شەوان ئەسپی تۆم
لویسا بالێنسوێلا
وەرگێڕ: #ئارام ڕەشید#
زەنگی دەرگاکە سێ جاری کورت و جارێکی درێژ لێ درا: نیشانەی ژوان. بێمەیل و نەختێک ترساو هەستامەوە؛ ڕەنگە خۆیان بن، ڕەنگە ئەوانیش نەبن، لەم کاتژمێرە لەیادکراوەی شەودا، دەکرێت تەڵە بێت. دەرگاکەم کردەوە و ئامادەی هەموو شتێک بووم غەیری ئەوەی ڕووبەڕووی ڕاوەستابم؛ وە ئەخیرەن.
گورجێ هاتە ژوورەوە و پێش لە باوەشگرتنم، کیلۆنی دەرگاکەی داخست. خۆپارێز وەکو هەمیشە، هەوڵیدا لەپشتسەرمان دڵنیابێتەوە. پاشان بێ گوتنی وشەیەک، لە باوەشی گرتم، تووند نەیگووشیم بەخۆیەوە، بەڵام لێگەڕا گشت هەستەکانی دووبارە بینینەوە زیندوو ببنەوە، چەندین جار گوتبووی؛ بەس هێشتنەوەی من لە باوەشی و نەرم ماچکردنم بەسە. وا بزانم هەرگیز متمانەیەکی ئەوتۆی بەوشەکان نەبوو، هەر بۆیە لە بێدەنگیداو بەلاواندنەوە هەموو شتێکی پێ دەگوتم.
سەرەنجام بە ئاهێکی قووڵ و نەختێک دوور لەیەک ڕاوەستاین، تاکو لەسەراپای یەکتر ورد ببینەوە، نەک تەنیا چاو لە ناو چاو بە جۆرێکی ناڕوون دەموچاوی یەکتر ببینین. من توانیم سڵاوی لێ بکەم، بێ هیچ سەرسامییەک لەدەنگمدا، سەرباری ئەوەی چەندین مانگ بوو هەواڵێکیم نەدەزانی، دەمتوانی پێی بڵێم:
وام دەزانی لە باکوور خەریکی جەنگیت.
وام دەزانی زیندانییان کردویت.
وام دەزانی خۆت شاردووەتەوە.
وام دەزانی لەژێر ئەشکەنجەدا مردوویت.
وام دەزانی لە وڵاتێکی تریت و بۆ بەرپاکردنی شۆڕش، گوتار دەدەیت.
ئەمەش ڕێگایەک بوو بۆ ئەوەی پێی بڵێم کە بیرم لێ کردووتەوە، کە بۆ ساتێک لە یادم نەچووە، کە هەستم نەکردووە ناپاکیم لێ کراوە. ئەویش هەمیشە بەو دووربینییە نەفرەتیەی کارەکانییەوە:
خۆشەویستم هیچ مەڵێ، چ سوودێکی هەیە بزانیت چیم دەکرد؟ باشترە هیچ نەزانیت.
پاشان بە خۆنازینەوە گەنجینەکانی دەرهێنا، دەکرا هەندێکیان بۆ من نیشانە و ئاماژە بن، بەڵام لەو ساتەدا تێنەدەگەیشتم. بوتڵێک `کاچاسا` و قەوانێکی `گال کۆستا`. لە بەرازیل چی کردووە؟ باشە بەنیازی چییە؟ بۆچی دووبارە گەڕاوەتەوە لە کاتێکدا دەزانێت کە ژیانی لەمەترسیدایە، کە بەدوایەوەن؟ پاشان گشت ئەم پرسیارانەم لەسەرم کردە دەرەوە (دیار بوو پێی دەگوتم بێدەنگ بە خۆشەویستم). گوتم وەرە خۆشەویستم. پێم باش بوو خۆم بسپێرم بە چێژی دووبارە لەگەڵبوونی و نەمویست بێزاری بکەم. بەیانی چیمان بەسەر دێت، ئەی ڕۆژەکانی دواتر؟
کاچاسا مەشروبێکی قوورسە، بەرەو خوار بەڕێ دەکەوێت، پاشان سەردەکەوێت بە هەموو جەستەداو لەشوێنی دروستی خۆی لانە دەکات و گەرمایەکی دڵنشین بە سەراپای جەستەدا بڵاودەکاتەوە. دەنگی گەرم و دڵنشینی گال کۆستا لەناو گوێچکەماندایە، بە حاڵەتی نیوە سەما و نیوە زەمبەلەکی دەڕۆینە سەر سیسەم و ڕادەکشێین، لە چاوەکانی یەکتر ڕادەمێنین، یەکتر دەلاوێنینەوە، خێرا یەکتر ناسپێرین بە چێژی جەستە، لێدەگەڕێین سەرلەنوێ یەکتر -کەشف بکەین- بناسینەوە.
سەیری دەکەم و دەڵێم (بیتۆ)، دەزانم کە ئەمە ناوە ڕاستییەکەی نییە، بەڵام تەنیا ناوە کە دەتوانم بانگی ئەوی پێ بکەم.
وەڵام دەداتەوە: ڕۆژێک دادێت کە دەتوانین خۆشەویستم، ئێستا حەز ناکەم قسە بکەم.
ئەمە باشتریشە. لێگەڕێ با ئەو ڕۆژەی کە بڕیارە بتوانین و موعجیزەی بەیەک گەیشتنمان، ئێستا تێک نەدەم.
لە ناکاو دەنگی گال کۆستا لە گرامافۆنەکەوە دێت: ‘A Noite eu so teu cavallo
ورتە ورت تەرجەمەی دەکەم، شەوان ئەسپی تۆم. تەقەلدان بۆ گرتنی هێزە جادوییەکان و پێش گرتن بەوەی بیر لە ئەوی تر نەکاتەوە: ئەمە قەداسەتە، وەکو (ماکومبە). یەکێک سەرمەستانە دەڵێت ئەسپ ئەو ڕۆحەیە کە خاوەنەکەی سواری بووە.
ئاخ خۆشەویستم، تۆش بەم عیلمی غەیب و سیحر و جادووەتەوە. باش دەزانیت هیچ پەوەندییەکی بە ڕۆحەوە نییە، ئەگەر شەوان ئەسپی منیت، لەبەر ئەوەیە کە سوارت دەبم، بەمجۆرە و بەوجۆرە، هەر ئەمە و تەواو.
هێندە ئارام، بەهێز، درێژخایەن و پڕ لە ناسکی بوو، کە بڕستمان لێ بڕا. هێشتا بە سەرمەوە بوو کە خەوم لێ کەوت.
شەوان ئەسپی تۆم..
ئەم تەلەفۆنە نەفرەتییە بەو زرینگە زرینگەیەوە وردە وردە لەو خەوە قووڵە بێداری کردمەوە. ڕۆیشتم تاکوو وەڵامی بدەمەوە، لە کاتێکدا کە بە زەحمەت دەمتوانی بێدار ببمەوە: ڕەنگە بیتۆ ئێستا بێدار بێت، بێگومان وا بوو، دەمێک بوو ڕۆیشتبوو، بێ ئەوەی بڵێت بۆ کوێ دەچێت. هەڵبەت وەکوو خووی هەمیشەیی خۆی ڕۆیشتبوو، وەختێک کە من لە خەودا بووم. خۆی دەڵێت ئەمە بۆ پاراستنی منە.
لە تەلەفۆنەکەوە دەنگێک هات کە خۆی بە (ئەندرێس) ناساند -کەسێک کە ئێمە ناوی دەنێین ئەندرێس- و گوتی: بیتۆیان دۆزیوەتەوە، مردووە. لەناو ڕووبارەکە، بەرانبەر ماڵەکەت. وا دیارە بە زیندوویی خستویانەتە ناو کۆپتەر. دوای شەش ڕۆژ کە لەناو ئاودا بووە زۆر ئاوساوە و خەریکە دەتەقێت، بەڵام دڵنیاین کە خۆیەتی.
بێ بیرکردنەوە زریکاندم نا، ناکرێت بیتۆ بێت. لە ناکاو ئەو دەنگەی کە بە دەنگی ئەندرێس دەچوو، فەرمی و جیاواز گوتی: تۆ پێت وایە؟
ئەوسا بیرم کەوتەوە کە بڵێم تۆ کێیت، ڕێک لەو کاتەدا ئەویش تەلەفۆنەکەی داخستەوە.
دە، پانزە خولەک؟ چەندێک لە تەلەفۆنەکە ڕامام تاکوو پۆلیسەکان ڕژانە ماڵەکە؟ بیرم لەوە نەکردبووەوە کە بێن، ئەی چی، بۆچی وا بیرم کردووە کە نایەن؟ پاڵیان نا، جنێویان دا، هەڕەشەیان کرد، کون و قوژبنی ماڵەکە گەڕان، هەموو شتێکیان سەراوبن کرد. ئەوسا زانیم مەسەلە چییە. تازە چ جیاوازییەکی هەبوو کە هەموو شتێکیان داغان کرد و گشت شتێکیان سەراوبن کرد؟
هیچیان نەدەدۆزیەوە. تەنیا داراییم خەون بوو، خەونیش بە ئاسانیی لە کەس نادزرێت. خەونی من لەشەوی ڕابردوو کە بیتۆ لەتەنیشتم بوو و پێکەوە سێکسمان کرد. خەوم بینیبوو، هەموو شتێک لە خەوندا بوو، دڵنیا بووم بچووکترین وردەکارییەکان و تەنانەت ڕەنگەکانیشم، لە خەوندا بینیوە. پۆلیس کاری بە خەون نییە.
هەقیقەتەکەیان دەویست، واقیعیەتی نکۆڵی لێنەکراو، منیش نەمدەزانی ئەوە لەکوێ بهێنم.
لەکوێیە، ئەوت بینی، لێرە بوو، بۆ کوێ چوو. دەی بیڵێ، ئەگەرنا بەزەرەرت تەواو دەبێت. بڵێ دەی دەڵەقۆڕ، ئێمە دەزانین هاتووە بۆ لات، لەکوێیە، خۆی شاردووەتەوە، لەناو شارە، تۆ ئەوت بینی، قبووڵی بکە، بڵێ، ئێمە دەزانین کە هاتووە بۆ لات.
چەندین مانگە هیچ هەواڵێکی نازانم، زۆر دەمێکە نەمبینیوە، وازی لێ هێناوم، چەندین مانگە هیچ هەواڵێکیم نەبیستووە، ڕۆیشتووە، خۆشی شاردووەتەوە، چوزانم، لەگەڵ ژنێکی تر ڕۆیشتووە، وازی لە من هێنا، ڕقم لێیەتی، هەر بەڕاستی هیچ نازانم (بە جگەرە بمسووتێنە، تا دەتوانیت بە پێ لەقە بمشێلە، هەڕەشە بکە، مشکێک بخە ناو جلەکانم تاکوو بمکرتێنێ، نینۆکەکانم دەربهێنە، بە دڵی خۆت چی دەکەیت بیکە. لەبەر ئەوەی درۆ بکەم؟ لەبەر ئەوەی بڵێم لێرە بووە، لە کاتێکدا کە هەزار ساڵە وازی لە من هێناوە و ڕۆیشتووە؟).
باسی خەونەکەمیان بۆ ناکەم، چ جیاوازییەکی هەیە بۆ ئەوان؟ شەش مانگ دەبێت ئەو بیتۆ ناوەم نەبینیوە کە خۆشمدەویست. بزر بووە، ڕۆیشتووە. بەس لە خەودا دەیبینم و خەوەکانیش تۆقێنەرن، زیاتر مۆتەکەن.
بیتۆ ئێستا دەزانیت، ئەگەر بە ڕاستی تۆیان کوشتبێت یان لە هەر کوێ بیت، شەوان ئەسپی تۆم و دەتوانیت هەر کات بتەوێت بێیت و سوارم ببیت، تەنانەت ئەگەر لە زیندانیش بم. بیتۆ، لێرە لە زیندان هەست دەکەم ئەو شەوە خەوم پێوە بینیویت، بەس خەو بوو. ئەگەر بەڕێکەوت، قەوانێکی گال کۆستا و بوتڵێکی نیوە پڕە کاچاسا لەماڵەکەمدا هەیە، لێگەڕێ لە یادم بکەن: بەلای منەوە بوونیان نییە.[1]