سەدەیەکە بووە بە چاڵ، بۆ چەقین و مانەوەی ئێمە، لەناو حەماسەت و هوتاف و سەقافەتێکی سەتحیداو لێنەگەڕا تۆزێ ڕۆچین بۆ ناو عەقڵ و هۆشیاریی.
نیو سەدەیە بووە بە دیوارێکی ئەستور، لە پشتییەوە دنیایەک شەڕوشۆڕو کارەسات و ناپاکی و عەمالەت.. ئەگوزەرێ و بەڵای دنیای بەسەر کوردبوون و کوردەواریدا هێناوە.
چارەکە سەدەیەکیشە بۆتە پەردەیەک بۆ داپۆشینی فەساد، فەسادێک کە مەگەر هەر سیحری ئەو بتوانێ دایپۆشێ!
نەفەسی گڵاوی ڕاسیزم و ژەهری قەومچێتیش لەولاوە بۆستێ.
ئەوانە هەمووی هەیە، وەلێ عوقدەی شتێک، شتێکی تر نیە، بەڵکو خراپترین دەرکەوتەی هەمان شتە!
وەلێ (عوقدەی کوردایەتی) شتێکی جیا لە کوردایەتی نیە، بەڵکو خراپترین مانەوەیە لە کوردایەتیدا! خراپترین مانەوەیە چونکە فریوی هەیە، تۆ وائەزانیت تێتپەڕاندوەو ئەو وەهمەت لا دروست ئەبێ، لەکاتێکا وانیە!
وەلێ (فاشیزمی دژەکوردایەتی)، هەروەکو (فاشیزمی کوردایەتی)، فاشیزمە.
سەیرکە، ، ، ، ، منو تۆ ئەگەر لەبەردەم بتێکا بوەستین و من بەردەوام گوڵی تێگرم و تۆ بەردەوام تفی تێکەیت، هیچ لەوە ناگۆڕێت کە هەردوکمان لە یەک خاڵدا چەقیوین و وەستاوین! لێرەدا منو تۆ هاوبتین و هەمان بت ئەپەرستین، تەنیا شێوازی پەرستنەکەمان جیایە!
مەسەلەن ئیسلامی و مولحید، خۆیان لە سەرو ژێری یەکترەوە ئەبینن، بەڵام لەڕاستیدا ئەوان هاوشان و تەنیشتی یەکن، لەبەردەم بتێکی هاوبەشدا.
جا لەم ساڵانەی دواییدا، شتێکی فرە کۆمیدی هەڵتۆقیوە، ئاڕاستەیەک دژی (فاشیزمی کوردایەتی)، کەچی خۆی فاشیزمە!! فاشیزمە بەو مانایەی کە هەموو شتێکی دەرەوەی خۆی ڕەت و ڕەشئەکاتەوە بەوپەڕی ڕقەوە!
پێمانئەڵێ کوردایەتی کوتلەیەکە لە ڕق و عوقدە، بەڵام خۆشی هەر کوتلەیەکە لە ڕق و عوقدەو لە عەلەمی کوردییەوە تاکو بنێشتی کوردی، حەساسیەت و عوقدەی لەگەڵی هەیەو بەمڕۆژگارە ڕقی بەسەرا ئەبارێنێ!
پێمانئەڵێ کوردایەتی خراپە لەبەرەئەوەی کە فاشیزمە، دەی کەواتە ئێمە پێویستمان بە شتێکی ترنیە کە ئەویش فاشیزم بێت!
ئەگەر ئێمە هەر لەناو ڕق و دەمارگیریدابین، ئیتر کوردایەتی و دژەکوردایەتی، هەر بەقەت حەسەن کەچەڵ و کەچەڵ حەسنی فەرقە.
ئێمە پێوستمان بە مەشروعێکی فەردی و جەماعییە لە دەرەوەی ڕق و دەمارگیری و جیاکاری. هەرئەونە.
هەرچی هەیت هەرئەوەبە، بەس تەنیا هەلکشێ بۆ سەرو ڕق. هەرئەونە.
هەر ئەوە بکە، ئیتر ئەشێ جیاو جیاوازبیت، بەڵام لەناو بازنەی ڕقدا، هەمووی هەر یەک تاس و حەمامە.
هەر ئەوە بکە، ئەوکات پێکەوەژیان ئەگەرێکە کە ڕەنگە ڕووبدات، بەڵام لە وجودی ڕقدا، پێکەوەژیان و یەکترقبوڵکردن، ئەگەری سفرەو ڕوونادا.
عەقڵانییەت موڵکی هیچ بەرەو ئاڕاستەیەک نیە، تەنیا موڵکی ئینسانە. ئینسان لەهەر بەرەو ئاڕاستەیەکبێت، ئەتوانێ بڕێک عەقڵانیی بێت. ڕق ئەو بەربەستەیە کە لە هەموو بەرەو ئاڕاستەکاندا نایەڵێ بگەیت بەو عەقڵانیەتە!
ئێمە بە ڕق جیاوازیی دروستئەکەین و ڕقیش (بێ جیاوازی) ڕامانئەکێشێ بۆ خوارەوەو نایەڵێ هەڵکشێین بۆ عەقڵانییەت! ئیتر لەو خوارەدا جیاوازیی نامێنێ و هەموو وەکو یەکمان لێدێ!
ئەو جیاوازییانەی ڕق لە پشتییانەوەیە، جیاوازیی نین لێکچوون! جیاکاریین نەک جیاوازیی!
جیاوازیی هەرلەخۆیدا ڕەگەزی قبوڵکردنی ئەویتری تیایەو جیاکاریش هەر لەخۆیدا ڕەگەزی ڕەتکردنەوەی هەموو شتێکی تیایە. قبولکردنەکە بێ ڕق ئەکرێ و ڕەتکردنەوەکە بە ڕق ئەکرێ!
یەعنی هەرئەوەی کە هەیە، بێ ڕق جیاوازییەو بە ڕقەوە جیاکارییە.
ئێستا من کارم بەوەنیە تۆ تەرەفداری کوردایەتیت یان دژەکوردایەتی، من کێشەم لەگەڵ هیچیان نیە، تەنیا کێشەم لەگەڵ ڕقی ناو هەردوکیان هەیە.
تۆش ئەگەر هەمان کێشەی منت هەبێت، پێکەوە ئەتوانین زۆر کێشە حەل بکەین، چونکە زۆرێکی کێشەکان هەر ڕقەو زۆرێکی چارەسەر هەر تێپەڕاندنی ڕقە.
ئێمە نیو قەڕنە باجی عوقدە شەخسییەکانی کۆمەڵێ سیاسیی ئەدەین، ماقوڵ نیە چەن سالێکیش باجی عودە شەخسییەکانی کۆمەڵێ نوسەر بدەین!
لەڕاستیدا (کوردایەتی) نە ئەو موقەدەسەیە کە سەدەیەکە دەپەرسترێ و نە ئەو شەیتانەشە کە چەن ساڵێکە بە نەفرەت ئەکرێ!
بەڵکو کوردایەتی وەکو هەر شتێکی تر، بابەتێکە بۆ ئەوەی (عەقڵ) ئیشی لەسەربکاو ئاگایی لێ بەرهەمبهێنێ! نەک ئەوەی (عوقدە) ئیشی لەسەربکاو ڕقێکی تری پێ ئیزافەبکات.
عەقڵ و ئینسانی ئێمە، لە ڕقدا لەکارکەوتووەو خەسارکراوە، خستنەوەگەڕی ئینسان و عەقڵی ئێمە، لە تێپەڕاندنی هیچ فکرو بەرەیەکدا نیە، تەنیا لە تێپەڕاندنی ڕقدایە!
ئەملاولای ڕق، ڕاستوچەپی ڕق، شیمال و جنوبی ڕق.. ئەمانە شوێنێکی تر نیە، لەهەرکاملایبیت هەر لەناو ڕق و لەهەمان شوێندایت!
کە ڕقت بەجێهێشت تەنیا ئەوکاتە لە شوێنێکی تردایت. تەنیا ئەو جێهێشتنەش ڕیگای نەجاتی ئێمەیەو تەنیا ئەو شوێنەش، کەناری ئارامی ڕاستەقینەیە! نەک ئەو کەنارە وەهمییانەی کە لەناو ڕقدا جەمسەرەکانی ڕق بانگەشەی بۆئەکەن.
ئسیلامیی و مولحید، پارتی و دژەپارتی، کوردایەتی و دژەکوردایەتی، دەسەڵات و موعارەزە.. ئەگەر تۆزێ دیقەتت هەبێ، لەم فەیسبوکەدا هیچ بەقەت ئەو جووتانە یەک نین و هیچ بەقەت ئەو دژانە لەیەک ناچن!
ئیتر ئاوایە ڕق[1].