نۋیستەی: ئاکۆ مارانی
11و ئەپڕیلو 2017
مانیفێست-کەرڎەو سیستەمو پەرۋەرڎەی و وەنەی
یېۋە چە گرفتە بنەڕەتییەکا کۊمەڵو ھەرېمو کورڎستانی و ئێراقی و وەرکۆتی مېیانی و دلۍ ئاڎېشاچەنە کۊمەڵو ھۆرامانی، سیستەمو پەرۋەرڎەی و وەنەی بېیەن و ھەن، سیستەمېۋ کە توانایی و ۋیرۆکەرڎەی و شارەزایی و خزمەتگوزاریی و دڵسۊزیی زاڕۊڵا [گۆرەکا ئایەڼەی] دەسنیشان کەرۊ. سیستەمو پەرۋەرڎەی و وەنەی ئېمەیچ پېسەو کۊمەڵەکا دۆروبەریما سیستەمېۋی ئایینی-پېیاساریی-زۊردارانە ھەن، کە ھیچ بوارېۋ پەی ئازاڎانە پەرۋەرڎەبېیەی و درۊس فېربېیەو زاڕۊڵا و گەنجا نمازۊۋە و پېسەو کۊیلەو سەبای ئاڎېشا بارمارو و ئاماڎېشا کەرۊ و زنجیرو ملکەچیی و بڕۋا بە وۍ نەبېیەی و نەتاۋای ملشانە تڼ کەرۊ.
پەی ئانەیە کە تۊقۊ سیستەمو پەرۋەرڎەی زۊردارانەی ملو زاڕۊڵامانە لابەرمۍ و تەندرۊسانە و ھۊش-تېژانە نەۋە گۆرەکا سەبای پنەبېیاۋنمۍ، ناچار مشیۊ سیستەمو پەرۋەرڎەی و وەنەی زۊرەملېیانەی ھۊرشانمېۋە و یاگۊ ئاڎینە سیستەمېی ئازاڎیوازانە، کە بتاۋۊ مافو زاڕۊڵا و گەنجا پارېزنۊ و بە درۊسی نەۋەکا ئارۊی پەی سەبای پەرۋەرڎە و ئاماڎۍ کەرۊ، پەی یاۋای پا مەرامەیە چڼ ھەنگامېۋی سەرەتایی پەنەۋازیۍ ھەنۍ، چانیشا:
- بەشداریکەرڎەی ئەڎا و تاتەی چە پلانۊ پەرۋەرڎەی و وەنەینە.
- سەپنانی سەرپەرشتیی و چەمداریی ئەڎا و تاتەی سەرو بەرنامەو بېشکەیانەو زاڕۊڵا و باخچەیانەو زاڕۊڵا و فېرگاکا زاڕۊڵارە.
- فاڕای وانەی ئایینی بە وەنەی ئایینی پېسەو وانېۋی فیلۆسۆفیی، بە واتێۋەتەرە وەنەی فیلۆسۆفییانەو ئایینەکا و ئاشناکەرڎەی زاڕۊڵا و نۊجەۋانا بە پرسیارە فیلۆسۆفییەکا چە بارەو ئایینی و باۋەرداریی ئایینی پېسەو باۋەڕېۋی تایبەتو کەسەکا.
- قەڎەخەکەرڎەو سیستەمو سزادای چە بېشکەیانە و باخچەیانە و پەرەستگاکا و فېرگاکانە.
- کۊمەڵایەتیی-کەرڎەی و خۊڕایی-کەرڎەی خزمەتگوزارییە پەرۋەرڎەیی و فېرکارییەکا پېسەو بېشکەیانەو زاڕۊڵا و باخچەیانەو زاڕۊڵا و فېرگاکا وەنەی بنەڕەتی و ئاماڎەیی و باڵاتەری و ... تد
- فاڕای سیستەمو وانە-ۋاتەی چە مامۊسا-زانایی و فېریار-نەزانییۆ پەی بەشداریکەرڎەی چالاکانەو فېریارا چە وانەۋاتەینە و ھاندایشا پەی ۋیرۆکەرڎەی کەسیی و کۊمەڵییانەی.
------------------------------------------
وەنەرۍ بەڕێزی، پەی ئەژناسای پیتە تایبەتە ھۆرامییەکا دلۍ ئی نۋیستەیە، سەرو لینکو پیتەکا کلیک کەردۍ:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: مۇ
لینکو گرڎو پیتەکا ئەلفابێتی ھۆرامی
https://t.me/Ferhengu.Zvani.Horami/7588
[1]