دواڕۆژ، کۆچەر عەلی
وەزیری کۆچ و کۆچبەرانی عێراق ڕایدەگەیەنێت لەسەرەتای شەڕی داعشەوە تاوەکو ئێستا چوار ملیۆن و 300 هەزار کەس ئاوارەبوون و له و ژمارەیەش دوو ملیۆن کەس گەڕاونەتەوە شوێنەکانی خۆیان، دەڵێت بۆ نۆژەنکردنەوەی ئه و شوێنانەی کە بەهۆی شەڕی داعش زیانی بەرکەوتووە بڕی 35 ملیار دۆلاری پێویستە.
دەرباز محەمەد وەزیری کۆچ و کۆچبەرانی عێراقی بەدواڕۆژی ڕاگەیاند بەهۆی شەڕی داعشەوە سەرجەم سێکتەرەکانی ژێرخانی ئابووری وەک ئاوەڕۆ، کارەبا، تەندروستی، کەرتی پەروەردە، ڕێگاوبان زیانێکی زۆری بەرکەتووە.
وەزیری کۆچ و کۆچبەرانی عێراق، وتیشی بەپێی پێشبینی وەزارەتی پلاندانان بۆ نۆژەنکردنەوەی زەرەرو زیانەکانی شەڕی داعش پێویستی بە 35 ملیار دۆلار هەیە، بۆ ئەمەش ئەستەمە حکومەتی عێراقی بتوانێت بەتەنها ئه و پارەیە دابینبکات، بۆیە دەبێت لەئاستی نێودەوڵەتی هاوکاری عێراق بکرێت.
دەرباز محەمەد، ئەوەشی خستەڕوو نۆژەنکردنەوەی ئه و شوێنانەی کە بەهۆی شەڕی داعش وێران بوون، پێویستی بە پێنج ساڵ هەیە تا بە تەواوی نۆژەنبکرێتەوە.
لەبارەی ژمارەی ئه و هاوڵاتیانەی بەهۆی شەری داعش ئاوارەبوون ناوبراو ئاماژەی بەوەشکرد لەسەرەتای دەستپێکردنی شەڕی داعش تاوەکو ئێستا نزیکەی چوار ملیۆن و 300 هەزار کەس ئاوارەبوون بەڵام له و ژمارەیە دوو ملیۆن گەڕاونەتەوە شوێنەکانی خۆیان لەوانەش زیاتر لە یەک ملیۆنی لە هەرێمی کوردستان ماون و لەسەرەتای دەستپێکردنی ئۆپراسیۆنی ئازاد کردنەوەی موسڵیش 520 هەزار کەس ئاوارەبوون.
ناوبراو ڕوونیشیکردەوە زیاتر لە 200 هەزار هەوڵاتی عێراقی لەسەرەتای شەری داعشەوە تاوەکو ئێستا چوونەتە وڵاتانی ئەوروپاو لەوانەش نزیکەی 120 هەزاریان بەیەکچاری کۆچیان کردووه و ناگەڕێنەوە عێراق.
لەبارەی هاوکاری وڵاتانی نێودەوڵەتی وەزیری کۆچوکۆچبەرانی عێراق زیاتر وتیشی ڕێکخراوە خێرخوازیە نێودەوڵەتیەکان لە سێ ساڵی ڕابردوو بەبڕی ملیارێک و 500 ملیۆن دۆلار هاوکاری حکومەتی عێراقیان کردووە بەتایبەت بۆ ئه و شوێنانەی کە شەری داعشی لێ ئەنجامدراوە.
24-04-2017