داستانۊ حەیدەری و سنۊبەرۍ
بەشۍ چل و حۆتەمە
پیرەژەنەکۍ هەواڵۍ سنۊبەرېش جە هامشیرەکەیش هۊرگېرتۍ و بە دڵوەشی پەی لاو حەیدەر بەگی گېڵاوە:
دایە بە دڵشاڎ، هۊرېزا بە جەخت
واتش: ئەی جوان نیکزاڎەی نیکبەخت
خوڎا مەزانۊ، ڕەنجم بەردەوە
بەڵام سەڎ تومەن، خەرجم کەردەوە
حەیدەر وات: تەنخواش جە من بستانە
بەڵام، دڵوەشیی، بە من بنمانە
دەردەم، دا پەنەش، کیسەی سەڎ تومەن
لوا، بە تەواف، کڵېسای ئەرمەن
نیشت وە گەنجینە شېری دلاوەر
درۊست ڕوو بە ڕووی یاگەی سنۊبەر
دیش، نیشتەن غەمگین ماهی جەهاندار
جە تابی هېجران، مەگرەوۊ بە زار
نازک نەوهاڵان، کشمیر و کابل
سېحر ئافەرینان، هارووت و بابل
گوڵئەڼام جەمین، هومەیلای پەریی
شیرینی ئەرمەن، لەیلێی عامریی
کەمانچە و ڕوباب، بەربەد چەنی ڕوود
مەنوازان، بە عېشق، چوون نەغمەی داوود
خوشخانان، وە سەوت، ڕاگەی هیندستان
ئیلا، قواقووی قیقەی سەرمەستان
ساقی سیم ئەندام، جامی بلوورین
گرتەبۍ، وە ناز، وەتای عەرەقچین
باڵ وە باهووبەند، مینای کارخانە
مەستی لا یەعقەل، شەیدای زەمانە
هەر کەس جە دەستش، پېیاڵەیێ مەسەند
ڕیشەی حەیاتش، بە غەمزە مەکەند
ڕەققاسان چەنی چەنگ و چەقالە
مەڕەقسان بە هەم، قەوم و بېگانە
ئامان بە هەمدا، بە ئاهەنگ و ساز
دڵی دەردی نېیان، ئاما بە پەرواز
یە گرد ئەساسەی خەنەبەڼان بۍ
پەی شاڎیی دەماخ، ماهی تابان بۍ
ئەمما، سنۊبەر، نە بېقەراریی
ئاما، بە گۊناش، ئەسری مرواریی
جە تاوی هېجران، باڵای حەیدەر بەگ
دووری هەناسەش، مەشین وە فەلەک
[1]