‍مۆنالیزای کوردە
داستانەو کناچې کابرای سمەر ورەشی
داستانەو ئی کناچە کوردێ کە چەنی بابەیش  جە ئوروومیە ڕاگنا و ملا پەی هەولێری.
چا دەورانەنە، چارەنویس تەسلیموو زەریفی سەرسام‌ ئاوەریش بۊ..! 
لەیلې و بنەیانەش بە دەسورو حکومەتو پالەوی مەجبورێشا کەرا شار و دیارو وېشا جیابازان و ڕوو بە کوردەسانو ئێراقی کۆچ بکەران.
بابەش بە بۊنەو کەمدەسیش مەجبوور بۊ دەس کەرۊ سمەر ورەتەی تاکو بتاوۊ چی ڕاوە دەرئامەدیە و پەنەژیوای بنەیانەکەیش بە دەس بارۆ.
چا کاتەنە شارو هۆلێری چیرو دەسەڵاتو ئێنگلیسینە بییەن. لەیلې کە ئیسە بە نامۊ (مۆنالیزای کوردی) نامېش جە دنیانە زڕیێنە، چواردە ساڵېش بییەن، ڕویێو دلې حۆشەو یانەکەیشانە کە خەریکە بۊ  کومەکوو بابەیش کەرۊ، سمەرەکا جەمێ کەرۊوە، کاروانێ سەروازیێ ئەسپسوارێ چەنی ئەفسەرێ وەرو یانەیشارە ڕەدێ با.
ئەفسەری ئینگلیسی چەمش گنۊ بە کناچێ کابرای سمەر ورەشی، ئارام و قەرارش بڕیۊ و دڵێو هەزار دڵێ ئاشقوو  ڕۊخساری زەریفیش بۊ.
دمای چن‌ کاتێ کابرای ئەفسەر چەنی سەروازەکاش گېڵۊوە  پەی لاو بابەو لەیلې و ماچۊ: ئاشقوو ئی کناچېتا بییەنا و ئیسه ئامانا داواشوە.
بەڵام بابەو لەیلې بە بۊنەو دین و ئایینیشا و بڕێ جە باوڕەکاشا و ئانەیە کە ئاڎیشا خەڵکو ئورووپاینێ بە هیچ جۊرە سەرە نمارۆ ڕاسە و قەبووڵ نمەکەرۊ!
ئەفسەرەکە  فرە مەلاڵیۊوە ئەو کابرای، بەڵام هەر نمەتاوۊ ڕازیش کەرۊ. ئاخرش ئەفسەرەکە بە بۊنەو لەیلېوە مەجبوور بۊ بەی سەرو دینیشا و چاگەنە بۊ بە موسڵمان، دمایی چن کاتاتەرە دیسان مەگېڵۊوە پەی لاو بابەو لەیلې و ماچۊ ئیسە ماچی چېش؟ ئامەنا جواوی ڕەدم پنە نەڎەی، دیسان جواوش کەرۊوە و ماچۊ: من بە هیچ جۊرە نمەتاو قەبووڵ کەروو.
شۊنۊ چن کاتارە کابرای ئەفسەر مزانۆ بە هیچ شێوە ئی پیا ڕازی نمەبۊ، شەوانە سەروازەکاش کیانۆ پەی یانەو کابرای و لەیلې بە زۊر بەرا و گېڵاوە پەی ئورووپای.
دمایی چن ساڵا ئەفسەرەکە گەرەکش بۊ بە شێویە هەواڵ بڎو بە بابەو لەیلې  دەسور مڎو و ماچۊ:  بزاندێ کام وێنەکېشی عال هەن جە شارەنە باردێش با بە زەریفتەرین شێوە جە لەیلې  وێنە بکېشۆ.
شۊنۊ چن کاتارە کابرای ئەفسەر بە بۊنەو ئانەیوە بابەو لەیلې جە ژیوایش با خەبەر کەرۊ و جە دڵنگەرانی بەرش بارۆ تابڵوکە کە کېشانشا کیانۊشوە پەی هۆلێری.
داستانەی وەشەو کناچې کابرای سمەرورەشی و ئەشقوو ئەفسەری ئینگلیسی جە کوردەسانو ئێراقی دەس بە دەس کریا و دەنگش داوە، تاکو چی بەینە وەڵینە تابڵۆو کناچێ سمەرۋرەشی بە نیشانێ عیشق و وەشەویسی دلې یانەو فرەو خەڵکینە بېشا و لکنێنېش قۆرخەو دیواریرە.
هۆرگیریا جە دنیای مەجازی:
گوڵزار شەریفی_بېساران.[1]