پێدەچێ‌ ئەم نەورۆزە بێ‌ سەرئێشەترین نەورۆز بێت بۆ بەرپرسانی کەرتی گەشتیاری، چونکە هەر لە ئێستاوە پێشبینی دەکەن لەم نەورۆزەدا کەمترین گەشتیار ڕوو لە کوردستان بکەن.
گوتەبێژی دەستەی گەشتوگوزاری هەرێمی کوردستان بە (رووداو)ی گوت کە چاوەڕێی هاتنی ژمارەیەکی زۆری گەشتیار لە نەورۆزی ئەمساڵ بۆ هەرێمی کوردستان ناکەن، بۆیە هیچ ئامادەکارییەکیان بۆ پێشوازی لە گەشتیاران لە ڕۆژانی نەورۆزدا نەکردووە.
بەپێی ئاماری دەستەی گەشتوگوزاری هەرێمی کوردستان، لە 5 ساڵی ڕابردوودا ساڵ بەساڵ هاتنی گەشتیاران بۆ کوردستان ڕوو لە هەڵکشان بووە، بە جۆرێک لە ساڵی 2008دا 791هەزار گەشتیار هاتبوونە کوردستان، بەڵام لە ساڵی 2013دا ژمارەی گەشتیاران نزیکبووەوە لە 3 ملیۆن کەس. زۆربەی گەشتیارانیش لە بۆنەکان و بە تایبەتی لە جەژنی نەورۆزدا هاتوونەتە کوردستان.
لە ناوەڕاستی ساڵی ڕابردوودا بەهۆی سەرهەڵدانی شەڕی داعشەوە هاتنی گەشتیار بۆ کوردستان بە ڕێژەی 60% کەمی کرد، بە تایبەتی گەشتیارانی عەرەب. ئەمساڵ پێشبینی دەکرێت ژمارەی گەشتیاران زۆر لەو ڕێژەیەش کەمتر بێت.
نادر ڕوستی، گوتەبێژی دەستەی گەشتوگوزاری هەرێمی کوردستان گوتی "بەهۆی ئەو بارودۆخەی هەرێمی کوردستان و عێراق پێیدا تێدەپەڕێ‌، لە نەورۆزی ئەمساڵدا پێشبینی ناکەین ژمارەی بەرچاو لە گەشتیاران بۆ گەشت ڕوو لەشارەکانی کوردستان و ناوچە گەشتیارییەکان بکەن".
نادر ڕوستی، هۆکاری کەمبوونەوەی ژمارەی گەشتیاران لە نەورۆزی ئەمساڵدا بۆ شەڕ و ناسەقامگیریی ئاسایش لە شارەکانی عێراق دەگەڕێنێتەوە "بەشێک لەو گەشتیارانەی ساڵانی ڕابروو لە شارەکانی خواروو و ناوەڕاستی عێراق لە نەورۆزدا دەهاتنە کوردستان، ئێستا لە کوردستان ئاوارەن، بەشەکەی دیکەشی بەهۆی نەبوونی ڕێگا و شەڕ و ناسەقامگیریی بارودۆخی ئاسایشی ناوچەکانیان ناتوانن گەشت بکەن بۆ کوردستان".
ساڵانی ڕابردوو ژمارەیەکی زۆر لە گەشتیارانی ئێرانی و گەشتیارانی کوردی ڕۆژهەڵاتی کوردستان ڕوویان لە هەرێمی کوردستان دەکرد، بە تایبەتی لە نەورۆزدا. نادر ڕووستی لەو باوەڕەدا نییە ئەوانیش ئەمساڵ گەشت بکەن بۆ کوردستان.
رووستی گوتی "گەشتیارانی ئێرانی و ناوچەکانی دیکەش بەهۆی ئەو شەڕ و ناسەقامگیرییەی ناوچەکە ئارەزووی گەشت ناکەن بۆ کوردستان، بۆیە هیچ ئامادەکارییەکمان بۆ پێشوازی لە گەشتیاران نەکردووە، تەنیا ئەوە نەبێت لە ڕۆژانی جەژندا بۆ پاکڕاگرتنی ژینگەی ناوچە گەشتیارییەکان، هەندێ ڕێنمایی بەسەر گەشتیاراندا دابەش دەکەین".
میوانی هوتێلەکان 150% کەمی کردووە.
بەپێی ئاماری دەستەی گەشتوگوزار، لە نەورۆزی 2013دا زیاتر لە 415 هەزار گەشتیار لە ماوەی 13 ڕۆژدا ڕوویان لە هەرێمی کوردستان کردبوو، بەم هۆیەشەوە بەشێکی زۆری گەشتیاران بەهۆی نەبوونی شوێنی مانەوە لە هۆتێلەکان، شەوانە لە قوتابخانەکان و سەر شەقامەکان و نێو پارکەکان دەمانەوە.
جوتیار محەمەد ساڵح، خاوەنی میوانخانەی مەم و زین لە شاری سلێمانی بە (رووداو)ی گوت "ئەمساڵ ژمارەی گەشتیاران بەراود بە ساڵانی ڕابردوو بە ڕێژەی 150% کەمی کردووە، بەجۆرێک ئێستا کە چەند ڕۆژێکی کەمی ماوە بۆ نەورۆز، تاکە ژوورێکمان حیجز نەکراوە، بەڵام ساڵانی پێشوو زۆربەی ژوورەکانمان لەم کاتەدا حیجزکرابوون".
میوانخانەکەی جوتیار، 84 ژووری نووستنی هەیە، بەڵام وەک جوتیار ئاماژەی بۆ کرد، شەوان 10 ژووریان میوانی تێدایە، ئەوانیش هیچیان گەشتیار نین "زۆربەیان بووک و زاوان، یان دانیشتووی شار و شارۆچکەکانی کوردستانن کە لەگەڵ شاندی حکومی یان ڕێکخراوە ناحکومییەکان هاتوونەتە نێو شار".
هێرش ئەحمەد، سەرۆکی کۆمەڵەی میوانخانە و چێشتخانەکانی هەرێمی کوردستان دەڵێت ساڵانی ڕابردوو لە سەرەتای مانگی ئادارەوە ژووری زۆربەی میوانخانەکان لەلایەن گرووپە گەشتیارییەکانی ناوەڕاست و خوارووی عێراقەوە پێشوەختە حیجز دەکران و تەنانەت دەستەی گەشتوگوزار بە هاوکاریی ئیدارەی پارێزگاکان ئامادەکارییان بۆ هەڵدانی خێمەی گەشتیاری لە پارک و شوێنە گەشتیارییەکان دەکرد، بەڵام ئەمساڵ بەپێچەوانەوە 85%ی ژووری هوتێلەکان چۆڵن.
هێرش ئەحمەد پێشبینی ناکات بۆ نەورۆزی ئەمساڵ هیچ گەشتیارێک ڕوو لە هەرێمی کوردستان بکات.
لە هەرێمی کوردستاندا زیاتر لە 860 هوتێل و موتێل، 1625 ڕێستورانت و کافتریای گەشتیاری و 74 گوندی گەشتیاری هەن، بەڵام لە ساڵی ڕابردووەوە بەهۆی قەیرانی دارایی و کەمیی ژمارەی گەشتیاران ژمارەیەکیان داخراون.
هێرش ئەحمەد بە (رووداو)ی گوت "بەهۆی نەبوونی گەشتیار و بەرزکردنەوەی نرخی کارەبا و باج، تاوەکو ئێستا زیاتر لە 80 هۆتێل و مۆتێل (36 لە هەولێر، 24 لە سلێمانی و 20 لەدهۆک) داخراون، ڕۆژ بە ڕۆژیش ژمارەی ئۆتێل و مۆتێلە داخراوەکان لەزیادبووندایە، تەنانەت هۆتێلی 5 ئەستێرەشیان تێدایە".
هەروەها گوتی "تاوەکو ئێستا هیچ ژوورێک بەمەبەستی گەشتی نەورۆز لەلایەن کۆمپانیاکانی گەشتیاری و تەنانەت کەسیشەوە حیجز نەکراوە، بۆیە بەدڵنیاییەوە دەڵێم ئەمساڵ کوردستان نەورۆز بەبێ گەشتیار بەڕێدەکات، تەواوی ساڵەکەش ساڵی نەهامەتی دەبێ بۆ کەرتی گەشتیاری".
- 18-03-2015