سەرکۆماری تورکیا ڕەجەب تەیب ئەردۆگان، دیسان دەهۆڵی شەڕ ئەکوتێ. ماوەیەکە لە هەموو کۆڕو کۆبوونەوەکاندا کەڵبەکانی خۆی پیشان ئەدات و هاواری شەڕ ئەکات. ئەمجارەیان بە ئەفرینەوە گرتوویەتی. هەربۆیە بەدەستی ئەرگەنەکۆن بۆتە جڵەوکێشی هێزەکانی ناو دەوڵەتی سێبەر لە تورکیا. لەگەڵ دەوڵەت باخچەلی و هێزە ناشونالیست و توندڕەوکان بەرەیەکی فراوانی دژی کوردو کوردستان پێکهێناوە. ئەوان ئامانجی خۆیان نەشاردۆتەوە. بەئاشکرا ئەڵێن ئەبێ کۆتایی بە ئیرادەی کوردستانیان بێنین. ئێستا کانتۆنی ئەفرینیان کردۆتە ئامانج. داگیرکردنی جەرابلوس و الباب بە دەستکەوت و سەرکەوتن ئەزانن و ئەیانەوێ هەمان سیناریۆ لە ئەفرین دووبارە بکەنەوە. سەرەڕای ئامادەکاریی سەربازیی لە هەوڵی ئەوەدان ڕای گشتیش لەسەر ئەو هێرشە ئامادە بکەن.
هەر لە جەرابلوس و ئەلبابەوە هەتا ئیدلیب، هەرچی پاشماوەی ئەلقاعیدەو داعش و هێزە تێرۆریستەکان هەیە ڕێکیانخستوون و خەریکی ئامادەکارین بۆ هێرشکردن.
سەرکەوتنەکانی کوردستانیان و هاوپەیمانانیان لە ڕۆژاواو باکوری سوریا، خەوی سەرانی دەوڵەتی تورکیایان زڕاندووە. جگە لە شەڕ بیرو هۆشیان بەلای هیچ ئەڵتەرناتیڤێکی تردا ناچێت. ئێستا لە مێشکی ئەواندا تەنیا یەک شت هەیە ئەویش ئەوەیە دەستکەوتەکانی کوردان تێکبدەن و کوردان کوشتوبڕ بکەن. نەهێڵن هیچ قەوارەو پێگەیەکی کوردان لە سوریادا هەبێت.
رۆژاوای کوردستان و باکوری سوریا بۆتە گۆڕەپانی سیستەمێکی نوێ. دیموکراتی و فیدرالیزم کە پێکهاتەی ناوچەکە بە ئازادی تێیدا ئەژین، ئەقڵ و هۆشی لە سەری سەرانی دەوڵەتی تورکیادا نەهێشتووە. ئاشکرایە کە کوردو هاوپەیمانەکانی،هێزە تیرۆسریستەکانیان شکاند کە تورکیا لە پشتیان بوو. ئەم سەرکەوتنانە دەرفەتی هاوپشتییەکی نێونەتەوەیی بۆ کوردان ڕەخساند. بەتایبەتی سەرکەوتنی مێژوویی کۆبانێ کە بوو بە سیمبوڵی دنیای پێشکەوتوو. دوای ئەویش ڕزگارکردنی ڕەقەو دێرەزورو زۆر شوێنی دی. لەم پرۆسەیەدا کوردستانیان بوونە ئەکتۆرێکی دیارو ناسراوی ئازادی. تورکیاو هاوپەیمانەکانی وەک داعش و ئەلنوسرەو ئەوانی دی، بوون بە هێمای دژە مرۆڤایەتیی.
ئەم پێشکەوتن و سەرکەوتنەی کوردستانیان و سیستەمە نوێیە، بە دەوڵەتی تورکیاو دەمڕاستەکانی هەرس ناکرێت. لەبەرئەوە ئەیانەوێ بەهەر شێوەیەک بێ ئەو مۆدێلی هەبوونە نەهێڵن. هەربۆیە سنوورەکانی ڕۆژاوایان بە سەربازو چەکی گران تەنیوە. تورکیا بۆ هێرش کردن هەر خەریکی بیانوو داتاشینە.گوایا هاوپەیمانیی ڕۆژاوای کوردستان و فیدرالیی باکووری سوریا لەگەڵ ئەمەریکاو هەمانکات گەورەبوونی یەپەگە هەڕەشە بۆسەر ئەمنی تورکیا درووست ئەکەن. یەپەگە وەک هێزێکی لەشکری میللی لە 2011وە لەو هەرێمە ئەکتیڤە. کاری ئەو پاراستن و بەرگریکردنە لە خەڵک. ئەردۆگانیش بە مەبەست دۆخەکە ئەشێوێنێ و بیانووی نابەجێ ئەدۆزێتەوە.
هەرچەند ئێستا دەوڵەتی تورکیا لە سەر ئاستی دنیا جێی ڕێز نییەو بێزراوە، بەڵام پێویستە کوردان و هاوپەیمانانیان لە بەرامبەر ئەم هەڕەشەو هێرشانەی تورکیادا ئامادەکارو دەستبەکاربن و هەڵوێستێکی جدیی پیشان بدەن.
ئەردۆگان و حکومەتەکەی لە تەنگژەدان. لەگەڵ ئەوەشدا پرۆسەی ئامادەکاریی هەڵبژاردنی 2019ی دەستپێکردووە. ئەردۆگان ئەیەوێ باڵی نەژادپەرستی و کۆنەپەرستی ناوخۆیی بەهێزبکات تاکو بتوانێ لە هەڵبژاردندا دەسەڵاتی خۆی مسۆگەر بکات. هەربۆیە بەدوای بیانوویەکی شەڕو دەرفەتێکدا ئەگەڕێت. ئەفرینیش وەک خاڵێکی لاواز ئەبینێت.
بەڵام دەولەتی تورکیاو ئەردۆگان و حکومەتەکەی و هاوپەیمانەکانی زۆر بە هەلە دۆخەکە ئەخوێننەوە. ئەوان لە ئەگەری هێرشێک بۆ سەر ئەفرین سەرناکەون. ئەوان هەر هەوڵێک بدەن هەرگیز ناتوانن ئامانجێکی ئەوتۆ بەدەستبێنن و ئیرادەی خەڵکێک بۆ ئازادی بشکێنن. لە دنیادا هێرشی مەزن، هەمانکات بەرخۆدان و پاراستنی مەزن نموونەیان زۆرن. هێرشی دەوڵەتی تورکیا هەرچەند مەزن بێت، نمونەی بەرخۆدانی کۆبانێ لەبەرچاوانە. بەهەمان ئیرادەو تێکۆشان ڕێ لەداگیرکاریی ئەگرین. گەلی کوردستان لە کۆبانێ مێژووی بەرخۆدانی لە نوێوە نووسییەوە. لە کۆبانێ نەک تەنیا داعش، بەڵکو هاوکاری ئەوانیش کە خودی دەوڵەتی تورکیا بوو تێکشکا. لە کۆبانێ نەژادپەرست و کۆنەپەرستی ناوچەکە تێکشکێنران.
دەوڵەتی تورکیاو ئەردۆگان و حکومەتەکەی و بەرەی ئەوان،لە ئەفرین ڕووبەرووی شکستێکی گەورەتر لە کۆبانێ ئەبنەوە. ئەفرین لەجێی خۆیەتی، ئەفرینیەکان لە جێی خۆیانن. ئەوان بەهەموو هێزوتوانای خۆیانەوە ئامادەی پاراستنی وڵاتی خۆیان، ڕێزو شکۆی خۆیان و پاشەڕۆژی خۆیانن. یەپەگە و یەپەژەو هەموو گەلی ئەفرین و ڕۆژاوا لەسەنگەری بەرخۆدانا ئەبن. گەلی ئەفرین شەڕ ناخوازێت. بەڵام ئەگەر هێرش بکرێتە سەریان، ئەوا ئەفرین ئەبێتە گۆڕستانی داگیرکەران بە ئەردۆگان و هاوپەیمانەکانیەوە.
رەوشەکە هەستیارە. لەبەردەم ئەتمۆسفیری شەڕێکە. دەوڵەتی تورکیا هێرشی سەر ئەفرین و ڕۆژاوای کوردستانی کردۆتە ئامانجی خۆی. هێزە بەکرێگیراوەکانی ناوچەکەشی بۆ ئەو مەبەستە ئامادەکردووە.
لەم دۆخەدا هیچ واتایەکی بێدەنگبوون نەماوە. دەنگی شەڕ و هێرشکردن تا دێ بەرزئەبێتەوە. هەربۆیە پێویستە دەنگی بەرخۆدان و پاراستنیش زیاتر بەرزببێتەوە.
#کۆنگرەی نەتەوەیی کوردستان# بە دەنگێکی بڵند داوا لە گەلی کوردستان ئەکات زۆر بە جدی ئەم دۆخە، ئەم پڕۆسەیە ببینن و بەو پێیە خۆیان ئامادە بکەن. دەوڵەتی تورکیا شەڕی مان و نەمان لەگەڵ کوردان ئەکات. تەنیا یەک ڕێگای لەبەردەم گەلی کوردستان و هاوپەیمانەکانیان هێشتۆتەوە، ئەویش بۆ ئێمە لەم کاتەدا تەنیا سەرکەوتنە. پێویستە گەلی کوردستان هەموو ئامادەکارییەک بۆ سەرکەوتن وتێکشکاندنی ئەو هێرشە بکات. جگە لە سەرکەوتن هیچ ڕێیەکی دی نییە. ئەبێ ئەفرین ببێتە قەڵای بەرخۆدان و سەرکەوتن.ئەبێ دەوڵەتی تورکیا و ئەردۆگان لە ئەفرینیش ژەهری تێکشکان بنۆشن.
ک ن ک هەروەها داوا لە جیهانی دیموکرات، نەتەوە یەکگرتووەکان، یەکێتی ئەوروپاو ئەمەریکا، ڕوسیا و چین، ڤاتیکان و دەوڵەتانی ئیسلامی ئەکات کە هۆشیارییەکی جدی بدەنە دەوڵەتی تورکیا کە نەکەوێتە شەڕێکی لەو چەشنەوە.
هەروەها ک ن ک داوا لە گەلی تورکیا، لە هێز و دینامیکە مرۆڤخواز و دیموکرات و لیبرالەکانی ناو تورکیا ئەکات لە هەمبەر ئەم شەرخوازیەی ئەرگەنەکۆن-ئەردۆگان-باخچەلی ڕاوەستن، دەنگی خۆیان بڵند بکەن و ڕێگایان لێبگرن.
کۆنگرەی نەتەوەیی کوردستان دووبارە داوا لە تەواوی گەلی کوردستان، لە ناوخۆ و دیاسپۆرا، لە هەموو بزاڤە کوردستانییەکان، گەورەو بچوک، سیاسی و سڤیل ئەکاتکە پێکەوەو بەهەموو شێوازێک شانبەشانی گەلی ئەفرین و ڕۆژاوای کوردستان، لەناو هەمانگییەکی بەهێزدا بن. لەگەڵ دۆستان و هاوکاراندا لە پەیوەندیدا بن. چالاکانە لەبەردەم ئەم هەوڵەی دەوڵەتی تورکیاو حکومەتی ئەردۆگان و هاوکارانی لە سەنگەری بەهێزی نەتەوەییدا جێ بگرن.
گەل ئێمە، ئەفرین و ڕۆژاوای کوردستان و فیدرالیی باکوری سوریا و هاوپەیمانانیان هەر سەرئەکەون. دەوڵەتی تورکیاو حکومەتی ئەردۆگان و هاوکارانی ئەمجارەش تێکئەشکێن.
کۆنسەی بەڕێوەبەریی کۆنگرەی نەتەوەیی کوردستان – ک.ن.ک
برۆکسل
#17-01-2018#