مامۆستایانی ناو کامپی شەهید ڕۆستەم جودی- مەخمور، لە ڕاگەیەندراوێکدا داوادەکەن گەلی کورد خاوەنداریی لە #عەبدوڵڵا ئۆجەلان#، ڕێبەری گەلی کورد و زیندانیانی دیکەی ئیمرالی بکەن و بەرامبەر ئەو ستەمە بێدەنگ نەبن.
ئەمڕۆ، مامۆستایانی ناو کامپی مەخمور، کۆنگرەیەکی ڕۆژنامەنووسیان لەبارەی ڕەوشی زیندانیانی ناو زیندانەکانی تورکیا، کە ڕووبەڕووی مەترسی پەتای کۆرۆنا بوونەتەوە و هەروەها لەسەر ڕەوشی عەبدوڵا ئۆجالان ڕێبەری گەلی کورد و زیندانیانی دیکەی ئیمرالی ئەنجامدا و ڕاگەیەندراوێکیان خوێندەوە.
ڕاگەیەندراوەکە لەلایەن ماموستا شیرین چەتین خوێندرایەوە کە تێیدا هاتبوو: لە کەسایەتی هێلین بۆلەک و مستەفا کۆچەکدا تەواوی شەهیدانی زیندان بیردەهێنینەوە، بەڵێن دەدەین کە هەرگیز دەست لە دۆزی ئەوان بەرنادەین، ئەوە چەندین ساڵە لە کەسایەتی ڕێبەر ئاپۆدا گۆشەگیرییەکی توند لەسەر گەلی کورد بەڕێوەدەچێت، بەتایبەت لەدوای پێکهاتنی حکومەتی فاشیستی ئاکەپە و مەهەپە، ئەو گۆشەگیرییە بەڕێبازیی جیاجیا بەسەر زیندانیانی سیاسیدا جێبەجێکراوە، لەبەرخۆدانی بەڕومەتی زینداندا چەندین زیندانی شەهیدبوون، گەلێکیش کەمئەندام بوون و توشی نەخۆشی درێژخایەن بوون، دەسەڵاتی فاشیستی تورکیاش شەهیدبوونی هەر زیندانییەک وەک سەرکەوتن بۆخۆی دەبینێت.
بە تایبەت دوای بڵاوبوونەوەی پەتای کۆرۆنا، حکومەتی فاشیست هەوڵدەدات کۆمەڵکوژییەک لە زیندانەکاندا ڕووبدات، وەک جیهان دەیبینێت دەوڵەتی تورک بکوژ و دز و مافیا و چەتەکانی #داعش# ئازاد دەکات، بەڵام زیندانییە سیاسییەکان بۆ مردن جێدەهێڵێت، هەموو ئامانجیان ئەوەیە کە بەهۆی پەتای کۆرۆناوە زیاتر لە 10 هەزار زیندانی سیاسیی بکوژن.
بێدەنگ بوون لەبەرامبەر ئەوکۆمەڵگوژیە پشتگیریکردنی کۆمەڵکوژیەکەیە، بۆ ئەوەی ڕێگریی لەو کۆمەڵکوژیە بکرێت، دەبێت هەرکەس دەڵێت مرۆڤم بکەوێتە ناو تێکۆشان و دەنگی لەبەرامبەر ئەو کۆمەڵکوژیە بەرزبکاتەوە.
بۆ ئەوەی کۆمەڵکوژییەکی وەک ئەرمەنیەکان لەسەر گەلی کورد دووبارەنەبێتەوە دەبێت چاوی نێونەتەوەیی لەدژی کردارەکانی دەوڵەتی تورک کراوەبێت و بەرامبەر هەوڵە دوژمنکارەکانی دەوڵەتی تورک بێدەنگ نەبن.
وەک کۆمیتەی پەروەردەی کامپی مەخمور، ڕوو لە تەواوی مرۆڤایەتی و ڕیکخراوەکانی مافی مرۆڤ دەڵێین: ئەگەر ئێوە نەتانەوێت لە زیندانەکانی دەوڵەتی تورکی فاشیست کۆمەڵکوژیی دروستبێت، دەبێت دەنگتان لە بەرامبەر دەوڵەتی تورک بەرزبکەنەوە و ناچاری بکەن زیندانییەکان ئازادبکات.[1]
#25-04-2020#