مانگی ئابی ساڵی ڕابردوو پۆلیسی هەولێر تەرمی ئافرەتێکیان لە چۆڵەوانیی گوندی گەزنەی سەر بە ناحیەی عەینکاوەی شاری هەولێر دۆزییەوە، بەڵام دوای تێپەڕبوونی نزیکەی حەوت مانگ بەسەر دۆزینەوەی تەرمەکەدا، هێشتا کەس خۆی لێ بە خاوەن نەکردووە و تەرمەکە لە نێو بەفرگرەکانی پەیمانگەی دادپزیشکی هەولێر هەڵگیراوە.
رائید هۆگر عەزیز، گوتەبێژی پۆلیسی هەولێر، لە بارەی ئەو تەرمە بە (رووداو)ی گوت: تەرمەکە هی ئافرەتێکە، کاتێک دۆزیمانەوە چوار ڕۆژ بەسەر کوشتنیدا تێپەڕیبوو، گوللەیەک لە کەللەی سەری درابوو، تەرمەکە شێوابوو، ئاژەڵی کێوی دەست و قاچێکیان خواردبوو.
رائید هۆگر بەدروستی نازانێ ئافرەتەکە تەمەنی چەندە، چونکە کاتێک تەرمەکەیان دۆزیوەتەوە، هیچ ناسنامەیەکی پێنەبووە. ئەو مەزەندە دەکات ئافرەتە کوژراوەکە تەمەنی لە نێوان 20 – 25 ساڵان بووبێ.
هەر کاتێک پۆلیس لە دۆزینەوەی تەرمێک ئاگاداردەکرێنەوە، پۆلیسی ناوچەکە و تیمێکی پۆلیسی بەڵگە و تاوان دەچنە شوێنی ڕووداوەکە، دوای هێڵکاری بۆ شوێنی ڕووداوەکە تەرمەکە هەڵدەگرنەوە. ئەگەر خاوەنی هەبێ یان نا، بە مەبەستی پشکنین و زانینی هۆکار و جۆری مردنەکەی، یەکسەر دەینێرن بۆ پەیمانگەی دادپزیشکی.
رائید هۆگر باسی ئەو تەرمانە دەکات کە دەیاندۆزنەوە و دەڵێت: زۆربەیان ئافرەتن، پێدەچێ لەسەر (مەسەلەی شەرەف) کوژرابن، چونکە زۆرجار تەرمەکە دەشێوێنرێ بۆ ئەوەی نەناسرێتەوە و خاوەنەکەی نەدۆزرێتەوە.
گوتیشی ئەو تەرمانە زۆرتر لە ناوچەی چۆڵەوانی فڕێدەدرێن، تا ئەوکاتەی دەدۆزرێنەوە ئاژەڵی کێوی بەشێکی جەستەیان دەخوات، ئەگەر هاوینیش بێ گەرما هێندەی دیکە تەرمەکە دەشێوێنێ، بۆیە ناسینەوەیان زۆر زەحمەت دەبێ.
یەکێکی دیکە لەو تەرمانەی لە پەیمانگەی دادپزیشکیی هەولێرە، تەرمی ئافرەتێکە کە چوار مانگ لەمەوبەر لەسەر ڕێگای نێوان ناحیەی دارەتوو و قەزای بنەسڵاوە دۆزراوەتەوە. ڕائید هۆگر دەڵێت: توانیمان خێزانەکەی بدۆزینەوە، بەڵام ئامادە نەبوون تەرمەکەی ببەنەوە و گوتیان لەسەر شەرەف کوژراوە و نامانەوێتەوە. ئەگەر کەسوکارەکەی نەیبەنەوە ئەوە دوای ماوەیەک شارەوانی تەرمەکە دەنێژێ.=KTML_Quote_Begin==KTML_Style=width:35%;float:right;=KTML_Quote_Icon=؟ =KTML_Quote_Content==KTML_Red=زۆربەیان ئافرەتن، پێدەچێت لەسەر (مەسەلەی شەرەف) کوژرابن، چونکە زۆرجار تەرمەکە دەشێوێنرێ بۆ ئەوەی نەناسرێتەوە و خاوەنەکەی نەدۆزرێتەوە=KTML_End==KTML_Quote_End=
حاڵی حازر 12 تەرمی بێ خاوەن لە پەیمانگەی دادپزیشکیی هەولێرن، لەوانە هەشتیان لە ڕەگەزی مێن و چواریان لە ڕەگەزی نێرن.
دکتۆر یاسین کەریم، بەڕێوەبەری پەیمانگەی دادپزیشکی لە هەرێمی کوردستان، لەبارەی ئەو تەرمانە گوتی: زۆربەی ئەو تەرمانەی لێرە دەمێننەوە و کەس خۆیان لێ بە خاوەن ناکات، ئافرەتن. زۆربەشیان بە پاساوی پاراستنی شەرەف کوژراون.
بە گوتەی دکتۆر یاسین، ئەو تەرمانەی ئێستا لەوێن تەمەنیان لە نێوان 17 – 30 ساڵان دەبێ، دوو لە تەرمەکانیش تەمەنیان لە سەرووی 50 ساڵانە. تەنیا دوو لە تەرمەکان بە مردنی ئاسایی مردوون، ئەوانی دیکە کوژراون. کۆنترین تەرمیش کە تا ئێستا لە پەیمانگەکەیان ماوە، حەوت مانگ لەمەوبەر هێنراوەتە ئەوێ، نوێترین تەرمیش، تەرمی بێلانە کە مانگی ڕابردوو لە سنووری کۆیە کوژرا.
شەوی 20/1/2018 کەسێک کە خۆی بە شوان ناساندبوو تەلەفۆنی بۆ پۆلیسی کۆیە کردووە و لە هەواڵی کوشتنی ژنێک ئاگاداری کردبوونەوە، هەر ئەو شەوە پۆلیس چووبوونە ئەو شوێنەی کە شوانەکە لە تەلەفۆنەکەدا ناونیشانی دابوو، دوای گەڕانێکی زۆر لە بەرەبەیاندا تەرمی ئافرەتێکیان دۆزییەوە، دوای هەفتەیەک دەرکەوت ئەوە تەرمی بێلان کەمالی تەمەن 21 ساڵانە.
قانیع هاوژینی بێلان کە ساڵێکە لە زیندانە و دوای کوژرانی بێلان، پۆلیس گوتەی لێوەرگرتووە، گوتوویەتی ئەو هیچ کێشەیەکی لەگەڵ بێلاندا نەبووە، کەسوکاری بێلان بوختانیان بۆ هەڵبەستووە و کوشتوویانە. دوای تێپەڕبوونی 36 ڕۆژ بەسەر ئەو تاوانەدا، تەرمی بێلان هێشتا لە پەیمانگەی دادپزیشکی شاری هەولێرە و کەسوکارەکەی ئامادەنین بیبەنەوە و بینێژن.
دکتۆر یاسین، باسی چۆنیەتی مامەڵەکردن لەگەڵ ئەو تەرمە بێ خاوەنانە دەکات و دەڵێت: هەر تەرمێکی بێ خاوەن دێتە لای ئێمە، وێنەیەکی دەگرین و کۆدێکی بۆ دادەنێین، هەر کەسێک هاتە لای ئێمە بۆ بەدواداچوونی تەرمەکە، ئەوە وێنەکەی پێ نیشان دەدەین، ئەگەر تەرمەکە بشنێژرێ ئەوە کۆدی ناشتنەکەی هەیە و خاوەنەکەی دەتوانێ وەریبگرێتەوە.
گوتیشی: بەگوێرەی ڕێنماییەکان هیچ تەرمێک ناتوانرێت زیاتر لە 8 مانگ بمێنێتەوە، دوای تێپەڕبوونی 8 مانگ بەسەر مردنی، ئەگەر خاوەنی نەبوو تیمەکانی شارەوانی ئاگادار دەکەینەوە کە تەرمەکە بنێژن.
گۆڕستانێکی بێ ناونیشان
فاروق محەممەد، لێپرسراوی گۆڕستانەکان لە شارەوانیی هەولێر بە (رووداو)ی گوت: دوای ئەوەی لەلایەن شارەوانییەوە نووسراومان بۆ دەکرێ بۆ ناشتنی تەرمی بێ خاوەن، دەچین تەرمەکە وەکو هەر تەرمێکی ئاسایی کفن و دفن دەکەین، لە شوێنێکی تایبەت کە بۆ ئەو تەرمانە لە گۆڕستانی تازەی کەسنەزان تەرخان کراوە دەینێژین، ئەو کۆدەی بۆی دانراوە، لەسەر گۆڕەکەی دادەنێین، بۆ ئەوەی ئەگەر لە ئایندەدا خاوەنی پەیدابوو بە ئاسانی بدۆزرێتەوە.
ئێستا زیاتر لە 20 تەرم لەو شوێنە نێژراون کە حەوتیان تەرمی ئافرەتانن. تاوەکو ئێستا هیچیان خاوەنیان پەیدا نەبووە. مردووشۆرێکی ئافرەت کە تەرمی ئافرەتەکان دەشوات، بە (رووداو)ی گوت تەرمی ئافرەتی وا هەبووە هەردوو قۆڵی یان قاچێکی نەبووە، هەیە زۆر شێوێندراوە، بۆیە شووشتنی ئەو جۆرە تەرمانە زەحمەتە.[1]
#27-02-2018#