داستانۊ شېخی سەنعانی
بەشۊ ویس و یەرەمۍ

وەختێ شېخی سەنعان دیش هەکە تەرسای کاۋرە و تەمامو کەشیشەکا، عېلو عەشرەت ئیمانشان ئارد، ئیتر وەشیېنە شوکرانەو خوڎایش کەردو خوڎای گۆرەیچ گەنج و زەڕو یاقووتش پەی واز کەردو زەڕ ئەفشان کریا، شېخی سەنعان لوانە یاگۍ وەرمی چەنی تەرسای مەعشووقېش.
سەنعان ئېڎش دی، کوورەش بە تاو بیی
بۍ سەبروو ئارام، تەواناو تاو بی
گەنجوور خەزانەی، گەنجش دا بە دەست
وېنەی نەقشی سیم، غەزالەی سەرمەست
کلید، بەرئاوەرد، شەند، بە قوفڵی زەڕ
پەیداکەرد جە کان، یاقووتی ئەحمەڕ
پەرێ نوقرەی خام کریا، زەڕ ئەفشان
کلید بەرئاوەرد نە گەنج و پەنهان
بۍ هۊش بی کلید نە گەنجی دولبەر
چوون مەستانی مەست، بەر ئاوەرد وە بەر
خارج بیی نە عیشق، شیی نە جامەی خاب
سەر نییا، وە بان موتەکای گوڵاب
جە لوتفی بېچوون، حەیی لا یەنام
سەنعان، چەنی یار وېش یاوا، بە کام
الحەمدوللە باقی وەسەلام
خاتیمەی کیتاب، یاوا بە ئەنجام
بە لوتفی بېچوون، بینای بانی سەر
سەنعان، بە دڵوەش، هەم ئاما وە بەر
یاشاە، باجەتی هەم بە ئیسمی زات
بە نووری لەقا، پاکی بۍ هەمتات
بە عەرشی عەزیم موقەڕیباتت
بە زیکر و تەوحید مەلائیکاتت
بە غەفاری وېت، جەهان ئافەرین
بە میعراجی خاس(ختم المرسلین)
هەم بە شاهسوار، عەرسەی لا(فتی)
پەرېش نازڵ بیی سوورەی (هل اتی).
بە سیدق و ئیخلاس ئەسحابانی پاک
بە سۊزی دەروون، شەهیدانی خاک
هەر وەختێ یاران، مەنیشان وە هەم
مەوانان کیتاب، سەنعان وە بۍ خەم.
[1]