دواڕۆژ، کۆچەر عەلی
بەهۆی بارگرژییەکان و دروستبوونی شەڕ لە ناوچە جیاجیاکانی عێراق و هەرێمی کوردستان لە ماوەی 14 ساڵدا یەک ملیۆن و 200 هەزار هاووڵاتی مەسیحی و کریستیان بۆ دەرەوەی وڵات کۆچیان کردووە، قەشەیەکی مەسیحیش ڕایدەگەیەنێت، ئەمساڵ لە ترسی چەکدارانی #حەشدی شەعبی# کرستیانەکانی دەشتی #نەینەوا# ماڵوحاڵی خۆیان جێهێشتووە.
ئەسعەد حەتونا، قەشەی کەنیسەی مارگورگیس لە دەشتی نەینەوا بە دواڕۆژی ڕاگەیاند، بەهۆی ناسەقامگیری ڕەوشی ئەمنی و بارگرژییەکان لە عێراق و هەرێمی کوردستان و شەڕی داعش و گروپە تیرۆرستییەکان لە 2003وە تاوەکو ئێستا زیاتر لە یەک ملیۆن و 200 هەزار هاووڵاتی مەسیحی و کریستیان ماڵوحاڵی خۆیان جێهیشتووە و بەره و وڵاتانی ئەوروپا کۆچیان کردووە.
وتیشی کریستیانەکانی دەشتی نەینەوا ئەمساڵ لە ترسی هەڕەشەکانی حەشدی شەعبی و هێزە عێراقییەکان زۆربەیان ئاوارەی هەرێمی کوردستان بوون.
لەبارەی دواین ژمارەی ئه و هاووڵاتییە مەسیحییانەی کە لە عێراق و هەرێمی کوردستان ماون وەحیدە یاقۆ، ئەندامی پەرلەمانی کوردستان لە لیستی گردبوونەوەی گەلی کلدانی سریانی ئاشووری بە دواڕۆژی وت لە ئێستادا ژمارەی سەرجەم مەسیحییەکان لە هەرێم و عێراق 300 هەزار کەسە کە پێشتر ملیۆنێک و نزیکەی 500 هەزار کەس بوو.
ئه و پەرلەمانتارە ڕاشیگەیاند، ئه و کاتەی داعش شوێنەکانی مەسیحینشینی داگیرکرد و دواتر پێشمەرگە ئازادی کردەوە بەشێک له و مەسیحییانە ڕۆیشتنەوە شوێنەکانی خۆیان، بەڵام بەهۆی هاتنی هێزە عێراقی و حەشدی شەعبییەوە جارێکی تر هاووڵاتیانی مەسیحی و کریستیانەکان ئاوارەی هەرێمی کوردستان بوونەوە و هەندێکیشیان بەره و دەرەوەی وڵات کۆچیان کردووە.[1]
01-11-2017