و ئومێدەوارنا پاسە بې وەرۆ.
فەرشید ڕۆستەمی.[1]