بەمەبەستی قەرەبووکردنەوە، شاندێکی ئیدارەی ڕاپەڕین سەردانی نووسینگەی #سلێمانی# ئەنجومەنی نوێنەرانی عێراقیان کرد و ڕاپۆرتێکیان لەبارەی زیانەکانی لافاوەکەی کۆتایی مانگی ئۆکتۆبەری ئەمساڵ پێشکەشی ئەندامانی ئەنجومەنی نوێنەران کرد، قائیمقامی پشدەر-یش زیانەکان بە 10 ملیار دینار دەخەمڵێنێت.
پێشنیوەڕۆی ئەمڕۆ، شاندێکی ئیدارەی ڕاپەڕین، کە پێکهاتبوون لە هەریەکە لە بەکر بایز، قائیمقامی شارۆچکەی پشدەر، کە #قەڵادزێ# ناوەندەکەیەتی و نەهرۆ عەبدوڵا، بەڕێوبەری شارەدێی سەنگەسەر، سەردانی نووسینگەی سلێمانی ئەنجومەنی نوێنەرانی عێراقیان کرد و لەگەڵ هەریەکە لە ئەحمەدی حاجی ڕەشید و هۆشیار عەبدوڵا، ئەندامانی ئەنجومەنی نوێنەران کۆبوونەوە.
دوای کۆبوونەوەکەش، لە کۆنگرەیەکی ڕۆژنامەنووسییدا، هۆشیار عەبدوڵا وتی: ئێمە پێشتر سەردانی ئەو ناوچانەمان کردووە، کە بەهۆی لافاوەوە زیانیان پێگەیشتووە، داواشمان لە ئیدارەی ناوچەکە کرد، کە بە ڕاپۆرتێک زیانەکانمان بۆ دەستنیشان بکەن، بۆ ئەوەی بتوانین لە پارەی تەرخانکراو بە ڕووداوە کتوپڕەکان، کار بۆ قەرەبووکردنەوەی زیانەکان بکەین.
پاشان، بەکر بایز، قائیمقامی پشدەر لە کۆنگرە ڕۆژنامەنووسییەکەدا، باسی لە زیانەکانی لافاوەکە کرد و ڕوونیکردەوە، کە زیانەکان جۆراوجۆرە، هەندێکی بەر پرۆژە خزمەتگوزارییەکانی وەک ڕێگاوبان، خوێندنگە، نەخۆشخانە، تۆڕەکانی ئاو و کەرتی کارەبا کەوتووە، کە بەشێکی دامودەزگاکانی حکومەتی هەرێم بەگوێرەی توانا نۆژەنیان کردووەتەوە، ئەوەی ماوەتەوە لەسەر ئاستی موڵک و ماڵی هاوڵاتیانە.
ناوبراو تێکڕای زیانەکانیشی بە 10 ملیار دینار مەزەندە کرد، ئەوەشی وت: لەمڕۆوە ئێمە چاوەڕوانی نوێنەرانی کوردین لە ئەنجومەنی نوێنەرانی عێراق، بۆ ئەوەی قەرەبووی ناوچە زیانلێکەوتووەکان بکرێتەوە.
لە وەڵامی پرسیارێکی ڕۆژنیوزیشدا لەبارەی ئەوەی کە تاچەند هاوکاریی گەیەندراوەتە زیانلێکەوتووەکان؟ نەهرۆ عەبدوڵا، بەڕێوبەری شارەدێی سەنگەرسەر باسی لەوەکرد، کە هەر لەسەرەتای لافاوەکەوە لەلایەن پارێزگای سلێمانییەوە بڕێک هاوکاریی گەیەندراوەتە زیانلێکەوتووان، کە خۆیان لە نەوت و گەرمکەرەوە و پێداویستیی خۆراکیدا بینیوەتەوە.
ڕۆژی 26 ی ئۆکتۆبەر لە ئەنجامی بارانێکی زۆر، لافاوێکی گەورە لە بناری #قەندیل# دروستبوو و لەکۆی پێنج ناوچە، زیانی زۆر بەر هەر سێ ناوچەی ناودەشت، سورە دێ، باڵەییان کەوت، کە هەر یەکە لە گوندەکانی قڕنەقاو، پرمەمکە، باراوە و بڕە دێ لە دۆڵی سورە دێ، لە ناودەشتیشدا گوندەکانی ئێندزێ، لێوژە، بۆکریسکان، زارگەلی، پردەشاڵ، گۆجاڕ، بەرگرکە، هەروەها لە دۆڵی باڵەیان تەواوی گوندەکانی گرتەوە.
ئەو زیانانەی کە بەر ئەو گوندانە کەوتن لە ئەنجامی لافاوەکە زۆرن، ڕێگاو بانە گشتییەکان و پردەکانی پەڕینەوە وێران و خاپور بوون، کە بەگشتیی 15 پرد وێران بوون، جگە لە پرۆژە و تۆڕەکانی ئاو، کە زیانەکە بووەتە هۆکاری نەمانی ئاوی نزیکەی 15 گوند.
هەروەها، کارەبای هەر سێ ناوچەکە پچڕاوە و بەدەیان جۆگەی ئاودێریی باخچە و ڕەزەکان وێران بووە، سێ بنکەی تەندروستیی و سێ مزگەوت و دوو خوێندنگا بەتەواویی وێران بوون و پرۆسەی خوێندن لە هەر سێ خوێندنگاکە ڕاگیراوە.
هەروەها، بە دەیان باخچە و ڕەزی خەڵک، وە وێران بوونی 15 ماڵ بە تەواویی و نزیکەی 30 ماڵیش لافاو کەوتووتە ماڵەکانیانەوە زیانێکی زۆریان بەرکەوتووە، ئەمە جگە لە لەناوچوونی بەدەیان ئاژەڵ، مێشەهەنگ و تێکشکانی ئۆتۆمبێل.[1]
#17-11-2018#